Тикток продолжува да создава проблеми и покрај скандалите и милионските казни

Пресудата на федералниот апелационен суд во петокот потврди дека забраната на Тикток е поверојатно да се случи во САД отколку да не се случи.

Тоа треба да биде повик за будење за милиони корисници на апликацијата, особено тие кои изградиле кариера со помош на оваа платформа. До денес тие личности останаа смирени и продолжија да функционираат на социјалната платформа, колективно негирајќи дека некогаш воопшто ќе дојде денот кога нема да можат да се најават на својот профил. Се планира тој ден да биде 19 јануари, денот пред инаугурацијата на новоизбраниот претседател Доналд Трамп за неговиот втор мандат.

Истражувањата во САД покажуваат дека поддршката за забраната на Тикток значително опаднала откако за прв пат беше ставено ова прашање на маса во 2023 година. Причината е што тоа би се покажало особено непопуларно меѓу гласачкиот блок од генерацијата зед (Gen Z), блокот што всушност е заслужен за помагањето на Трамп да го најде патот назад до Белата куќа. А, сега една од неговите први значајни одлуки може да биде да го разочара тој блок гласачи.

Тикток планира да поднесе жалба до Врховниот суд и во соопштението во петокот се истакнува дека челниците на платформата се уверени дека судиите ќе го следат нивниот воспоставен историски рекорд за заштита на правата на Американците за слобода на говор.

Некои правни аналитичари не се согласуваат, сметајќи дека ако воопшто го преземе случајот Врховниот суд, кој инаку е наклонет кон конзервативците, е поверојатно дека ќе се согласи со едногласната пресуда од апелациониот суд во Вашингтон, според кој грижите за националната безбедност, колку и да се хипотетички, ги надминуваат аргументите за слобода на говор. Судот заклучи дека опцијата за одземање значи дека Тикток има пат што овозможува непречено делување на апликацијата. (Тикток тврди дека продавањето е невозможно. Судот рече дека тоа е вина на Кина бидејќи го блокираше извозот на познатиот алгоритам на Тикток.)

Bloomberg Mercury

 

Сепак, Тикток може барем да го паузира часовникот. Се очекува да побара од Врховниот суд да се одложи тој јануарски рок, туркајќи ја работата за администрацијата на Трамп. Друго сценарио за забавување, според професорот на Правниот факултет во Корнел, Џејмс Гримелман, би било Конгресот, кој инаку треба да положи заклетва на 3 јануари (тоа е пред примопредавањето на претседателската функција и пред денот кога стапува на сила забраната за Тикток), да го продолжи рокот.

„Сосема е можно тој да добие задолжение од републиканците, кои ќе ги контролираат двата дома, да обезбедат продолжување од неколку месеци за потоа Трамп да може да донесе одлука кога ќе биде потребно“, рече Гримелман.

И што тогаш? Вајлд-карта е самиот Трамп, чии ставови за Тикток се карактеристично неконзистентни. Неговото моментална размислување околу забраната е нејасно. Отпрвин, неговото противење на Тикток беше жестоко. Во август 2020 година тој потпиша извршна наредба со која се принудува продавање на Тикток во рок од 45 дена, при што „Мајкрософт“ (Microsoft Corp.) и „Оракл“ (Oracle Corp.) се појавија како потенцијални купувачи. Се шпекулираше дека противењето на Трамп на апликацијата делумно произлегува од неговото откритие дека нејзините корисници го исмејуваат и се заслужни за попречување на неговите митинзи. Прелиминарната наредба на крајот ги стопираше сите присилни промени.

До 2024 година, додека Конгресот повторно расправаше за забраната на Тикток, Трамп нагло ја промени својата траекторија. Тој за „Си-ен-би-си“ (CNBC) изјави: „Има многу добро и има многу лошо со Тикток, но она што не ми се допаѓа е дека без Тикток ќе го направите Фејсбук поголем, а јас го сметам Фејсбук за непријател на народот, заедно со многу медиуми“.

Што се смени? Тешко е да се одреди само еден фактор. Можеби се сеќавате, Фејсбук го забрани Трамп по бунтот на 6 јануари во Капитол, исто како и Твитер. Трамп можеби забележал и дека поддршката на Бајден за забраната на Тикток била длабоко непопуларна кај помладите гласачи, при што некои ја навеле дури и како причина да не гласаат за него. Згора на ова, аналитичките податоци покажуваат дека објавите на Тикток со поддржшка за Трамп значајно ги надминуваа тие со поддршка за Бајден (Камала Харис подоцна го намали јазот). Други истакнуваат дека милијардерот Џеф Јас, истакнат републикански донатор, е исто така значаен акционер во „Бајтденс“ (ByteDance Ltd.), компанијата која е сопственик на Тикток. Илон Маск, кој потроши 277 милиони долари за изборот на Трамп и стана еден од неговите најмоќни советници, исто така не се согласува со забраната за Тикток, велејќи дека тоа е спротивно на слободата на говорот.

Bloomberg Mercury

 

Откако се обиде да ја забрани платформата Тикток за време на својот прв претседателски мандат, работата со промената на ставовите на Трамп отиде дотаму што годинава, на 1 јуни, тој отвори и свој профил на Тикток и за само половина ден собра речиси половина милион следбеници.

Платформата Тикток има над 170 милиони корисници, а нејзин сопственик е компанијата „Бајтденс“, која е основана во 2012 година и е со седиште во Пекинг. Проблемот меѓу САД (подоцна и уште неколку европски држави) и Тикток е од безбедносен карактер. Имено, Белата куќа не сака социјалната мрежа да остане во кинеска сопственост бидејќи обвинува за споделување на податоците на американските корисници со кинеската влада. Тикток го негира тоа и тврди дека презела значителни мерки за заштита на приватноста на своите корисници.

Скандалозноста за Тикток стана секојдневие

Безбедноста и на национално и на приватно ниво е причината што Тикток е во постојана борба со властите во многу држави во Европа и Северна Америка. Уште пред година и пол Европската комисија им забрани на своите вработени да ја користат апликацијата и тоа не само на службените, туку и на личните уреди поради страв од можни ризици за личните и службените податоци. Со слични мерки настапија и Велика Британија и Канада.
Спорно е дали платформата е доволно транспарентна во врска со начинот на собирање, користење и откривање на личните информации, вклучително и тоа дали и колку компанијата ги почитува законите кога работи со помлади корисници. И тука особена загриженост има за влијанието што оваа платформа го има токму врз младите.

Милионски казни за Тикток

Пред нешто повеќе од една година Европската Унија го казни Тикток со 345 милиони евра поради тоа што платформата прекршила голем број закони за приватност на ЕУ во периодот меѓу јули и декември 2020 година. Европските закони за приватност биле прекршени во делот поврзан со обработката на личните податоци на децата во Европската унија, нешто што Тикток го негираше, иако подоцна соопшти дека дополнително ги ажурирал поставките за приватност за да се прави разлика меѓу јавните и приватните сметки и дека приватните сметка стануваат стандардни, односно „јавни“ за новите корисници на возраст од 16 до 17 години.

Пред половина година Италија го казни Тикток за содржини кои поттикнуваат самоповредување

Компанијата-сопственик на Тикток, „Бајтденс“, во март годинава беше казнет со 10 милиони евра (10,9 милиони долари) од италијанскиот орган за заштита на конкуренцијата, поради тоа што не ја заштитил безбедноста на децата и ранливите луѓе од опасната вирусна игра позната како „Френч скар челинџ“ (French scar challenge).
Италијанскиот антимонополски регулатор тогаш соопшти дека ирската, британската и италијанската филијала на Тикток не успеале да ги заштитат корисниците од таквите штетни игри. Конкретниот предизвик за којшто беше изречена казната подразбира стискање на образот доволно силно за да се остави модринка на јаболчната коска. Според регулаторите, овој вирусен предизвик ја загрозува „психофизичката безбедност на корисниците“.

„Ние не се согласуваме со оваа одлука. Оваа игра во просек имаше само по сто дневни пребарувања во Италија пред објавувањето минатата година, а ние одамна ја ограничивме видливоста на оваа содржина“, соопшти тогаш Тикток.

Опасниот Тикток предизвик „Супермен“ повреди многу деца и тинејџери ширум Европа

Најновиот опасен вирален предизвик на Тикток е т.н. игра „Супермен“, поради која што со повреди во болница завршија речиси 20 деца во нашата држава.  Ова е состојба која што сериозно кја тресе македонската јавност во последнава недела. Според тоа што го читаме на социјалните мрежи, ова е само официјална бројка, додена неофицијално има повеќе повредени деца и тинејџери, но веројатно со помали повреди поради што и не побарале лекарска помош. Најмалото дете на кое му е пружено лекарска помош има девет години, а дел од повредените имаат дури и скршеници.

Некои политички партии почнаа да повикуваат на забрана за користење на оваа платформа, што според експертите е многу сложено и тешко изводливо, дополнително што таквите содржини ќе пронајдат друг пат да стигнат до целната публика. Наместо тоа, социолозите упатуваат апели на голема ангажираност и едукација на децата и тинејџерите од страна на сите чинители во општеството со цел да се подигне свеста за опасностите и за тоа што треба да се прифаќа како содржина и предизвик во денешно време кога има безброј канали преку коишто се доаѓа до содржини од најразличен тип.

Македонија не е единствената земја со овој проблем. Повредени деца и тинејџери има и во Романија, Грција, Израел, Белгија, Италија и Франција.

За состојбите со Тикток во САД пишуваше Дејв Ли.

 

Во моментов нема коментари за веста. Биди прв да коментира...

Остави коментар