.webp){kind=icon}
Европската комисија започна формална процедура за да процени дали Тикток (TikTok) можеби го прекршил Законот за дигитални услуги во областите поврзани со заштитата на малолетниците, транспарентноста на рекламирањето, пристапот до податоци за истражувачите и управувањето со ризикот поврзан со дизајнот што предизвикува зависност и штетна содржина, соопштија од Европската комисија (ЕК).
„Врз основа на досега спроведената прелиминарна истрага, вклучувајќи ја и анализата на извештајот за процена на ризикот испратен од Тикток во септември 2023 година, како и одговорот на Тикток на официјалните барања на Комисијата за информации (за нелегална содржина, заштита на малолетници и пристап до податоци), Комисијата одлучи да поведе официјална постапка против Тикток во согласност со Законот за дигитални услуги“, се наведува во соопштението.
„Безбедноста и благосостојбата на интернет-корисниците во Европа се од критична важност. Тикток треба внимателно да ги разгледа услугите што ги нуди и ризиците што ги претставува за своите корисници - млади и стари. Комисијата сега ќе спроведе темелна истрага без да влијае на исходот“, рече извршната потпретседателка на Комисијата, Маргрет Вестагер, одговорна за подготвеноста на Европа за дигиталната ера.
Прочитај повеќе
Тикток не се согласува дека ја нарушил приватноста на тинејџерите во ЕУ
Тикток, платформата за споделување видеа во кинеска сопственост, возвраќа пред судовите.
18.10.2023
Холивуд не може да се бори со Тикток, но може да го искористи
Сопствениците на профили ги сечат филмовите и ТВ-емисиите на десетици сегменти и ги објавуваат.
01.10.2023
Монтана е првата држава во САД што воведува забрана за Тикток
Гувернерот на Монтана потпиша мерка со која Тикток ќе се забрани за јавноста од следната година.
18.05.2023
Британија забранува користење на Тикток на владини уреди
Забраната ќе важи за јавните функционери и службеници, посочува извор на „Блумберг“.
16.03.2023
„Заштитата на малолетниците е главен приоритет на Законот за дигитални услуги. Како платформа што допира до милиони деца и тинејџери, Тикток мора целосно да се придржува до Законот за дигитални услуги и има посебна улога во заштитата на малолетниците онлајн. Денеска започнуваме официјална постапка поради прекршување за да обезбедиме преземање мерки за заштита на физичката и емоционалната благосостојба на младите Европејци. Не смееме да штедиме напори кога станува збор за безбедноста на нашите деца“, рече Тиери Бретон, комесар за внатрешен пазар.
Со поведувањето формална постапка, Комисијата се овластува да преземе понатамошни чекори, како што се привремени мерки и одлуки за неусогласеност.
На 25 април 2023 година, Тикток беше назначен како многу голема онлајн платформа (VLOP) според Законот за дигитални услуги на ЕУ, откако соопшти дека има 135,9 милиони месечни активни корисници во ЕУ. Како VLOP, Тикток мораше да започне со исполнување низа обврски утврдени во Законот за дигитални услуги четири месеци откако беше вклучен во списокот.
