Француски фудбалски клуб се продава за само едно евро

Францускиот фудбалски клуб Ајачио (AC Ajaccio), со седиште на медитеранскиот остров Корзика, игра во истата лига како тимовите во сопственост на милијардерот Арно и фудбалската суперѕвезда Килијан Мбапе. Пред само две години играше со ПСЖ на Лео Меси.

Сега се продава за само едно евро. Ама, има улов. Советникот на клубот Џордан Матијас од „ЦММ партнерс“ (CMM Partners) вели дека ќе прима понуди само од купувачи што можат да го преземат долгот на клубот, кој изнесува околу осум милиони евра.

Второлигашот Ајачио е основан околу 1910 година, а во 1967 година станал првиот корзикански клуб што играл во првата лига на Франција. Но трофеите се малобројни.

Како и многу француски клубови, Ајачио има финансиски проблеми. Во декември финансискиот надзорник на клубот му изрече превентивно испаѓање на крајот на сезоната доколку не ги среди проблемите со финансиите, како и забрана за регрутирање играчи.

Француските фудбалски клубови ги мачат ниските приходи од ТВ-правата, што е главен извор на приходи за европските тимови. Годинашниот договор за пренос беше вреден околу половина од тоа што на клубовите им беше кажано дека може да очекуваат. Ајачио исто така претрпе загуба од голем спонзорски договор.
Претставникот на Ајачио не одговори на барањата за коментар.

Depositphotos

Во последните децении Ајачио играше и во елитната и во втората лига. Клубот е во сопственост на локалната холдинг-компанија „Ајачио империјал“ (Ajaccio Imperial Corse Investissement), со која претседаваше корзиканскиот политичар Ален Орсони.

Двата главни клуба од Корзика многу страдаат. Покрај Ајачио, и Бастија (SC Bastia) во ноември беше погодена од слични санкции од финансискиот надзорник. Сепак, маките на помалите европски тимови не ги одвратија американските инвеститори.

Американскиот инвеститор Глен Штрауб од Палм Бич, Флорида, е заинтересиран за можно преземање на клубот, изјави неговиот советник Хозе Ламбие. Штрауб утре треба да го гледа натпреварот на тимот против Ен Авант Гингамп (En Avant Guingamp).

Седумдесет и осумгодишниот Штрауб ја започна својата кариера со преземање на такси-компанијата на неговиот татко. Тој е поврзан и со компанијата што го води изборот за убавина „Мис Америка“ (Miss America), која во ноември поднесе барање за банкрот.

Ламбие вели дека Штрауб сака да купува имоти кога се во финансиски проблеми и веќе некое време барал да купи некој клуб во Европа. Тој неодамна бил во преговори за евентуално купување на белгиски Стандард де Лиеж (Standard de Liege).

„Луѓето што  се поврзани со фудбалскиот клуб Ајачио нѐ пречекаа на аеродромот. Се чини дека се среќни што некој им обрнува внимание“, вели Ламбие.

 

Во моментов нема коментари за веста. Биди прв да коментира...

Остави коментар