Тикток се соочува со казна од над половина милијарда евра поради кршење на приватноста

Сопственикот на Тикток (TikTok), „Бајтденс“ (ByteDance Ltd.), ќе биде погоден со казна за кршење на приватноста од над 500 милиони евра (553 милиони американски долари) поради нелегално испраќање податоци на европските корисници во Кина, што дополнително ја зголемува глобалната реакција за апликацијата за споделување видеосодржини.

Ирската комисија за заштита на податоци, главниот регулатор на компанијата во Европа, ќе ја објави казната против Тикток пред крајот на месецот, според луѓе запознаени со ова прашање.

Потегот доаѓа откако долгата истрага покажа дека кинескиот бизнис ги прекршил правилата од Општата регулатива за заштита на податоците на Европската Унија со испраќање на информациите во Кина, со што овозможил пристап за инженерите, додадоа луѓето, кои зборуваа под услов да останат анонимни.

Казната веројатно ќе биде трета најголема досега изречена од страна на ирскиот регулатор по претходните казни од 746 милиони евра против „Амазон“ (Amazon.com Inc.) и 1,2 милијарда евра против сопственикот на Фејсбук (Facebook), „Мета платформс“ (Meta Platforms Inc.), додаваат изворите. Точната големина на казната за Тикток и времето на одлуката не се конечни и сепак може да се променат, велат тие.

Не беше можно веднаш да се контактира со Тикток за коментар. Ирската комисија за заштита на податоците одби да коментира. Одлуката може да биде обжалена од страна на Тикток пред ирските судови.

Како дел од одлуката на Комисијата за заштита на податоците на Ирска, регулаторот ќе нареди Тикток да ја прекине незаконската обработка на податоци во Кина во одредена временска рамка. Кина долго време го предизвикува гневот на активистите за заштита на приватноста, кои тврдат дека режимот за масовно следење на нацијата ги крши основните права.

Тикток и претходно беше на удар на ирската комисија за заштита на податоци. Во септември 2023 година социјалната платформа беше казнета со 345 милиони евра за наводни пропусти во начинот на кој се грижи за личните податоци на децата. Организацијата исто така алармираше и до големите технолошки компании што испраќаат лични податоци на европските граѓани надвор од 27-члениот блок, изрекувајќи рекордна казна од 1,2 милијарда евра против сопственикот на Фејсбук, „Мета платформс АД“, поради неуспехот да ги заштити личните информации од американските безбедносни служби.

Ирската истрага за Тикток започна во 2021 година, кога тогашната директорка на регулаторното тело Хелен Диксон, тврдеше дека до податоците на корисниците на ЕУ може да пристапат „инженери за одржување и вештачка интелигенција во Кина“.

Ирскиот надзорник надгледува многу од најголемите светски технолошки фирми, вклучувајќи ги и активностите на поголемиот дел од Силициумската Долина.