Манчестер сити потроши најмногу, најскапиот играч отиде во Саудиска Арабија

Англиската Премиер-лига со дефицит од 330 милиони евра доминираше во трошењето во штотуку завршениот преоден рок, но тоа не е изненадување. Глобалните трендови вклучуваат избегнување скапи трансфери и фокусирање на млади таленти и слободни играчи.

Јасно е дека оваа сезона е пресвртница за европскиот пазар на фудбалски трансфери. За првпат во постпандемиската ера вкупната потрошувачка опаѓа. Иако има пад од околу девет отсто во однос на минатата сезона, сепак пазарот останува на високо ниво.

 

 

Најголем дефицит, очекувано, направија Англичаните, со минус од над 330 милиони евра. Под линијата се уште и Бундеслигата и Серија А. Повеќе продадоа Шпанците и Французите, каде што беше особено забележлив трендот на неколку најголеми клуба да го контролираат поголемиот дел од трошоците. Во шпанската Ла лига и француската Лига 1 повеќе од 35 отсто од трошоците за трансфери им отпаѓаат само на два клуба.

Кои се рекордерите?

Од клубовите, најмногу потроши секако тој што е во најголема криза - Манчестер сити. Граѓаните за засилувања одвоија неверојатни 218 милиони евра, што лесно може да биде зимски рекорд на сите времиња. За еден играч најмногу издвои саудиски Ал-Наср. Клубот ѝ плати 77 милиони евра на Астон Вила за Џон Дуран.

 

 

Оливер Кан, фудбалската легенда и поранешен директор на Баерн Минхен, во својата анализа забележува дека клубовите почнуваат да избегнуваат блокбастер трансфери, бидејќи две третини од играчите донесени за повеќе од 75 милиони евра брзо ја губат вредноста. Тука особено се издвојуваат Жоао Феликс и Џек Грилиш, бидејќи дарежливите инвестиции во големите ѕвезди брзо станаа непрофитабилни.

Како изгледа одржливоста во фудбалот?

„Со растечките финансиски притисоци, клубовите сè повеќе се потпираат на млади таленти како долгорочна инвестиција. Сезонава, за првпат, 13 проценти од вкупните трошоци за трансфери беа инвестирани во играчи помлади од 19 години“, забележува Кан. Во исто време значење добиваат бесплатните трансфери. Килијан Мбапе е пример за тоа како врвните играчи дозволуваат да им истечат договорите за да обезбедат високи бонуси и подобри плати.

Трансфер-пазарот се менува - одржливоста, стратегијата и финансиската дисциплина стануваат сè поважни, смета Кан. Клубовите мора да се приспособат за да останат конкурентни – преку паметни инвестиции во млади таленти или бесплатни трансфери на врвни играчи, што може да си го дозволат само најголемите клубови.