Италија го казни Тикток со 10 милиони евра за содржина со самоповредување

Сопственикот на Тикток, „Бајтденс“ (ByteDance Ltd.), е казнет со 10 милиони евра (10,9 милиони долари) од италијанскиот орган за заштита на конкуренцијата, поради тоа што не ја заштитил безбедноста на децата и ранливите луѓе од опасната вирусна игра позната како „Френч скар челинџ“ (French scar challenge).

Италијанскиот антимонополски регулатор во вторникот соопшти дека ирската, британската и италијанската филијала на Тикток не успеале да ги заштитат корисниците од таквите штетни игри. Инаку, конкретниот предизвик подразбира стискање на образот доволно силно за да се остави модринка на јаболчната коска. Според регулаторите, овој вирусен предизвик ја загрозува „психофизичката безбедност на корисниците“. 

Инаку, Тикток на „Бајтденс“ е под зголемен притисок во западниот свет. Претставничкиот дом на САД на 13 март усвои нацрт-закон со кој кинеската компанија што го поседува Тикток треба да ја продаде компанијата во Соединетите Американски Држави или да се соочи со забрана во земјата. Тоа е исто така предмет на формална истрага од регулаторите на Европската Унија, кои се плашат од ризици за младите од зависниот дизајн на Тикток и ограничувањата на времето поминато пред екранот, неговите поставки за приватност и процедурите за проверка на возраста. Таа истрага може да доведе до парична казна од дури 6 отсто од годишната продажба или потенцијална забрана.

„Ние не се согласуваме со оваа одлука. Оваа игра во просек имаше само по сто дневни пребарувања во Италија пред објавувањето минатата година, а ние одамна ја ограничивме видливоста на оваа содржина“, се наведува во соопштението на Тикток.

Во моментов нема коментари за веста. Биди прв да коментира...

Остави коментар