Илон Маск вели дека нема да го купи Тикток

 

Илон Маск изјави дека не е заинтересиран за купување на популарната социјална мрежа Тикток (TikTok), која САД се обидоа да ја забранат поради загриженост за националната безбедност во врска со нејзиниот кинески сопственик, компанијата „Бајтденс“ (ByteDance Ltd).

Тој го даде овој коментар – што инаку е неговата прва изјава за купување на Тикток – на минатомесечната конференција во Германија каде домаќин беше Матијас Депфнер, милијардер и генерален директор на германскиот медиумски конгломерат „Аксел Спрингер“ (Axel Springer).

„Не поднесов понуда за Тикток“, рече Маск, кој се приклучи на конференцијата од далечина, преку видео-врска, што беше објавено во саботата. „Немам никакви планови за тоа што би направил кога би го имал Тикток.“

Маск рече дека тој лично не користи Тикток.

„Не брзам да го купам Тикток“, наведе Маск, кој го купи Твитер (Twitter) во 2022 година, пред да ја преименува таа социјална мрежа во X. „Обично градиме компании од нула.“

 

 

„Блумберг њуз“ (Bloomberg News) во јануари извести дека кинеските официјални лица ја разгледуваат можноста најбогатиот човек на светот и близок сојузник на американскиот претседател Доналд Трамп да ги преземе американските операции на Тикток, ако компанијата не успее да се одбрани од забраната во таа земја. Едно од сценаријата би било X на Маск да ја преземе контролата над Тикток во САД и да почне да ги води тие бизниси заедно, рекоа за „Блумберг“ луѓе запознаени со ситуацијата.

Depositphotos

Трамп на првиот ден од својот мандат потпиша извршна наредба која привремено ја запре присилната продажба и затворањето на Тикток, давајќи ѝ на компанијата и на нејзината кинеска матична фирма повеќе време да постигнат договор. Наредбата следеше неколку часа по инаугурацијата на Трамп, на која присуствуваше и извршниот директор на „Бајтденс“, Шоу Чев.

Таквата одлука претставуваше најнов пресврт во повеќегодишните напори на Вашингтон да се забрани апликацијата поради загриженост за безбедноста. Трамп – кој се залагаше за забрана за време на својот прв мандат – се премисли откако апликацијата му помогна да придобие помлади гласачи на последните избори. „Ги освоивме гласовите на младите. Мислам дека тоа го освоив преку Тикток, така што Тикток ми е при срце“, рече тој.

Маск, како и Трамп, секогаш може да се премисли.

Bloomberg

Трамп изјави дека би бил отворен за тоа Маск (кој донираше повеќе од 250 милиони долари за неговата претседателска кампања) или претседателот на „Оркл“ (Oracle Corp.), Лари Елисон да ја купат апликацијата преку заедничко вложување со владата на САД. Оваа недела Трамп исто така потпиша посебна извршна наредба за која рече дека ќе им наложи на официјалните лица да создадат американски државен фонд кој би можел да се искористи за полесно спроведување на продажбата на Тикток.

„Бајтденс“ јавно одби да го продаде Тикток, иако потенцијалните купувачи рекоа дека се надеваат дека пресудата на американскиот Врховен суд во прилог на законот за национална безбедност (кој ја принудува компанијата или да го продаде или да го затвори сервисот во САД) би можела да ја натера да ја преиспита својата одлука. Исто така, можеби работите нема целосно да зависат од компанијата – кинеската влада исто така би морала да ја одобри секоја трансакција.