Што ќе прават брендовите и креаторите на содржини без Тикток?

Брендовите потрошија четири милијарди долари на реклами на Тикток (TikTok) во 2023 година, не вклучувајќи ги соработките со влијателните луѓе.

Тикток тврди дека има над 170 милиони активни корисници во САД, а речиси две третини од возрасните под 30 години редовно ја користат апликацијата, трошејќи на неа дневно просечно по 55 минути. „Блумберг“ на почетокот на 2024 година објави дека „Бајтденс“ (ByteDance), компанијата што е сопственик на Тикток, има цел да оствари повеќе од 17 милијарди долари приходи од продажба само во САД преку „Тикток шоп“ (TikTok Shop), која им овозможува на корисниците да купуваат производи директно преку апликацијата.

Прочитајте повеќе: Што би значело повлекувањето на Тикток од Америка за дигиталниот маркетинг?

Најуспешните креатори на Тикток успеаја да ги напуштат своите редовни работни места, додека брендовите што ги освоија корисниците забележаа некогаш и вртоглав раст на приходите. „Си-ен-ен“ (CNN) објави дека само во САД присуството на Тикток претставува постојан извор на приход  дури за 220.000 поединци и мали бизниси.

Покрај тоа, платформата има недвосмислено влијание врз културата, создавањето и развојот на трендовите, а влијае и врз навиките на потрошувачите.

Да се потсетиме само на популарните хаштагови за кои претходно известуваше „Блумберг Адрија“, а кои директно влијаеја на тоа што ќе произведуваат брендовите и што ќе носиме. На пример, „Моб вајвс“ (Mob Wives) значително влијаеше на зголемувањето на побарувачката за бунди кај помладата популација. Не заостанаа ниту „Најт лукс“ (Night Luxe) и „Клин грл“ (Clean Girl), а некои стилови се наречени „core“ (англ. core, essence - суштина, срцевина), како што се „Барбикор“ (Barbiecore) или „Ферикор“ (Fairycore), бидејќи многу брзо влегоа во срцевината на модниот замав.

Bloomberg Mercury

Микротрендовите се проширија со молскавична брзина и на традиционалните медиуми, другите платформи и маркетинг-плановите на многу брендови. Иако често претставуваа предизвик за луксузните брендови во модната и козметичката индустрија, кои мораа да бидат ефикасни во искористувањето на моментите на вирална популарност, за некои многу се исплатеше тоа.

 

Иако нема сомнеж дека дигиталната култура ќе продолжи да генерира трендови, придонесот на Тикток за брзината и различноста е тешко да се надмине или замени.

Во случај на забрана за платформата, модата и другите брендови ќе се соочат со предизвици во одржувањето директни врски со младата и активна публика, која доминантно е присутна токму на оваа платформа. Следствено, тие ќе мора да ги приспособат своите маркетинг-стратегии за да ја компензираат загубата. Тоа значи дополнително развивање на сопствените дигитални канали - и тоа брзо. Некои го гледаат ова како можност за освежување на содржината на дигиталните канали со некој покреативен пристап.

За тие, пак, што не се толку флексибилни во својот маркетинг-пристап, како и за креаторите на содржини, извесно е дека ќе мигрираат, односно ќе мора да ја зголемат својата видливост на други платформи на кои нивната публика е најзастапена. Најочигледната нова адреса за нив може да бидат Инстаграм (Instagram) или Јутјуб (YouTube). Повеќето од нив веќе имаат сметки на нив, но и Инстаграм рилс (Instagram reels) и Јутјуб се интересни поради растечката популарност и интересот за видеосодржините. Но, иако според извештајот на компанијата „Глобал дата“ (Global Data-Social Media Sector Score Card) за резултатите во секторот за социјални медиуми во третиот квартал од 2024 година Инстаграм го престигна Тикток како најпреземана апликација уште во март минатата година, сепак патот нема да биде „мазен“.

Во септември 2022 година тикток-инфлуенсерката Кајли Катич објави видео во кое ја покажува својата камера „фуџифилм Х100В“ (Fujifilm X100V). „Баш ја пронајдов камерата што ќе ви го промени животот“, им порача таа на своите стотина илјади следбеници. Дури и две години подоцна не е можно да се набави таа камера.
  Фото: Шира Инбар за „Блумберг бизнисвик“

 

Покрај фактот што префрлањето на публиката е бавно и бара дополнителен ангажман, а и инвестиција, повеќето креатори што заработуваат пари на Тикток немаат толку развиени профили на другите мрежи. Доколку се потпираа само на Тикток во своите деловни стратегии, забраната за нив би можела да биде катастрофална бидејќи сопствениците на сметки ја губат можноста да се поврзат со својата публика. Платформата ја поседува нивната публика.

 

Исто така, секоја платформа има одредени специфичности што  не мора да одговараат на содржината и производите што се продаваат. Инстаграм, иако е еднакво заводлив или „зависен“, често фаворизира „аспиративна содржина“, еден вид елитизам, додека содржината на Тикток изгледа поискрено и „нефилтрирано“.

Во зависност од видот на содржината во која се „силни“, некои апликации ќе можат да послужат како алтернатива на Тикток, но само делумно. Една од можностите е Снепчет (Snapchat), чии „Приказни“ (Stories) некогаш ја инспирираа „Мета“ да ја воведе функцијата на Инстаграм и на Фејсбук. Во 2023 година платформата имаше околу 692 милиони месечни активни корисници.

Се претпоставува дека Твич (Twitch), платформата во сопственост на „Амазон“ (Amazon), која е лидер во стримингот, ќе биде алтернатива за обожавателите  на Тикток лајв (TikTok Live).

Тука е и Клапер (Clapper), апликација слична на Тикток, која цели на корисниците од генерацијата икс (Gen X) и милениумците. Првично се претстави како платформа за „слободно изразување“, но наскоро се префрли на фокусирање на заедницата.

Што вели „Малата црвена книга“?

Како што се приближува потенцијалната забрана, значителен број корисници на Тикток се пренасочуваат кон алтернативната кинеска платформа Шјиаохонгшу (Xiaohongshu), позната и како Редноут (RedNote).

Првично беше создадена како платформа за препораки за купување и стил на живеење, а со текот на времето еволуира во раскошен систем од кратки видеа, прегледи од корисници и директна продажба.

Таа е особено популарна поради содржината фокусирана на модата, убавината, патувањата и секојдневната инспирација, што ја прави привлечна и за креаторите и за клиентите. Според многумина, Редноут претставува ново природно прибежиште за креаторите и корисниците на содржини и често се опишува како мешавина од Инстаграм, Пинтерест (Pinterest) и Тикток, нудејќи естетски приспособен ѕид што ги инспирира корисниците.
 

 

Сепак, како што пишува мојот колега Фазлиќ за „Блумберг Адрија-технологија“, иронично е што главната причина за блокирањето на Тикток во САД беше преносот на лични податоци во Кина, а сега повеќе од половина милион Американци, кои го презедоа Редноут, ги споделија своите податоци директно без размислување.
За разлика од Тикток, Редноут не подлежи на никакви ветувања за заштита на податоците.

Потоа, тука е и прашањето за цензура. На гореспоменатата група, корисниците на „Тикток бегалци“ разговараа како да „играат според правилата“ за да се избегнат забраните, пишува „Њујорк тајмс“ (New York Times). Притоа, премолчувајќи, тие ја нормализираа самоцензурата како тактика за преживување.

„Помладата сестра“ на Тикток

Лемон8 (Lemon8), апликација што исто така е во сопственост на „Бајтденс“, е помалку позната, но интересна платформа за љубителите на содржината на животниот стил. Оваа апликација им овозможува на корисниците да споделуваат фотографии кратки видеа, но за разлика од Тикток, таа ги нагласува визуелната естетика и фотографијата.

Таа се опишува како мешавина од Инстаграм и Пинтерест, благодарение на нејзиниот акцент на инспиративни фотографии, но и на кратки видеоформати. Платформата се фокусира на содржини за животниот стил, како што се модата, убавината, патувањата, уредувањето на домот и рецептите, привлекувајќи публика што сака естетски привлечни содржини.

Клучно за тие што предвидуваат дека оваа платформа ќе биде наследник или близок роднина на Тикток е тоа што Лемон8 користи некоја функционалност што потсетува на Тикток, како што се алгоритми што откриваат персонализирана содржина за секој корисник.

Иако моментално има помала база на корисници во споредба со Тикток и Редноут, Лемон8 има потенцијал да стане клучен играч во сегментот на животниот стил на социјалните мрежи. Само од декември минатата година бројот на преземени содржини скокнал за 190 проценти, достигнувајќи околу 3,4 милиони.

За корисниците и креаторите што сакаат да се оддалечат од мејнстримот, постојат помалку познати апликации како Трилер (Triller), популарна за музички видеа, и Зигазу (Zigazoo), дизајнирана со детски производи.

И додека чекаме да видиме што ќе се случи со Тикток, некои креатори успешно го користат моментот за со темата „каде да се оди по забраната“ да привлечат публика на алтернативните мрежи.