Извршниот директор на „Мета“, Марк Закерберг, го оправда укинувањето на проверувачите на факти со тврдењето дека тие „биле премногу политички пристрасни и уништиле повеќе доверба отколку што создале, особено во САД“.
Промени како што дува ветерот
Многумина во неговиот најнов потег гледаат кулминација на повеќемесечните напори да му се додвори на Доналд Трамп, на кого Фејсбук му го укина профилот по нападот на Капитол во јануари 2021 година.
Од друга страна, Трамп во минатогодишната предизборна кампања го нарече Фејсбук „непријател на народот“ и се закани дека ќе го затвори Закерберг поради наводно мешање во изборите. Извршниот директор на „Мета“ (Meta) сега се обидува да го поправи односот со новоизбраниот претседател преку јавни пофалби за Трамп, но и конкретни потези како донација од милион долари во неговиот инаугурациски фонд и именување на неговиот жесток поддржувач Дена Вајт во управниот одбор на компанијата.
Додворувањето на Закерберг кон старо-новиот американски претседател започна откако ја пофали „мажествената“ реакција на Трамп на обидот за атентат. Потоа заедно вечераа на имотот на Трамп Мар-а-Лаго на Флорида, ноќта пред Денот на благодарноста.
Во текот на летото, Закерберг ја обвини администрацијата на Бајден дека врши притисок врз неговата компанија да ги отстрани објавите за Ковид, повторувајќи ги така жалбите што Трамп со години нанзад ги повторуваше за социјалните мрежи.
„Мета“ пред неколку дена го именуваше извршниот директор на УФЦ (Ultimate Fighting Championship), Дена Вајт, во својот управен одбор. Вајт е деклариран поддржувач на Трамп, а колку му е близок покажува и фактот дека во неговиот штаб во Мар-а-Лаго ја прослави неодамнешната изборна победа.
| „Мета“, компанијата во чија сопственост се Фејсбук и Инстаграм, најави укинување на надворешната проверка на факти (fact checking) и воведување „белешки од заедницата“. Таков систем веќе користи социјалната мрежа X, која со новите вработувања се обидува посилно да го промовира кликбејт новинарството. |
|---|
Големите технолошки компании му се додворуваат на Трамп
Треба да се истакне дека Закерберг не е единствениот шеф на голема технолошка компанија кој му даде поддршка на Трамп. Илон Маск активно го поддржуваше во изборната кампања, а учествуваше и на состаноци со извршни директори на други големи компании и водеше политички расправи за тоа што Трамп треба да направи како претседател пред воопшто да ја преземе функцијата.
Маск и Трамп се неразделни во последните неколку месеци | Bloomberg
Основачот на „Амазон“ (Amazon), Џеф Безос, исто така донираше милион долари во инаугурацискиот фонд на Трамп и наводно се согласи да плати 40 милиони долари за лиценцирање на документарец за Меланија Трамп. Џенсен Хуанг, извршниот директор на „Енвидија“ (Nvidia), за „Блумберг њуз“ изјави дека очекува Трамп да ја намали регулативата и ја поздрави неговата политика оценувајќи ја како „пријателски настроена кон бизнисот“.
X се врти посилно кон новинарството
Во сенка на сè поконтроверзните политички изјави на сопственикот Елон Маск, социјалната мрежа X се врти посилно кон новинарството.
Со таа цел, тие го ангажираа Џон Стол, поранешен уредник и шеф на канцеларијата на „Волстрит журнал“ (The Wall Street Journal) во Детроит, да ја води новинарската група и партнерскиот тим во X. Веста за вработувањето беше објавена во вторникот, за време на воведниот говор на X на саемот ЦЕС (CES 2025) во Лас Вегас.
Извршната директорка на X, Линда Јакарино, изјави дека е возбудена што новинарите на нивната мрежа ќе имаат можност да „го истражат својот занает“, да напредуваат и одлично да заработуваат. Таа се осврна на тоа дека креаторите на X можат да заработат преку програмата за поделба на приходите со креаторите на содржини, со која се наградува пишувањето за популарни теми кои го зголемуваат ангажманот на корисниците.
Извршната директорка на Линда Јакарино | Bloomberg
„Тек кранч“ (Techcrunch) пишува дека плаќањето на новинарите врз основа на кликови не е нова идеја – „Базфид“ (BuzzFeed) беше меѓу првите што го усвоија тој модел, само за подоцна да се најде на милост и немилост на промените во алгоритмот на Фејсбук. Слично би можел да направи и X, ако тоа има деловна смисла, или едноставно би можеле да го намалат досегот на вестите кои не му одговараат на Маск.
„Иднината на вестите не се традиционалните медиуми“, порача Јакарино, според која класичните медиуми треба да бидат заменети со платформи кои ја ставаат „промената на наративот во рацете на корисниците“, а тие промени би биле инспирирани од она што го дозволува „заштитената слобода на говорот и двонасочниот разговор“.
.webp){kind=icon}