„Уникредит“ го зголемува уделот во „Генерали“ за да влијае врз можни зделки

Одлуката на „Уникредит“ (UniCredit SpA) да го зголеми својот удел во „Асикурациони Џенерали“ (Assicurazioni Generali SpA) има цел да ги поддржи своите комерцијални врски и да ја зајакне позицијата на банката во можни зделки што го вклучуваат осигурителот, а кои би ги иницирале други играчи, според лица запознаени со ситуацијата.

Овој потег ги поддржува тековните разговори за пошироки комерцијални договори меѓу извршниот директор на „Уникредит“, Андреа Орчел, и неговиот колега од „Генерали“, Филип Донe, изјавиле изворите кои побарале анонимност поради доверливоста на информациите.

Зголемувањето на уделот исто така има цел да испрати сигнал до трети страни кои би можеле да бидат заинтересирани за купување делови или дури на целата „Генерали“, дека „Уникредит“ би морал да биде земен предвид, навеле изворите.

Двајцата извршни директори одржале неколку состаноци во последните месеци за да разговараат за проширување на постојните партнерства во управување со средства, осигурување и други области, велат тие.

Партнерството со „Уникредит“ „функционира добро“, изјави Донe од „Генерали“ во март. Доколку има можност тоа да се прошири, „секако дека сме отворени за тоа“, додаде тој.

Претставници на „Уникредит“ и „Генерали“ одбија да коментираат.

„Уникредит“ во четвртокот објави дека го зголемил својот удел во „Генерали“ на речиси девет отсто, иако Орчел пред само неколку месеци рече дека планира да ја намали нето-изложеноста.

Овој потег доаѓа во услови на шпекулации во домашните и меѓународните медиуми за нов бран корпоративни зделки во италијанскиот финансиски сектор.

„Генерали“ има неколку големи инвеститори

Bloomberg

„Генерали“, кој моментно вреди околу 58 милијарди евра (68 милијарди долари), долго време е во центарот на различни обиди за склучување зделки, успешни и неуспешни, поради својата доминантна позиција во пензиското штедење и осигурувањето. Покрај „Уникредит“ (UniCredit), негови најголеми инвеститори се „Банка Монте деи Паски ди Сиена“ (Banca Monte dei Paschi di Siena SpA), семејството Дел Векио, градежниот тајкун Франческо Гаетано Калтаџироне и семејството Бенетон.

Во петокот „Фајненшл тајмс“ (Financial Times) објави дека извршниот директор на „Монте Паски“, Луиџи Ловаљо, разгледува продажба на уделот на банката во „Генерали“, при што „Уникредит“ и неговиот најголем ривал „Интеса Санпаоло“ (Intesa Sanpaolo SpA) се „преферирани купувачи“.

„Монте Паски“ го демантираше тоа, наведувајќи дека не разгледува продажба на уделот во осигурителната компанија.

Италијанскиот весник „Ла Стампа“ (La Stampa) минатата недела објави дека „Интеса“ и „Уникредит“ би биле единствените италијански инвеститори со доволна финансиска моќ евентуално да го купат уделот на „Паски“ во осигурителот.

Силната позиција на „Интеса“ на италијанскиот пазар на осигурување би отворила сложени антимонополски прашања, според дел од изворите. Од 2017 година, „Интеса“ го разви својот осигурителен бизнис, станувајќи најголем играч во Италија во сегментот на животно осигурување според технички резерви и еден од водечките играчи во сегментот на имотно и неживотно осигурување.

Претставник на „Интеса“ одби да коментира.

„Интеса“ разгледуваше, а потоа се откажа од понуда за преземање на „Генерали“ пред речиси една деценија. Извршниот директор Карло Месина, кој го предводеше тој обид, претходно годинава покажа дека нема интерес за секторот за управување со средства на „Генерали“.