Се задушуваме во поткасти за биохакинг (обид на луѓето да го „хакираат“ сопственото тело за да функционира подобро, побрзо или подолго, со различни методи што вклучуваат научни и технолошки решенија), во скапи клубови за долговечност, суплементи што ги препорачуваат славни личности и апликации за следење на виталните параметри што го бележат секој наш чекор, па дури и тоа дали ‘рчиме. Мора да постои полесен начин.
Едно утро се разбудив еден час пред другите дома, се довлечкав до бањата и од куката зад вратата го зедов црниот костим за вежбање. Сè уште сонливо, додека ги триев очите, го ставив костимот под тушот сè додека најлонскиот материјал и металните плочки на него не се натопија со вода. Потоа го облеков, ги затегнав ремените околу колковите, нозете, рамената и рацете и тргнав кон дневната соба додека капеше вода од мене. Го вклучив мојот ајпад и пронајдов видео со вежби за зајакнување на телото на апликацијата „Каталист“ (Katalyst). Ги ставив безжичните слушалки „ерподс“ во ушите и почнав да вежбам.
Исклучително згоден тренер ме водеше низ низа вежби без тегови додека костимот испраќаше електрични импулси преку мокрите стимулативни перничиња до моите мускули во определен ритам – четири секунди со импулси, четири секунди без импулси, и така 20 минути. Стимулацијата не е болна, но кон крајот на вежбата импулсите беа толку интензивни што мускулите ми се грчеа при секое движење, па на крајот, облеан во пот, се борев за здив и бев на работ да паднам од напор. Да влезеше мојата четиригодишна ќерка тогаш во собата, сигурно ќе помислеше дека некоја вештерка фрлила магии врз мене.
Во периодот кога ќе влезете во четириесеттите, почнувате да правите чудни нешта со сопственото тело.
Почнав да ги користам костимот и апликацијата на „Каталист“ во март за што побрзо да закрепнам од повредите што ги добив преку зимата. Имав операција на стапалото, а набрзо потоа го скршив лактот кога се лизнав на мраз, поради што не можев да вежбам со месеци. Физичкото слабеење ме фрустрираше и негативно влијаеше на моето ментално здравје. Барав начин што ќе ми го врати чувството на сила. Не дека не сакав напорно да вежбам, но, како и повеќето луѓе на мои години, веќе не губам килограми лесно и не развивам мускули брзо.
Искрено, сакав малку да „мамам“.
Сите понекогаш сакаме да го фатиме покусиот пат. Влезете во која било аптека од синџирот ЦВС (CVS) и ќе видите рафтови полни со такви решенија. Таму има гумени бонбони со колаген за подобра кожа и коса, тинктури за подобар сон и таблети за забрзување на метаболизмот. (Истражувачката компанија „Гранд вју рисрч“ (Grand View Research) проценува дека индустријата за здравствени суплементи претставува пазар вреден 112,6 милијарди долари.) ЦВС нуди и див костен, растението епимедиум (кое се користи во кинеската медицина за потенција и циркулација) и сите можни видови пасти за избелување заби.
Можеби сте можеле беспрекорно да ги одржувате забите целиот свој живот и никогаш да не пиете кафе, но знаете што? Не сте го правеле тоа. Па, останува мамењето! (Или ако се чувствувате подобро, наречете го тоа зајакнување на организмот.)
Не зборувам за естетска хирургија, земање стероиди или за одење во Турција на пресадување коса. Не станува збор да живеете вечно или да изгледате 40 години помладо како Крис Џенер. Станува збор за мали поттикнувања слични на оние што ги добивавте кога со притискање на комбинацијата копчиња горе-горе-долу-долу-лево-десно-лево-десно-Б-А-старт (познатиот код Конами што стана дел од поп-културата) си обезбедувавте дополнителни 29 животи во „Контра“, една од првите видеоигри на „Нинтендо“ (Nintendo), игра во која како дете никогаш не успевав да победам
Токму на тоа помислив кога слушнав дека костимот на „Каталист“ користи електрична стимулација на мускулите (ЕМС) за да ги контрахира мускулите и така да постигне максимален ефект при вежбање. „Каталист“ во 2022 година во првиот голем циклус на финансирање собра 26 милиони долари со учество на инвестициските фирми „Инсајсив“ (Incisive) и АВП (Unlock Venture Partners), а во тоа вложиле и поранешната моделка Синди Крафорд и нејзиниот сопруг Ранде Гербер. Го нарачав „џен4 тренинг систем“ (Gen4 Training System), најновиот костим, со што добивате три месеци бесплатно членство во апликацијата. (По тој период, членарината изнесува 37 долари месечно.) Кога ќе се соберат трошоците за костимот и членарината, тоа приближно излегува колку и годишната членарина во синџирот луксузни вежбалници „Еквинокс“ (Equinox).
Bloomberg
Сите компоненти на костимот на „Каталист“ се вклучени во пакетот – од облеката што се носи под ЕМС-бодито до напојувачкиот модул поставен зад задната ложа. Не мора рачно да ги прскате металните плочки со вода со шишенцето што го добивате во кутијата. Доволно е целиот костим едноставно да го ставите под туш. Извор: „Каталист“.
Како изгледа користењето во практика? На родителите на мали деца ова им е добропознато: она чувство кога се обидувате да завршите нешто секојдневно додека детето ве држи за ногавицата и непрестајно вика „Тато!, Тато!, Тато!“? Такво е и ова – само што треба да извршите една единствена задача, да вежбате нормално, а наместо детски повици, бодито ви испраќа електрични импулси.
Импулсите на почетокот предизвикуваат чувство на скокоткање во мускулите, а потоа почнуваат да вибрираат и да навлегуваат подлабоко, до таа мера што речиси веќе не можете ни да ги кренете рацете над глава. Сепак, се навикнувате на тоа, а 20 минути брзо поминуваат. Сега веќе можам да поднесам и посилни импулси. Следниот ден по сесијата, а понекогаш и истото попладне, телото ве боли. Чувството е добро затоа што знаете дека методот функционира.
Пред костимот, испробав сè друго. Имав и тренинзи во живо и онлајн и со вистински тренери, како и со програми базирани на вештачка интелигенција. Ги пробав интензивните програми „Берис Буткамп“ (Barry’s Bootcamp) и „Кросфит“ (CrossFit), внимателно внимавав што јадам и користев дури и препарати од „Хербалајф“ (Herbalife). Имам непишано правило: секогаш прифаќам кога некој ќе ме покани да испробам нов тренинг. Така завршив на зумба, на програмите „Солидкор“ (Solidcore), „Оринџтеори“ (Orangetheory), „Соулсајкл“ (SoulCycle), „Арми“ (Aarmy), „Физик 57“ (Physique 57), „Шедоубокс“ (Shadowbox), „Роу хаус“ (Row House), на јога во загреани простории, па дури и на часови по пилатес во студиото „Чејси 23“ (Chaise 23) – кое го носи тоа име затоа што се наоѓа на 23. улица на Менхетн и затоа што сите вежби се изведуваат од стол (chaise значи стол на француски).
Некој би помислил дека ова е нормално за личност што се занимава со фитнес, друг би рекол: „Овој човек не е баш свој“. Добрата вест е дека и едните и другите се во право! Сепак, мојата работа е да тестирам производи и услуги. Сакам да ги испробам повеќето работи барем еднаш, а фитнесот е, секако, подобра опција од тешки дроги.
Почнав да размислувам за други мали трикови што можам да ги применам за да се чувствувам како да функционирам „по книга“ – или барем така да изгледа. Со години ставам малку ботокс на челото. Дали треба да одам уште подалеку? А што е со ласерите? Ласерите звучат фантастично! Земам малку мелатонин за полесно да заспијам, плус колаген за посјајна коса и поеластична кожа. Што треба уште да земам? Еднаш годишно користам лепенки за избелување заби за да ги отстранам дамките од кафе. Секоја вечер ги користам т.н. алфа-бета влошки за хемиски пилинг (така се викаат затоа што содржат алфа-хидрокси и бета-хидрокси киселини) од брендот „Д-р Денис Грос“ (Dr. Dennis Gross), кои го отстрануваат горниот слој кожа и го поттикнуваат растот на нови клетки. (Тоа навистина дејствува, но, за жал, ни овие влошки не можат да ги израмнат психолошките лузни што се создаваат кога животот го поминувате во уверување дека никогаш нема да бидете доволно добри.)
Не сум кандидат за лековите за слабеење, како „оземпик“ или „вегови“. Тие чудотворни терапии се како врвна шифра за мамење во видеоигрите – нешто како кодот TURTLE во ГТА (Grand Theft Auto), кој ви дава максимално здравје и заштита. Не значи дека луѓето што ги земаат можат да јадат нездрава храна и да не вежбаат; лековите дејствуваат само ако личноста умерено јаде и е физички активна.
Кога станува збор за другите работи на пазарот, погледнав и во сè поприсутната сфера на долговечноста. Го слушав поткастот „Хаберман лаб“ (Huberman Lab), кој го води невробиологот Ендру Хуберман од Стенфорд, и ги разгледав суплементите што ги нуди Брајан Џонсон, милијардер и биохакер со исклучително строг режим против стареење. (Меѓу другото, тој разменил крвна плазма со својот син.) Читав и за ексклузивни велнес-клубови како „Континуум“ (Continuum), каде што врз основа на анализа на крвта, рендгенски снимки и мерење на максималната потрошувачка на кислород (VO2) се составуваат персонализирани програми за тренинг и исхрана – за „скромни“ 50.000 долари годишно.
Ја прочитав книгата „Outlive“ („Да надживееш“ во слободен превод) на Питер Атија, од која дознав за пешачење со оптоварување (пешачење со ранец тежок од 22 до 27 килограми), и тоа до четири часа неделно, за редовни посети на сауна, од четири до седум пати неделно, нурнување во ладна вода три-четири пати, VO2-вежби и континуирано следење на нивото на шеќер. И тука запрев.
Дали сето тоа ви звучи како уживање? Мене не. Повеќе личи на напорна обврска. (Освен делот со сауната.)
Bloomberg
Секако дека сакам да живеам поквалитетно и подолго. Барем така мислам. Би сакал да сум доволно дисциплиниран за да се фокусирам на здрав живот, велнес, грижа за себе или виталност – како и да го наречеме тоа денес. Но, не сум таков. Кој има време за сето тоа? Имам дете, работа и луѓе што сакам да ги гледам. Вистината е дека многу од овие третмани не носат значајни резултати. Здравствените трендови, колку и да звучат убедливо, речиси никогаш не траат повеќе од неколку години. Единственото што опстанува се принципите што отсекогаш ги знаеме: правилна исхрана, редовно вежбање, доволен одмор, грижа за менталното здравје и припадност на заедница што ве поддржува.
Дури и Хуберман го признава тоа. „Она што навистина носи здравствени резултати – редовен сон, физичка активност, правилна исхрана, изложување на светлина, контрола на стресот, меѓучовечки односи и слично – е нешто што мора да го практикуваме секој ден“, рече тој во епизода во неговиот поткаст емитувана во јули.
Кога се обидувате да следите нешто што им помага на други, а кај вас не дава резултати, тоа може да биде разочарувачко. Дали е чудно што постојано трагаме по нови брзи решенија во тие области? Тоа го почувствував и јас за време на годините посветени на фитнесот.
Сепак, постои една важна разлика: костимот на „Каталист“ навистина дејствуваше. Со него, мојот вообичаен тренинг – комбинација од интензивни вежби и кревање тегови – доби турбозасилување. За шест месеци ми исчезна сало од половината, изгубив околу 4,5 килограми и изградив мускули. Обемот на половината ми се намали, а држењето ми се подобри. А уште подобро – напредував и на личен план.
Тоа ме охрабри да внимавам повеќе на исхраната, да спијам подолго и да јадам повеќе протеини и зеленчук. Дали би постигнал исти резултати со помош на тренер и нутриционист? Веројатно да. Дали би имал време и трпение за тоа? Не.
Полесните решенија – било да станува збор за таблети, костим или влошки за пилинг – може да бидат токму она што ќе ве мотивира да се ангажирате повеќе. Кога ми се побели забите, почесто користам забен конец. Кога користам ретинол, внимавам секојдневно да нанесувам крем со заштитен фактор.
Мора да прифатиме дека многу од овие производи од ЦВС – а уште повеќе оние што се продаваат онлајн – всушност имаат плацебо-ефект. Според магазинот на Американското лекарско здружение („Journal of American Medicine“, JAMA), лицата што земаат суплементи почесто наведуваат дека нивното здравје е многу добро, имаат здравствено осигурување, умерено консумираат алкохол, избегнуваат цигари и вежбаат почесто од оние што не ги земаат. Тие не се поздрави затоа што земаат суплементи – туку земаат суплементи затоа што инаку се поодговорни.
Кога како дете бев опкружен со постари момчиња што беа подобри во „Контра“, имав чувство дека ми треба шифра во играта само за да започнам. Откако го добив тој поттик, повеќе не се плашев и играњето ми беше позабавно. Имав причина да продолжам да се обидувам.
Значи, ако се чувствувате преплавено од сите тие модерни здравствени термини, купишта податоци од фитнес-уредите, стартапи за магнетни резонанци во кои вложуваат славни личности, пешачење со оптоварување и слични „чуда“, ве охрабрувам да си угодите и да испробате неколку трика. Можеби ќе почувствувате дека повторно се враќате „во игра“, како што мене ми помогнаа костимот и електричните импулси. Ако ништо друго, барем малку ми го подобрија животот.
Неколку актуелни полесни решенија
Грижата за здравјето и изгледот навистина може да биде едноставна.
Средство за смирување… преку слухот
Сè започна како обид да се опуштат пациентите кај стоматолог, а подоцна, сега покојниот невролог Блејк Холовеј, го создаде она што денес го знаеме како „Ну калм“ (NuCalm). Доволно е да ставите слушалки, да притиснете „плеј“ на апликацијата (месечната претплата е меѓу 14,99 и 49,99 долари, со 10 проценти попуст за годишна претплата) и ќе слушнете нешто што личи на музика, но зад која всушност стојат атонални тонови (тонови без јасна тонска основа). Овие звуци го стимулираат мозокот да влезе во длабока тета-фаза – состојба поврзана со медитација и почетни фази на сон (тета-бранови се мозочни бранови со ниска фреквенција).
Идеално е ова да се прави три- четири пати неделно, најмалку 20 минути. Луѓето што го практикуваат ова редовно велат дека им се продлабочил сонот, им се подобрила концентрацијата, им се намалил крвниот притисок и чувствуваат помала анксиозност. На почетокот, овој модерен симфониски звучен пејзаж може да дејствува чудно, но по неколку сесии во текот на денот, изгледа дека навистина го смирува преоптоварениот ум. Кај мене, вредностите на кортизол (т.н. хормон на стрес) измерени пред и по неколку месеци редовно користење на „Ну калм“ беа значително пониски. Дали поради апликацијата или затоа што едноставно повеќе одморав? Кој би знаел! – Марк Елууд
Помалку ‘рчење, подобар сон
Дишењето низ нос има многу предности: ги филтрира правот и поленот, го навлажнува воздухот што го вдишуваме и произведува азот-моноксид, кој помага крвта богата со кислород и хранливи материи подобро да ги снабди органите. И многу е потивко.
Лепенката за уста, популарна на социјалните мрежи, наводно поттикнува дишење низ носот, но функционира само ако човек навистина може да вдишува доволно воздух низ носот. Мекиот медицински носен дилататор „мјут“ (Mute) ги шири ноздрите со помош на потпорна структура. Во секоја ноздра се става по една флексибилна пластична влошока, поврзани со дел што минува преку носната преграда. Влошките во форма на буквата Д може да се наместат во четири широчини и да прилегаат стабилно. Најмногу се отвораат до 1,25 сантиметар. Пакување од три парчиња чини 23 долари и е доволно за околу 30 ноќи, но ако ги миете, може да траат и подолго. По еден месец користење, „мјут“ беше изненадувачки удобен, а дишењето многу полесно отколку со лепенка. Спиев подобро, повеќе не ‘рчев гласно и се будев посвеж. – Сал Ваглика
Опуштање на стапалата
Имате две минути и тениско топче? Тоа може да биде сосема доволно да се чувствувате подобро по напорен ден. Сврзувачкото ткиво што ги обвива и поврзува мускулите, наречено фасција, може да се опушти со едноставна техника и така да се намали стресот и да се поттикне циркулацијата, вели Тацијана Тумел, спортски терапевт и раководител на велнес во ексклузивното одморалиште „Ериро“ во австриските Алпи. Фокусирајте се на фасциите на стапалата и тркалајте го топчето напред–назад по табанот од две до пет минути, неколкупати неделно. Во седечка положба, нежно притискајте ја топката со стапалото, вклучувајќи ја и надворешната страна. Бидете одлучни, но слушајте го телото. „Важно е притисокот да не создава непријатност и да нема болка“, вели Тумел. По околу една недела би требало да почувствувате подобрување – помала болка во стапалата, поголема опуштеност и полесно движење. – М. Е.
Техника за добар сон
Секој што дели спална соба со некого знае дека температурата е чувствителна тема. Оптималната температура е клучна, а сепак сите имаат различна претстава што е „удобно“. Решение? Паметниот систем за спиење „Ејт слип под 5 ултра“ (Eight Sleep Pod 5 Ultra).
Како и претходните генерации, новиот „под“ (цената за „king-size“ кревет е 5.248 долари) е паметна навлака за регулирање на температурата, која се поставува под чаршафите. Топлотната пумпа стои покрај креветот и пропушта вода низ ситни цевчиња вградени во навлаката. Страните на креветот може да се наместат на различни температури според потребите на секој посебно. Нагодувањето може да се програмира однапред или во моментот, а температурниот опсег е од од 13 до 43 Целзиусови степени.
Постојат и дополнителни подлошки – метална конструкција обложена со ткаенина (дебела 7,6 см) што се поставува меѓу душекот и основата со пружини. Таа автоматски ја подига главата на тој што спие кога ќе регистрира ‘рчење. „Под 5“ нуди и ќебе исполнето со вода (1.050 долари) чија температура се приспособува со температурата на навлаката. Во еден месец тестирање, заспивав во просек за 21 минута – што е под границата од 30 минути, која според „Ејт слип“ (Eight Sleep) се смета за оптимална за квалитетен сон. Во длабока фаза на сон бев 17 отсто од ноќта, што е во рамките на препорачаните 15–20 отсто. „Под“, со помош на вештачка интелигенција (месечната претплата е 17 долари), го следи вашиот сон – дишењето, ‘рчењето, срцевиот ритам и движењата – и го приспособува системот за најдобар можен сон. – С. В.
„Обликувајте“ го лицето
Не толерирам болка и немам десетици илјади долари за длабок лифтинг на лице. Понекогаш сакам да имам повисоки затегнати јаболчици (или барем да изгледам свежо како да сум спиела осум часа без прекин). Затоа, кога се подготвувам за важен настан, закажувам третман за обликување на лицето што може да помогне да го постигнете популарниот изглед на изразени и дефинирани контури за ден или два.
Кога немам време, користам уред „гуаша“ (gua sha), инспириран од традиционалната кинеска техника, за да ги измасиран кожата и поткожното ткиво и да ги стимулирам циркулацијата и лимфата. Инаку, сакам да одам во салоните „Кери Линдзи“ (Carrie Lindsey) во Бруклин или Менхетн, каде што козметичарите ја измазнуваат кожата со долги движења, ја масираат и ја штипкаат во пределот на синусите, брадата, јаболчиците и под очите. По договор, масажата може да вклучи и масирање од внатрешната страна на устата, со хируршки ракавици, за дополнително подобрување на контурата на образите.
По ваков третман кожата изгледа почисто, подбрадокот помало, линијата на вилицата појасно дефинирана. Дополнително – поминувате еден час не правејќи ништо, слушајќи релаксирачка спа-музика. Ефектот е веднаш видлив и нема период на закрепнување. – Мариса Мелцер
Инстант лифтинг на очните капаци во мало шише
Не сакате хируршко подигнување на очните капаци? Постојат начини да се постигне сличен ефект на неколку часа. „Апник“ (Upneeq – пакување од 30 дози чини 150 долари) се капки за очи на рецепт што го подигнуваат капакот за околу еден милиметар по 15 минути. Ефектот трае од шест до осум часа.
Активната состојка оксиметазолин-хидрохлорид (истата супстанција што ја има и во назалниот спреј „африн“) предизвикува контракција на мускул во капакот што не може свесно да се контролира. Тоа создава посвеж и поодморен изглед.
„Апник“ е наменет за лица со спуштен капак, но шминкерите и естетските дерматолози често го користат за специјални настани – свадби, свечености и слично. „Тоа е одличен, иновативен производ што ни користи и мене и на моите пациенти“, вели дерматологот Елизабет Хале од Њујорк. Најчестиот несакан ефект е лесна иритација. – Шерил Вишховер
Повеќенаменски серум за лице
Инфлуенсерите може да трансформираат лице со шминка од 37 чекори, но во реалноста повеќето од нас сакаат еден производ што не создава чувство на „многу слоеви“. Оттука и популарноста на тонираните серуми – таканаречени „скин тинт“ формули – кои годинава бележат раст од 27 отсто според Spate Popularity Index.
Овие серуми се полесна и поедноставна алтернатива на кремовите и бараат многу помалку труд при нанесување од пудрата. Обично содржат заштитен фактор и состојки за нега како:
сквалан (за помека и поеластична кожа),
нијацинамид (витамин Б3 против црвенило и хиперпигментација),
хијалуронска киселина.
Тие не се „магични“, но можат да ги прикријат ситните линии и да дадат природен сјај. Препораки:
Ilia Super Serum (48 долари) – најголем избор на нијанси,
Summer Fridays Sheer (42 долари) – најприроден сјај,
NYX Buttermelt Glaze Soft Glow (16 долари) – најприфатлива опција.
– Ц. В
Побрзо до вита линија
Наместо 45 минути исцрпувачко трчање на лента, изберете побрзо одење на нагорнина, препорачува тренерката Бев Ретклиф од Бруклин. Лесното и рамномерно одење по угорнина е типична техника што бодибилдерите ја користат за намалување килограми, додека ја штедат силата за тренинг со тегови.
„Може да правите четири вакви прошетки неделно и речиси нема ни да почувствувате замор. Но заменете го тоа со трчање – и веднаш ќе ве болат мускулите“, вели таа.
Одењето на нагорнина ги активира глутесот, квадрицепсите, задната ложа и листовите. Препорака:
траење 15–30 минути без пауза,
постепено зголемување на наклонот од 4 до 10 отсто,
колковите поблиску до предниот дел на лентата,
не држете се за рачките,
гледајте напред (не во стапалата) за да не се оптовари вратот.
„Луѓето секогаш бараат некој нов трик. А јас велам: користете го она што веќе се покажало како ефикасно“, додава Ретклиф. – M. E.
.webp){kind=icon}
