Нė очекува година на тектонски поместувања во спортот, фудбалот е особено на удар

Непарните години во спортот обично се помалку интересни од парните, но 2025 година може да биде сосема поинаква. Иако не нѐ очекуваат Олимписки игри, светски или европски турнири на фудбалски репрезентации, сепак пред нас е година во спортот што може да донесе целосна неизвесност. Овој пат фокусот не мора нужно да биде на тревникот, туку во ложите и конференциските сали на стадионите и спортските институции.

На крајот на 2024 година од некој мрачен агол на фудбалскиот свет, барем така гледаат навивачите и традиционалистите, одеднаш се појави Суперлигата. Само наивните веруваа дека оваа идеја е закопана во 2021 година и дека никогаш повеќе нема да ја видиме. Проблемот сè уште постои - најголемите клубови, како Реал Мадрид или Барселона, се свесни дека се најголемиот капитал на овој спорт и дека некои како што тие ги дефинираат застарени здруженија на граѓани како ФИФА и УЕФА само им пречат.

Што е со ФИБА за НБА? Апсолутно не е надредена и во најдобар случај е само партнер, а најчесто несакан роднина. Американскиот професионален спорт е модел за сите што спортот го гледаат како работа и таму лигите се организации на сопствениците на клубови. Европските спортови сè уште гледаат на Америка со завист и желба да копираат сѐ на Стариот Континент. Таа желба би можела да експлодира токму во 2025 година.

Унифај-лига (Unify League): Главна приказна во 2025 година

Горенаведената Суперлига се појави ребрендирана во Унифај-лига со ревидиран предлог, кој вклучува 96 клуба распоредени во четири лиги врз основа на заслуги, наместо загарантирано место за основачите, како што се предлагаше пред четири години.

Претседателот на Реал Мадрид, Флорентино Перез, е најмоќниот опозиционер на организациите ФИФА и УЕФА Bloomberg

Организаторите предводени од „А22 спортс менаџмент“ (A22 Sports Management) и претседателот на Реал Мадрид, Флорентино Перез, официјално побараа одобрение за лигата од УЕФА и од ФИФА, верувајќи дека сега ќе ја добијат неопходната поддршка откако неодамна Европскиот суд на правдата донесе одлука со која го оспори монополот на УЕФА и ФИФА. Овој пат предлогот е формиран поинаку, а Перез најчесто реализира сѐ што ќе замисли.

Од друга страна, ФИФА е фабрика за пари и, се разбира, никогаш не се заситува. Во 2025 година првпат ќе го гледаме Светското клупско фудбалско првенство од 15 јуни до 13 јули во САД. Форматот на шампионатот е пресликан од форматот на државите, а околу самото првенство треба да се свртат неверојатни пет милијарди долари.

Светското клупско првенство е нова фабрика за пари

За наградниот фонд ќе се одвои половина од таа сума. За споредба, целиот награден фонд од последното Светско првенство во Катар изнесуваше 440 милиони долари. Секоја од 32-те екипи треба да добие по 50 милиони долари само за учество, додека уште 100 милиони долари се резервирани за победникот. Наводно, сите поголеми клубови добиле неофицијално ветување од ФИФА дека од учеството на турнирот во просек треба да заработат вкупно 80 милиони долари.

Новото натпреварување ќе значи дополнително зголемување на бројот на натпревари, што одново ќе ја потенцира најслабата точка на модерниот фудбал. Еден играч од тимот што ќе го игра финалето на тој турнир може во сезоната 2024/2025 да има вкупно неверојатни 90 одиграни натпревари. Уште се свежи сеќавањата на времето кога бројката од 60 одиграни натпревари беше проблематична. 

Ново натпреварување во и онака пренатрупаниот календар FIFA

Неизвесно е и како ќе изгледа сето тоа и каде се границите на физичките капацитети на врвните играчи, на кои најмалку се мисли кога се планираат нови формати, натпревари и лиги. Некој нов случај како со Кристијан Ериксен и зголемен ризик од срцев удар на големата фудбалска сцена пред аудиториум од милијарда гледачи не е нешто што му треба на фудбалот, без разлика колку пари може да се свртат во некое ново натпреварување.

ВНБА е во подем

Од другите работи што вреди да се имаат предвид е развојот на женскиот спорт, особено на кошарката и фудбалот. Фудбалерките ќе го играат Европското првенство во Швајцарија, а кај кошарката најголемата приказна е во ВНБА. Женската професионална кошаркарска лига е во историска фаза на раст, станувајќи пример не само за женската кошарка туку и за женскиот спорт во целина. Перспективите се светли, а интересот на навивачите и инвестициите сигурно ќе продолжат да растат.

Во 2024 година ВНБА потпиша нов медиумски договор вреден приближно 2,2 милијарди долари во текот на 11 години, што годишно ќе носи по околу 200 милиони долари. Сето тоа беше поттикнато од неверојатниот раст на популарноста, што се илустрира со зголемување на гледаноста на нејзините содржини дури за 170 проценти во споредба со претходната година.

Нема развој на спортот без нови ѕвезди, а во женската кошарка тоа е Кејтлин Кларк. Кошаркарката на Индијана фивер е икона на револуцијата во женската кошарка и спортистка што треба да се следи со внимание во 2025 година.