Ѕвезда од генерацијата зед зборува за поврзување на брендовите и публиката

Тој е Џош Ричардс и неговата супермоќ е што знае како да комуницира со генерацијата зед (Gen Z). Овој 23-годишен канадски инфлуенсер стекна глобална популарност, како и завидна деловна кариера благодарение на неговиот уникатен стил.

Тој има 25,5 милиони следбеници само на Тикток (TikTok), како и уште милиони други на Инстаграм (Instagram) и на Јутјуб (YouTube). Гледањето на светот низ перспектива на дваесетгодишник се претвори во брзорастечка деловна империја. Тој внимателно ги следи брендовите што го интересираат или со кои е поврзан, а потоа активно ги бара, наместо да чека работната понуда да дојде до него.

 

 

Еден од неговите најважни моменти беше поврзувањето со Дејв Портној, основач на „Барстул спортс“ (Barstool Sports). Тоа што започна како расправија се претвори во заедничко водење поткаст наречен „БФФс“ (BFFs), во кој Ричардс и Бријана (Чикенфрај-Chickenfry) ЛаПаља на постариот Портној му го објаснуваат светот од перспектива на генерацијата зед.

Кога сака да привлече нечие внимание, да речеме некој што нема поим кој е тој, Ричардс едноставно праќа е-пошта, без да бара посредници. Еден од тие „ладни“ мејлови бил испратен до продуцентската куќа на Марк Волберг.

„Мислам дека луѓето навистина ја потценуваат вредноста на ладната е-пошта“, рече Ричардс во последната епизода од поткастот „Дил“ (The Deal) со Алекс Родригез и Џејсон Кели. Тој сигурно знае како да воспостави врска.

Еден од соработниците на актерот кај Ричардс препозна слични квалитети како на Волберг, кои му помогнаа да успее преку филмски, телевизиски и деловни потфати, вклучувајќи ресторани и фитнес. Ричардс и Волберг на крајот се сретнаа, а Волберг беше клучен во помагањето Ричардс да ја лансира неговата продукциска компанија „Кросчек студиос“ (CrossCheck Studios).

Ричардс сега има ексклузивен договор со „Амазон“ (Amazon) за нови проекти и соработува со брендови како што се „Т-мобајл“ (T-Mobile) и „Целзиус енерџи дринкс“ (Celsius Energy Drinks). Тој исто така е силно заинтересиран за светот на спортот и се консултирал со Националната хокеарска лига (НХЛ) за стратегија за доведување нови навивачи.