text size
Претставничкиот дом на САД усвои нацрт-закон за забрана на Тикток (TikTok) во САД, освен ако кинеската компанија што го поседува не го продаде својот оддел во САД. Ова претставува најсериозен проблем со кој се соочува платформата за кратки видеосодржини (која ја користат 170 милиони Американци), бидејќи критичарите ја нарекуваат закана за националната безбедност.
Одлуката, усвоена во средата со 352 гласа „за“, 65 „против“, сега оди во Сенатот, каде што нејзиното донесување е помалку сигурно. Имено, лидерот на мнозинството во Горниот дом, Чак Шумер, досега одбиваше да го поддржи овој закон, а против беа и одредени републиканци, како Ренд Пол.
Прочитајте повеќе: Конгресот на САД не се откажува од забраната на Тикток, корисниците гневни
Американскиот претседател Џо Бајден рече дека ќе го потпише нацрт-законот доколку го помине законодавниот дом, иако неговата кампања неодамна имаше профил на Тикток и тој се соочува со ризик да ги налути помладите гласачи осум месеци пред да се соочи со Трамп во реваншот.
Во средата наутро некои прогресивни демократи се изјаснија против мерката. Александрија Окасио-Кортез напиша на мрежата X дека законот е „усвоен неверојатно брзо“, дека има премалку време за гласање и дека нема доволно објаснување.
Но лидерот на Демократската партија на Претставничкиот дом, Хаким Џефирс, во изјавата истакна дека ја поддржува мерката бидејќи се однесува на „легитимни грижи за националната безбедност и приватноста во врска со активностите на кинеската комунистичка партија на широко користена социјална мрежа“.
Дури и ако овој предлог стане закон, Тикток најави серија правни дејства против него. Компанијата апелираше до Конгресот на САД, наведувајќи дека забраната би го прекршила Првиот амандман на американскиот устав.
Републиканците во Претставничкиот дом со големо мнозинство го поддржаа нацрт-законот дури и откако поранешниот претседател Доналд Трамп на почетокот на неделава посочи дека не е целосно против Тикток. Трамп, кој како претседател потпиша извршна наредба обидувајќи се да го забрани Тикток, неделава изјави за „Си-ен-би-си“ дека забраната на Тикток ќе му даде на Фејсбук (Facebook) преголема моќ. Да потсетиме дека Фејсбук му забрани на Трамп да објавува содржини на две години поради неговата улога во немирите од 6 јануари 2021 година.
„Има многу деца што би полуделе по ваква одлука“, рече Трамп.
.webp){kind=icon}
