Пазарот на јога урива рекорди: Колку Македонците го следат овој тренд?

Промената на трендовите во фитнес-индустријата и се’ поголемата свесност кај луѓето за алтернативни здравствени практики сериозно го зголемија интересот за јога во последните пет години. Според истражувањето на студиото за јога „Анвајнд“ (Unwind) овој древен индиски метод за саморазвој е меѓу првите десет физички активности на глобално ниво.

И во новиот извештај на „Алајд Маркет Рисрч“ (Allied Market Research) се предвидува светла иднина за оваа вештина која помага да се постигне рамнотежа меѓу телото и духот. Според истиот извор, пазарот на јога би можел да достигне вредност од 66,2 милијарди долари до 2027 година, со комбинирана годишна стапка на раст од 9,6 отсто во периодот од 2021 до 2027 година.

 Горјана Јордановска/Наке Батев

Не само како дисциплина, туку и како дејност и професија, јогата станува се’ поатрактивна и кај нас.

„Пред шест години имаше едвај три студија во Скопје, а скоро ниедно на други локации низ земјава, но сега веќе во секое маало низ главниот град има барем по еден простор со различна понуда на часови. Сликата се менува на подобро и во другите поголеми градови низ државата“, вели Горјана Јордановска, сертифицирана учителка по јога и основач на платформата „Риблум Јога“ (Rebloom Yoga).

 Симона Константиновиќ/Приватна архива

Таа за „Блумберг Адрија“ објаснува дека и покрај позитивниот тренд, сепак, овде се’ уште не може да се зборува за стабилен бизнис кога е јогата во прашање, првенствено поради симболичната цена на членските карти. Дека пазарната цена на услугата кај нас се’ уште е на релативно ниско ниво се согласува и Симона Константиновиќ, јога учител и сопственичка на студиото „Кеншо Мајнд Хаб“ (Kensho Mind Hub), но добрата работа е што свесноста расте.

„Се појавуваат ентузијасти, сопственици и инвеститори кои сакаат сериозно и професионално да вложат во услугите што ги нудат. Сопственици кои се сто отсто посветени на дејноста и ги следат сите светски трендови. Инвестираат во простор, во професионална услуга и сериозна едукација, но и во градење на стратегија за развој на поширока платформа. На овој начин ќе се креира поголема свесност кај целата заедница на долг рок. Јога услугите ќе почнат повеќе да се почитуваат и конечно ќе се создадат услови каде што ќе може да зборуваме за процентот на раст“, вели Константиновиќ.

Уште еден сериозен предизвик за бизнисот е фактот што јогата е профитабилна само во одредени месеци во годината доколку бизнис моделот вклучува само класични часови. Поради жештината и одморите во летните месеци вообичаено се намалува бројот на практиканти. Истото се случува и околу Нова Година и божиќните празници кога има најмногу прослави и е тешко да се задржи рутината. Затоа во овие периоди фокусот е свртен кон таканаречените јога ритрити, организирани патувања кои како модел не само што го надополнуваат празниот простор, туку може да донесат и сериозни приходи. Во тоа се уверила и Јордановска која веќе три години редовно организира вакви настани.

Со ритритот на Халкидики (See Your Freedom) таа привлекува се’ повеќе домашна публика, а еден организира и во Маврово (Wild at Heart) за кој се’ поголем интерес покажуваат странските туристи. Освен практикување јога, програмата содржи и други активности во природа, а на гостите им се обезбедува нутритивна, домашно приготвена храна. Овој аранжман ќе ве чини 400 евра ако го резервирате преку „Бук јога ритритс“ (Book Yoga Retreats), еден од водечките пребарувачи на одморалишта за јога. За македонските клиенти цената е пониска.

На прашањето што е поисплатливо, нашите соговорнички велат дека двата модела се комплементарни. Тие се едногласни дека класичните часови се стабилни и помагаат да се креира релевантна заедница која подоцна би била дел од овие ритрити.

ИНТЕРЕСОТ КАЈ МАЖИТЕ ВРТОГЛАВО РАСТЕ

Јогата започнала да се практикува во Индија пред повеќе од 2.500 години. На запад му е претставена пред околу еден век и оттогаш популарноста само расте. Иако оваа пракса на почетокот била наменета за млади момчиња и мажи, жените уживаат максимална доминација. Дури 80 отсто од 300 милиони луѓе кои посетувале јога во 2022 година биле жени, но последниве две години очигледно работите драстично се промениле.

„На светско ниво трендот за практикување јога кај мажите е во сериозен раст, особено кај аштанга јогата. Во Македонија се соочуваме со повлијателни стереотипи дека јогата е дисциплина само за жени, но од тоа што можам да забележам, особено во последната година во нашиот јога центар, гледаме тенденција на раст кај мажите практиканти, особено кај помладата популација и професионалните спортисти“, вели Константиновиќ.

Во моментов нема коментари за веста. Биди прв да коментира...

Остави коментар