Создавањето нови пријателства чини многу, но вреди

За осаменоста и социјалната изолација сė почесто се дискутира, исто како за проблемите што произлегуваат од процесот на стареење. Возрасните деца се оддалечуваат, сопружниците и пријателите почнуваат да умираат и постарите луѓе одеднаш може да се затекнат себеси како поминуваат премногу време сами. Чувството на изолација може да има тешки последици за благосостојбата. Истражувањата покажуваат дека социјалната изолација ги зголемува шансите за развој на хипертензија и деменција, па дури и го скратува животниот век.

Но старата популација не е единствената што е изложена на висок ризик од осаменост. Младите Американци на возраст од 15 до 24 години поминуваат дури 70 проценти помалку време лично со пријателите отколку истата возрасна група од пред две децении, што е еден од многуте алармантни наоди од извештајот на американскиот главен хирург Вивек Мурти, кој предупредува на сė поголемата осаменост во САД.

Depositphotos

Оваа генерација зед (Gen Z), луѓето родени во периодот меѓу 1995 и 2010 година, односно во ерата на дигитализацијата, израсна во комуникација на паметни телефони и веќе покажуваше знаци на намалени интеракции лице в лице уште пред пандемијата на ковид. До моментот кога пандемијата исчезна многу луѓе веќе ја напуштија навиката да се среќаваат и се чувствуваа задоволно со можностите за одржување врски во дигиталниот свет.

Да се поминува време во лично присуство со некого е од витално значење, се наведува во извештајот на хирургот. Тоа бара посветеност: време, енергија и, неизбежно, пари, без разлика дали станува збор за средба со пијалак или оброк надвор, забава или други заеднички искуства.

Сепак, пријателите може да имаат различни вредности за тоа како да ги трошат своите пари, особено кога во зрелоста ќе завршат на сосема различни финансиски позиции. (Напомена за финансиски стабилните: бидете чувствителни на буџетските потреби на вашите пријатели. Ако почувствувате дека некој избегнува да се сретне со вас за да заштеди пари, предложете евтина или бесплатна опција за средба.)

Трошењето пари, дури и скромни суми за негување на постојните односи и склучување нови пријателства, е важно за грижата за себе и личниот развој. Тоа треба да го прифатите како инвестиција во заедница, која ќе расте низ животните фази. Освен тоа, пријателите можат да се поврзат во области на интерес како што не може да биде случај со романтичните партнери, децата и семејствата. Фамилијата не треба да биде нашиот единствен фокус за социјализација. А, не треба ни интернетот.

Ангажирањето со пријателите и онлајн заедниците може да биде начин за создавање вистински врски, но тоа не е исто како и другарството лице в лице. Ако дигиталната верзија на поврзувањето е задоволувачка и значајна како интеракциите во лице, тогаш генерацијата зед ќе биде најмалку изолираната група.

Depositphotos

Сепак, не е лесно да се воспостават нови платонски врски во зрелоста. Постојат емоционални ризици во врска со ранливоста и начинот како да се допре до луѓето.

Финансиските притисоци ја отежнуваат ситуацијата. Околу 63 проценти од возрасните што заработуваат помалку од 50.000 долари годишно се сметаат за осамени, според извештајот на хирургот. За споредба, осамени се 53 отсто од возрасните што заработуваат повеќе од 50.000 долари на годишно ниво. Парите нема да ја решат осаменоста, но им овозможуваат на луѓето да инвестираат во активности што помагаат да се изградат пријателства.

Стравот од непријатна ситуација во комбинација со потенцијалните трошоци за запознавање нови пријатели може да ги задржи луѓето врзани за нивните уреди. Социјалните медиуми и другите онлајн форуми обезбедуваат чувство на заедништво и, секако, обезбедуваат здружување врз основа на секоја можна област на интерес.

Нема ништо лошо во тоа да најдете пријатели на овој начин. Само одвреме-навреме среќавајте се лично, дури и ако тоа значи да го отворите вашиот паричник за да се изборите со изолацијата и осаменоста.