Пандемијата засекогаш го промени фитнесот. Пред пет години вежбалниците беа принудно затворени, а пазарот со онлајн фитнес доживеа експанзија. Луѓето ги почувствуваа бенефициите од вежбањето дома, па бизнисот со апликации за вежбање продолжи да цвета и по ковидот, а тоа најдобро го покажуваат бројките.
Глобалниот пазар на онлајн/виртуелен фитнес, кој лани беше проценет на 28,2 милијарди долари, се очекува да достигне 38,59 милијарди долари до крајот на годинава. Според извештајот на „Бизнис рисрч“ (The Business Research Company), тоа најмногу се должи на силниот економски раст на пазарите во развој, зголемената понуда на онлајн апликации за фитнес, порастот на дигитализацијата и на сѐ поголемиот интерес за здравствено осигурување по ковидот.
„И во Македонија постои сѐ поголем интерес за овој светски тренд“, вели Драгана Младеновска, сопственичка на студиото „Фитлајф“ и основачка на истоимената платформа за здрава исхрана, фитнес и убавина.
Фото: Александар Вржалски
Таа за „Блумберг Адрија“ открива дека во моментов онлајн часовите ѝ носат двојно поголем профит од традиционалните тренинзи и во наредниот период очекува уште поголем раст.
„За разлика од ограничениот простор во сала, бројот на онлајн клиенти може неограничено да расте“, вели Младеновска.
Огромен потенцијал во развојот на онлајн услуги гледа и Атанас Михајловски, тренер и соосновач на фитнес-платформата „Хелти.ми“ (Healty.me), прва на македонскиот пазар што почна да нуди тренинг-програми со соодветна претплата.
Фото: Дејан Стојковски
„Иако времето на затворени сали помина и веќе е нормализирана ситуацијата, онлајн фитнес-индустријата бележи постојан раст, а со тоа продолжува да се развива и виртуелниот сегмент на нашата дејност“, вели тој.
Разумна одлука или промашена инвестиција?
Онлајн фитнесот штеди време, но истовремено се наметнува и прашањето дали дома, без опрема и присуство на тренер што може да ви укаже на неправилно изведување на вежбите, можете да ги постигнеме истите резултати. Експертите тврдат дека со конзистентност и со редовен тренинг ефектот е ист како да тренирате во фитнес-центар, но нагласуваат дека тоа е можно само доколку тренерот ги познава сите техники и има значајно искуство.
„Тренерот треба точно да знае како да креира програма што соодветно ќе го стимулира оној што вежба во ограничен простор и со лимитирана опрема. Отсуството на физичкиот допир како механизам на корекција и чувство може да придонесе клиентот потешко да нѐ разбере. Сепак, ако се вложат доволно труд и волја, ништо не е невозможно“, вели Михајловски.
Фото: Дејан Стојковски
Младеновска се согласува и додава дека за да бидете успешен онлајн тренер, прво мора да бидете одличен тренер во сала и да имате искуство во директна работа со луѓе.
„На моите онлајн тренинзи не само што вежбам заедно со клиентите од почетокот до крајот туку и активно бројам, ги потенцирам точките за дишење и постојано потсетувам на правилната форма, особено во позициите што знам дека можат да бидат критични за безбедноста и ефикасноста на вежбите“, вели таа.
Отворете четири очи
На социјалните мрежи сѐ поагресивно се рекламираат поединци и студија што нудат програми за онлајн вежбање. Понудата е огромна и потенцијалните клиенти никогаш не се сигурни дали зад нечија услуга се крие само желба за приход или навистина вреди тоа што ќе го платат, па треба особено да се внимава на неколку клучни фактори.
Фото: Александар Вржалски
„Најважни се искуството и стручноста. Тренерот треба да ги препознае потребите на клиентот, но и да ги приспособи вежбите за да се постигнат најдобри резултати без ризик по здравјето. Стручноста, пак, значи познавање на правилната техника при изведување на вежбите, но и нивно соодветно комбинирање за да се постигне максимален ефект“, вели Младеновска.
Таа напоменува дека добар тренер е оној што ве води низ процесот, ве мотивира и ве поддржува во секој чекор, а не само лице што ќе ви даде програма за вежбање. Според неа, особено е важно потенцијалниот клиент да провери какви резултати има тренерот од претходни корисници и дали тие се позитивни и искрени.
Михајловски, пак, смета дека во време кога маркетингот е неверојатно моќна алатка, гаранција речиси нема, па сѐ е сведено на проба и грешка или, пак, на усна препорака. Тој предупредува и дека не секогаш годишните членарини што се поевтини се и подобри.
Фото: Дејан Стојковски
„Вложувањето во квалитетни тренинзи, тренинг-програми, обука на тренери и постојаното надградување во поглед на учење и следење развој е најдобрата стратегија што може да ја имате. Ниту една кампања не е толку успешна, барем не на долг рок, како што се доброто искуство и личната препорака“, вели тој.
Кој е најголемиот проблем?
Вежбањето од далечина нуди многу предности, а најголеми се флексибилноста и комоцијата. Не мора да излегувате оддома и да трошите пари на превоз, па виртуелниот фитнес најчесто е и поевтин. Немате ниту однапред договорен термин, па вежбате кога сакате. Тогаш, во што е најголемиот проблем?
„Проблемите најчесто се поврзани со опремата и просторот. Тука е и потребата од присутен тренер кај клиентите почетници за правилно поставување на основите на движење“, вели Михајловски.
Фото: Александар Вржалски
Недостигот од директен контакт со тренерот, кој може значително да влијае на мотивацијата, е најголемиот проблем и според Младеновска.
„Понекогаш колку и да се труди тренерот да ги потенцира сите аспекти, кога клиентот не е под директен надзор постои ризик од неправилно изведување на вежбите“, вели таа.
.webp){kind=icon}
