Саудиска Арабија сака да стане нова дестинација за НФЛ

Откако американската НФЛ (National Football League) го прошири своето присуство на европските и јужноамериканските пазари, следниот чекор би можел да биде Блискиот Исток.

Турки Алалших, кој управува со спортски и забавни проекти во кралството, најави дека Саудиска Арабија сака да биде домаќин на натпревар во американски фудбал во рамките на НФЛ. Тој потсети дека лигата во последните години редовно организира натпревари од регуларната сезона во различни земји.

„Велика Британија доби шанса, Бразил доби шанса. Се надевам дека Саудиска Арабија ќе биде следната“, изјави Алалших во четвртокот на конференцијата „Џој форум“ (Joy Forum) во Ријад.

Саудиското кралско семејство во последните години интензивно инвестира во спортот, обидувајќи се земјата да ја позиционира како светски центар на големи спортски настани. Како доказ за тој напредок, Алалших истакна дека Саудиска Арабија во 2027 година ќе биде домаќин на „Вреслманија“ (WrestleMania) - првпат овој спектакл ќе се одржи надвор од Северна Америка.

Критичарите предупредуваат дека вложувањата во спортот се користат како начин за ублажување на меѓународниот притисок поради лошата состојба на човековите права во земјата.

НФЛ засега не даде коментар за барањето.

Лигата во последните години гради база на навивачи во странство преку маркетинг-кампањи и турнири во флег (flag) фудбал. Во март компанијата „Фанатикс“ (Fanatics Inc.), лиценцниот партнер на НФЛ, ќе организира флег-турнир во Саудиска Арабија, на кој треба да учествуваат легендарниот Том Брејди и ѕвездата на Филаделфија иглс (Philadelphia Eagles), Сакуон Баркли.

НФЛ исто така води глобална програма што им овозможува на клубовите да ги развиваат своите бази на навивачи на странските пазари. Во моментов се активни во околу 20 земји, вклучувајќи ги Нигерија, Ирска и Јужна Кореја, додека Саудиска Арабија, според податоците на лигата, сè уште не е вклучена во програмата.