Најголем Супербоул досега поради Трамп, реклама чини над осум милиони долари

Супербоул, кој несомнено е најголемиот годишен спортски настан во САД, а веројатно и во светот, поради Доналд Трамп би можел да биде уште поголем.

Имено, потврдено е дека Трамп овој викенд ќе дојде на Супербоулот и така ќе стане првиот актуелен претседател кој ќе присуствува на овој настан. Доаѓањето на Трамп фрла ново светло на организацијата од повеќе аспекти, особено безбедносниот, но на самиот натпревар му дава уште едно ниво на важност.

Во недела целото спортско внимание ќе биде насочено кон Њу Орлеанс, каде што во финалето на Националната фудбалска лига (НФЛ) ќе се сретнат екипите Канзас Сити Чифс и Филаделфија Иглс. Фудбалерите на Канзас Сити влегуваат во Супербоулот, како што Американците го нарекуваат финалето на НФЛ, со статус на фаворити, а на стадионот Цезарс Супердом во Њу Орлеанс ќе се борат за својата трета последователна шампионска титула.

Уште повозбудливи од самата игра на теренот се износите во позадината на 59. Супербоул. Цените на билетите за овогодинешниот спортски спектакл неочекувано паднаа - најевтините билети чинат приближно 37 проценти помалку од лани. Според податоците на компанијата „Тик пик“ (TickPick), просечната цена се движи околу 7.388 долари, а главната причина за падот на цените лежи во локацијата, бидејќи минатогодишното финале првпат беше одиграно во Лас Вегас, наведува „Блумберг“ (Bloomberg).

На стадионот Цезар Супердом во Њу Орлеанс во недела нема да се натпреваруваат само тимовите од Канзас Сити и Филаделфија Иглс за шампионската титула, туку и бројни огласувачи ќе се борат за вниманието на потрошувачите, за што оваа година ќе мора да издвојат вртоглави суми.

И покрај падот на цените на билетите, цените на ТВ рекламите достигнаа нови рекорди за време на овогодинешниот Супербоул. Огласувачите мораа да издвојат дури осум милиони долари за секој од 10-те најскапи рекламни спотови од 30 секунди, што е за милион долари повеќе од минатата година. Тоа значи дека цената на емитување на една секунда реклама изнесува приближно 266 илјади долари.

Стручњакот за комуникации, Денис Манцевиќ предупредува дека не постои ниту една причина поради која цените на рекламите не би продолжиле да растат и оваа година. „Американската економија одлично стои, берзанските индекси во голема мера го поздравија враќањето на Доналд Трамп, додека најголемите американски мултинационални компании имаат високи очекувања од најавената дерегулација“, истакнува Манцевиќ и додава дека поголемите маркетинг буџети за време на Супербоул не треба да изненадуваат.

Рај за огласување

Според мислењето на стручњакот Манцевиќ, постојат најмалку две причини за толку високите цени на рекламите. „Првата е директно поврзана со гледаноста, бидејќи станува збор за настан кој привлекува повеќе од сто милиони гледачи, при што повеќето од нив доаѓаат од САД, и понатаму најголемиот пазар по куповна моќ. Втората причина е поврзана со угледот и симболичкото значење на Супербоул како најомилениот американски бренд, преку кој огласувачите остваруваат и друга маркетинг цел - за рекламите се зборува по натпреварот, а некои од нив добиваат и култен статус.“

Томаж Амброжиќ, директор на „Спорт Медиа Фокус“, наведува дека цената на ТВ рекламите ја дефинираат опсегот на емитување на рекламната порака и реномето на програмата. „Овие два фактора се на највисоко ниво кога станува збор за Супербоул, бидејќи се работи за најгледаната програма во САД, која секоја година собира најмалку 110 милиони гледачи пред ТВ екраните“.

Флоријан Роперт, директор на маркетинг во агенцијата „Спонтанцо“, истакнува дека Супербоул е најважното годишно натпреварување во најпопуларниот спорт во САД. „Благодарение на повеќегодишното иновативно огласување на брендовите, се разви и посебен феномен.“

Зголемената популарност на НФЛ делумно може да се припише на пејачката Тејлор Свифт, која е во романтична врска со ѕвездата на Канзас Сити, Тревис Келс Извор: Taylor Swift website

Телевизијата Си-би-ес (CBS) од продажбата на рекламниот простор за време на минатогодишниот Супербоул оствари приход од помалку од 700 милиони долари, додека буџетите за продукција на ТВ рекламите во некои случаи надминаа и неколку милиони долари. Оваа година, правата за пренос на Супербоул и припаѓаат на телевизијата „Фокс“ (Fox).

Минатогодишниот спортски спектакл достигна рекорден број гледачи - 123,4 милиони - што некои спортски коментатори го припишуваат на порастот на навивачите надвор од северноамериканскиот пазар и љубителите на пејачката Тејлор Свифт, која е во емотивна врска со ѕвездата на Канзас Сити, Трeвис Келс. За таканаречениот „ефект на Тејлор Свифт“ врз НФЛ лигата веќе пишувавме минатата година, а како интересен факт ќе истакнеме дека поп суперѕвездата минатата сезона оствари дополнителна вредност од 331,5 милиони долари за брендот на тимот Канзас Сити Чифс и НФЛ лигата, и во светот на американскиот фудбал донесе нови обожаватели, пред сè жени и девојки.

 

Кој ќе се рекламира оваа година

Извонредната привлечност на Супербоул за американските рекламни пазари се заснова на зачудувачкото внимание на телевизиската публика. Неодамнешно истражување на францускиот институт „Ипсос“ покажа дека дури 78 проценти од гледачите на Супербоул ги гледаат рекламите. Уште поизненадувачки е податокот дека 11 проценти од гледачите го следат Супербоул исклучиво поради рекламите, наведува АС (AS).

Меѓу „тешкашите“ на неделното финале на НФЛ лигата ќе се рекламираат „Пепси“, најголемата светска пиварска индустрија „Анхојсер“ (Anheuser-Busch InBev), фармацевтската компанија „Новартис“ (Novartis), германскиот „Бош“ (Bosch), платформата „Букинг“ (Booking.com), „Скверспејс“ (Squarespace) и автомобилскиот гигант „Стелантис“, известува „Форбс“.

Bloomberg Mercury

Минатогодишниот Супербоул донесе пресвртница, бидејќи беше прекинат повеќегодишниот тренд на рекламирање на компании од областа на вештачката интелигенција и криптовалутите. На 58. Супербоул се рекламираа пред сè етаблирани брендови, што ќе биде случај и оваа година.

Додека претходните Супербоул натпревари поради изобилството реклами за крипто заработија прекари како „Криптобоул“, извршниот потпретседател за продажба на „Фокс спортс“ (Fox Sports), Марк Еванс, за „Блумберг“ изјави дека оваа година нема да биде така, иако гледачите „ќе видат нешто повеќе реклами за вештачка интелигенција, бидејќи таа сигурно го менува секојдневието на сите нас“.

Меѓу огласувачите кои вреди да се следат, Манцевиќ ги истакнува секторите кои се во фокусот на политиката на новата администрација, како што се енергетиката, нафтено-гасниот сектор, криптовалутите, дигиталните платформи и вештачката интелигенција. „Ќе биде интересно да се следи дали на најголемите огласувачи од сегментот на стоки за широка потрошувачка или криптовалути оваа година ќе им се придружи уште некој од 'старата економија', која со доаѓањето на Трамп во САД добива нов замав. Таков пример би можел да биде автомобилскиот сектор – не само 'Тесла' на Илон Маск, туку и старите автомобилски великани како 'Форд' и 'Џенерал Моторс'“.

Неоспорен победник на Супербоул - обложувалниците

Оваа година рекорден број американски сојузни држави на граѓаните им овозможуваат законити спортски облози. Поради ублажувањето на законодавната рамка, Американската асоцијација за обложувалници (AGA) очекува дека вкупниот износ на спортските облози на неделниот спектакл ќе надмине 1,39 милијарди долари.

„Ниту еден поединечен настан не ги обединува љубителите на спортот како Супербоул“, изјави пред финалето претседателот и извршен директор на AGA, Бил Милер. Оваа сума претставува пораст во однос на проценетите 1,25 милијарди долари вложени во законито обложување на минатогодишниот Супербоул, извести неодамна ЕСПН (ESPN).