Можат ли да преживеат компаниите што заработуваат од микротрендови?

Трендот „Моб вајвс“ (Mob Wives) на Тикток значително влијае на зголемувањето на побарувачката за бунди кај помладата популација, пренесува „Бизнис оф фешн“ (Business of Fashion). Што е „Моб вајвс“: замислете го, на пример, стилот на Кендал Џенер вкрстен со естетиката на женските протагонистки на хит-серијата „Сопранови“, која сега слави 25-годишнина. Значи, златен накит во сериозни количества, крзно и кожа.

Последниве години на споменатите, но и на други социјални мрежи се пласираа и промовираа неколку естетики што многу брзо станаа тренд, како „ВСЦО грл“ (VSCO girl), „Костал грендма“ (Coastal Grandma), „Најт лукс“ (Night Luxe), „Клин грл“ (Clean Girl).

Многу стилови се нарекуваа и „кор“ (core), како што се „барбикор“ (Barbiecore) или „ферикор“ (Fairycore), бидејќи поради нивната популарност брзо влегоа во „кор“ односно како што кажува самото име - суштината. Микротрендовите, кои доживуваат пораст на популарноста, станаа клучни двигатели на промените во начинот на кој луѓето купуваат. Тие често се предизвик за луксузните брендови во модната и козметичката индустрија, кои мора да бидат во чекор со брзите промени за да создадат и испорачаат производи што ќе го доловат моментот на вирална популарност, што во случајот на луксузните брендови и производи, како што претходно објави „Блумберг Адрија“, не е брз процес и го вклучува токму дијаметрално спротивниот бизнис-модел. Макротрендовите обично траат помеѓу пет и десет години, додека микротрендовите, благодарение на хипервидливоста на социјалните мрежи, доаѓаат и си одат за помалку од една сезона.

Ова, пак, не е нужно лоша вест за сите актери во модната индустрија, бидејќи ја отвора вратата за профит на компаниите за брза мода. Да речеме, многумина ќе го видат трендот и ќе купуваат од страниците за брза мода по ниски цени за да видат дали и лажните бисери од „Шејн“ (Shein) лесно и брзо би се вклопиле во, да речеме, естетиката на „Најт лукс“ (Night Luxe).

На глобално ниво, „Шејн груп“ (Shein Group Ltd.) го предводеше овој бран на адаптација на микротрендот, трансформирајќи се од непозната кинеска страница за брза мода, основана во 2008 година, во гигант за малопродажба на интернет благодарение на снимките од облека што станаа вирални на Тикток. Нивната маркетинг-стратегија, која вклучува давање бесплатни производи за прегледување од инфлуенсерите, се покажа како исклучително успешна. Просечната цена на платена објава на Тикток во 2022 година била околу 2.741 долар, според извештајот за минатата година на фирмата за аналитика за маркетинг на инфлуенсери „Изеа“ (Izea), што е двојно и тројно од она на Фејсбук и Јутјуб.

Покрај агресивното инвестирање во маркетингот, бизнис-моделот на компанијата е доста едноставен: тие обично го тестираат пазарот со 100-200 парчиња облека. Тие го зголемуваат производството кај нивните доставувачи, главно во Кина, на оние што се покажуваат популарни. Тоа им овозможува брзо да реагираат на трендовите и евтините понуди. „Шејн“ тврди дека овој модел исто така им помага да го намалат отпадот - процентот на непродадени резерви е едноцифрен, во споредба со просекот во индустријата од околу 20 проценти. Тие сега ја прошируваат својата производствена база надвор од Кина, во Бразил, Мексико и Турција. Компанијата исто така постави широк спектар еколошки цели за да биде котирана на Лондонската берза, каде што ситуацијата е многу посложена во споредба со САД, бидејќи многу слични концепти („Бохо“ и „Фрејзер груп“) неодамна пропаднаа поради проблеми во еколошката (не)одржливост. Сепак, како што известува Андреа Фелстед во напис за „Блумберг“, со оглед на големината на потенцијалното ИПО од дури 90 милијарди долари - „Шејн“ има потенцијал да привлече многу меѓународни инвеститори. Но, пред тоа, таа верува дека „Шејн“ ќе треба да се погрижи неговиот синџир на снабдување - во Кина и на други места - да биде над критиките и дека планот за животна средина го ограничува влијанието на неговиот евтин шик.

Извор: ИЗЕА

Слична компанија, „Виш“ (Wish), беше основана во 2010 година од Пјотр Шулчевски и Дени Џанг. Со испраќање нарачки (полека) директно од кинески фабрики, без посредници, компанијата можеше да понуди ниски цени за своите производи. Таа ја прошири својата база на клиенти преку агресивен маркетинг на социјалните медиуми, во еден момент наводно трошејќи 100 милиони долари годишно на реклами на Фејсбук. Во 2020 година, кога излезе на берза, имаше 107 милиони месечни активни корисници и приход од 2,5 милијарди долари, што беше зголемување од 34 проценти од година на година. Изгледаа незапирливо, а основачот Шулчевски стана милијардер. Сепак, како што објаснува Летиција Миранда за „Блумберг“, „Виш“ набрзо потоа губеше 190 милиони долари годишно, а ќе беше профитабилна доколку не трошеше толку многу на маркетинг. Покрај големиот буџет за рекламирање, „Виш“ губеше клиенти и поради лошото шопинг-искуство. Следејќи ги импресивните бројки на своите претходници, „ПДД холдингс“ (PDD Holdings) ја лансира „Тема“ (Theme) во САД во 2022 година, која, според податоците од неколку извори што ја следат популарноста на апликациите според бројот на преземања минатата година, суверено го зазеде првото место во САД, Германија, Франција, Италија и во Велика Британија. (Во првите десет на сите споменати пазари се и Инстаграм, Тикток и Шејн). Потрошувачите што се жалат на „Тема“ најчесто ги спомнуваат проблемите со поддршката на клиентите, проблемите со кредитните картички и проблемите со производите со слаб квалитет. Со уште поголеми амбиции за американскиот пазар и неодамнешната инвестиција од 21 милион долари во рекламирање на Супербоул (Super Bowl), „Тема“ засега не се разликува многу во својата стратегија.

Горенаведените примери секако не се првите апликации што го следат секој кориснички клик нудејќи им богат избор на стоки произведени од трети страни. „Амазон“ го изгради своето богатство токму на таков вид  податоци.

Сечкање на тенки парчиња

Но тие не се само микротрендови. Според социјалната психологија, „thin slicing“ односно „тенкото сечење“ во буквален превод, познато и како хеуристичко размислување, често е присутно кај потрошувачите. „Тенко сечење“ е начин на размислување што се потпира на неколку клучни информативни сигнали, често социјални, и збир на основни правила за донесување интуитивни одлуки, нешто како кратенка за размислување. Во книгата „Блинк: Моќно размислување без размислување“, авторот психологот Малколм Гладвел објаснува дека „тенкото сечење“ е поврзано и со интуицијата, каде што луѓето ги користат процесите на несвесниот ум за да донесат брзи одлуки или пресуди, честопати без свесно да ги земат предвид сите достапни информации. И додека оваа способност за тенко сечење може да биде важна во ситуации кога брзата одлука е неопходна, таа исто така може да доведе до неточни заклучоци доколку се заснова на пристрасност или недоволно информации.

Истражувачите на „Мајкрософт“ Кристин Стечер и Скот Контс ја истражуваа оваа област за да утврдат колку точно информации се потребни во онлајн профилите за гледачите да формираат точен впечаток за поединецот и кои информации за профилот најмногу придонесуваат за способноста да се создаде тој впечаток. Тие се фокусираа на две форми на домени на социјалните медиуми: општи социјални мрежи како Фејсбук и блог-платформи. Во оваа студија, предвидливоста на одреден атрибут е дефинирана како негова способност да придонесе за гледачот во создавањето предвидлив впечаток за субјектот. На социјалните мрежи информациите како фотографија, име, статус, средно училиште и пол им овозможија на оценувачите да формираат предвидливи впечатоци, додека на платформите за блогови овие предвидливи информации вклучуваа фотографија, религиозни погледи, моментален град, работодавец. Така, додека корисниците можат да користат „тенко расчленети“ информации собрани од овие онлајн профили за да создадат впечаток за темата, впечатокот е значително под влијание на видот на атрибутите прикажани на профилот, како и различните начини на нивна обработка, наведуваат авторите според кои предвидливите впечатоци се формираат дури и по многу малку информации. Алатките за онлајн шопинг се ефективни затоа што тие широко ги користат овие предрасуди, односно избор на информации, за да ја зголемат веројатноста за однесување при купувањето, објаснуваат на веб-страницата „Инфлуенсер маркетинг хаб“ (Influencer Marketing Hub). Микротрендовите во оваа смисла се многу повеќе од инструкции за стилот. Создавањето посакувана естетика поддржана од добро дизајнирани хаштагови и стриминг-видеосодржини, т.е. рецензии, кои ги промовираат овие стилски наративи, значи дека клиентот е дел од „племето кликачи“.

Ли Џиаќи, водечки кинески стример, на тој начин продаде стоки во вредност од три милијарди долари за еден ден во октомври 2021 година, што е, да речеме, двојно повеќе од просечната дневна продажба на „Амазон“, според „Статиста“. Бидејќи за само пет минути продал повеќе од 15.000 кармини го добил прекарот крал на кармините. А за само неколку години стекнал богатство од 323 милиони долари. Никаде нема информации за кој кармин станува збор. Но тоа е веројатно така со супербрзите трендови на Тикток.

Во моментов нема коментари за веста. Биди прв да коментира...

Остави коментар