„Тифани“ и „Картие“ водат битка против луксузните торби во војната за престиж

Продажбата на накит на „Ришемон“ (Cie Financiere Richemont SE) блеска. Во петокот швајцарската луксузна група соопшти дека продажбата на накит пораснала за 17 отсто во вториот фискален квартал (исклучувајќи ги валутните промени), надминувајќи ги дури и најоптимистичките прогнози.

Ваквите резултати потврдуваат дека скапите парчиња накит се неочекувани победници во период на пад на потрошувачката за луксуз. Но со досега невиден број нови дизајнери во модните брендови што подготвуваат бран свежи производи, како и со притисок врз синџирите на снабдување поради растот на цената на златото, накитот наскоро би можел да се соочи со сериозна конкуренција.

Белезиците „ван клиф и арпелс алхамбра“ (Van Cleef & Arpels Alhambra) со детелини за среќа и масивните приврзоци „хард веар“ („HardWear“) на брендот „Тифани“ (Tiffany & Co.), во сопственост на ЛВМХ (LVMH Moet Hennessy Louis Vuitton SE), и понатаму блескаа, но накитот можеби повеќе нема автоматски да биде прв избор на луксузните купувачи како во последните неколку години.

Graff

Кога времињата се тешки, важи општото убедување дека кожените производи се продаваат подобро. Иако можеме да го намалиме купувањето дизајнерска облека или обувки, не се откажуваме од омилениот паричник или чанта. Но „инфлацијата на алчноста“ ја преврте оваа логика. Како што цените на некои чанти се удвоија во изминатите пет години, накитот стана поатрактивен. Може да се носи повеќепати, а благодарение на благородните метали и дијамантите ја задржува својата вредност, што дополнително беше засилено со скокот на цената на златото за речиси 60 отсто во последната година.

Накитот станува подобра вредност за вложените пари – најголемиот бран инфлација се случи во последните пет години.

Оваа промена исто така ја одразува еволуцијата на луксузот. Поминаа дваесет години откако „ит-чинтите“ како моделите „сити“ („City“) на „Баленсијага“ (Balenciaga) и „падингтон“ („Paddington“) на „Клое“ (Chloe), кој го дизајнираше Фиби Фајло, станаа задолжителни парчиња за колекционерите на модни додатоци. Како што потрошувачите се навикнаа на купување кожени производи, преминаа на други категории, како накитот, кој повеќе не е резервиран само за еден отсто од најбогатите.

Bloomberg

Брендираниот накит и понатаму претставува релативно мал дел од вкупниот пазар. Тоа значи дека познатите брендови и натаму имаат простор за раст - особено оние под големите групации, како што се „Булгари“ (Bulgari), „Фред“ (Fred) и „Шоме“ (Chaumet), кои се во сопственост на ЛВМХ (LVMH), и „Помелато“ (Pomellato), кој е дел од „Керинг“ (Kering SA).

Дополнително, независниот бренд „Роберто Коин“ (Roberto Coin), кој во САД го застапува „Вочес“ (Watches of Switzerland Group Plc), исто така освојува пазарен удел.

Модните куќи сè подлабоко навлегуваат во сегментот на фин накит за да обезбедат поголем дел од растечкиот пазар.

Истовремено, по децении во кои часовниците беа единствен машки моден додток, мажите сега експериментираат со нови форми на самоизразување. Накит сè почесто носат машки ѕвезди како Тимоти Шаламе и спортисти како бејзбол-играчот Мигуел Рохас, кој носи ѓердан „ван клиф и арпелс“..

Со ефектот на растот на богатството поттикнат од подемот на индексот S&P и неодамнешниот раст на биткоинот, не е изненадување што категоријата накит блеска. Продажбата во американскиот разгранок на „Вочес“, каде што накитот учествува со околу 19 отсто од приходите, порасна за 20 отсто во првото фискално полугодие.

Depositphotos

Инвеститорите се подготвуваат за промени

Но модата го возвраќа ударот. Повеќе од десетина бренда, меѓу кои „Диор“ (Dior), во сопственост на ЛВМХ, и „Гучи“ (Gucci), дел од „Керинг“, имаат нови креативни директори. Многумина од нив неодамна дебитираа со своите први ревии, а бран нови производи ќе пристигнат во продавниците на почетокот од следната година.

Дискретните златни обетки или белезиците од благородни метали беа меѓу главните парчиња на „тивката елеганција“. Како што модниот циклус се менува и побогатите, поукрасени стилови полека се враќаат на сцената, купувачите би можеле повторно да се свртат кон поизразени модни парчиња.

Тука е и новиот предизвик: вредноста на накитот беше нагласена поради брзата инфлација кај кожените производи. Но сега и самата индустрија за накит се соочува со раст на цената на златото, неповолни движења на валутите и ефектите од американските царини.

Depositphotos

Бидејќи цените на накитот во изминатите пет години растеа релативно умерено, затоа има простор некои од повисоките трошоци да се апсорбираат. Но некои брендови веќе почнуваат да ги префрлаат на купувачите. Според процените на аналитичарите, „Картие“ годинава ги зголемил цените за средни до високи едноцифрени проценти, „Тифани“ во САД ги покачил цените за пет отсто во октомври, а „Булгари“ за шест отсто на поголемиот дел од производите, покажува анализата на „Ситигруп“ (Citigroup Inc.). Доколку модните куќи претстават нови чанти што се привлечни и со разумни цени, разликата во однос на накитот би можела да се намали.

Дополнително, иако „Картие“ добива на популарност во Кина (според аналитичарите на „ТД Ковен“ (TD Cowen)), домашните брендови зреат. „Лаопу голд“ (Laopu Gold Co.), познат по дизајни инспирирани од кинески мотиви, станува првиот сериозен локален ривал. Не е изненадување што неговите акции годинава ја надминаа вредноста на „Ришемон“ (Richemont).

Кинескиот производител на накит расте најбрзо – традиционалните мотиви и високите цени на златото го подигнаа домашниот предизвикувач.

Од 2019 година наваму, накитот расте побрзо од чантите, дизајнерската облека и обувките – категорија позната како „мек луксуз“, велат аналитичарите на РБЦ (RBC Capital Markets). Но ако новите дизајнери успеат да направат пресврт, модата и накитот би можеле да растат со слично темпо во следните две години.

Depositphotos

Модата може да го достигне накитот ако дизајнерите создадат вистинска магија

За да се одбранат од можниот камбек на силните модни брендови, производителите на накит мора да ја избегнат грешката на повторување на истите производи по сè повисоки цени. Тие мора постојано да ги освежуваат своите линии – препознатливи и профитабилни колекции по кои се најпознати. Засега успеваат да внесат новини, како што покажува новата флексибилна верзија на популарната белезица „љубов“ („Love“) на „Картие“, целосно распродадена онлајн во Лондон – како и новите модели од линијата „Алхамбра“ на „Ван Клиф и Арпелс“, кои може да се носат на повеќе начини.

Воведувањето новитети во најпрепознатливите колекции е и паметен начин да се ублажат инфлаторните притисоци. Линијата „Лав анлимитед“ („Love Unlimited“) има повисока цена во однос на оригиналот, велат аналитичарите на ХСБЦ (HSBC Holdings Plc).

Излозите на продавницата „Тифани“ на Петтата авенија неодамна беа претворени во готски уметнички дела по повод соработката со филмот на „Нетфликс“ (Netflix), „Франкештајн“. Ако производителите на накит успеат да ја спојат креативноста со внимателно управување со цените, не треба да се очекува хорор-сцена ни тогаш кога модата повторно ќе ја најде својата инспирација.