Тарифите на Трамп го оживуваат замреното тргување со валути

Цела деценија Тим Брукс купува и продава странски валути, навикнувајќи се на фактот дека главната активност се одвива на друго место. Тој и неговиот тим во „Оптивер Холдинг БВ“ (Optiver Holding BV), водечка компанија за тргување со финансиски инструменти со седиште во Лондон се потпираат на нестабилноста за да генерираат брзи профити од ненадејните промени на девизните курсеви.

Сепак, драматичните осцилации генерално повеќе не се случуваат бидејќи по глобалната финансиска криза во 2008 година, најголемите централни банки почнаа да ги намалуваат и да ги зголемуваат каматните стапки повеќе или помалку заедно. И покрај повремените возбудливи настани, како што е минатогодишниот пораст на јапонскиот јен по изненадувачкото зголемување на каматните стапки, одделенијата за тргување со валути им ја отстапија сцената на тимовите за тргување со акции и обврзници.

Тоа се промени откако Доналд Трамп беше реизбран за претседател на САД, ветувајќи дека ќе ја разниша глобалната трговија. Канадскиот долар и евро почнаа да флуктуираат како што се зголемија трговските закани, губејќи ја вредноста кога тарифите се чинеше дека се неизбежни и закрепнувајќи кога Трамп најави одложување. Како што зајакнуваше доларот, американската централна банка (Фед) отстапи од досегашната практика да дејствува синхронизирано со другите централни банки, најавувајќи дека ќе ги задржи постојните каматни стапки додека другите банки продолжија да ги намалуваат.

Откако просечниот дневен обем на тргување со девизи двојно се зголеми во однос на 2024 година, Брукс се најде во центарот на вниманието. Пред неколку месеци, „Оптивер“ воведе 24-часовно работно време за да одговори на зголемената побарувачка. Еден трговец е испратен во Сингапур за да започне тргување со валути таму, додека друг е префрлен од одделот за тргување со стоки во тимот за тргување со валути на Брукс.

„Поголемиот дел од мојата кариера, девизите беа класа на средства со најниска нестабилност и најмал интерес на инвеститорите“, вели Брукс, кој започна во „Оптивер“ како практикант и сега го надгледува тргувањето со опции на девизниот пазар. „Сега има поголем потенцијал за движење на цените и ќе следи многу поголем интерес“.

Обновениот ентузијазам во „Оптивер“ може да се забележи низ целиот финансиски сектор. „Велс Фарго Фајненшл Корп“ (Wells Fargo Financial Corp) го донесе ветеранот во тргувањето со валути Енрике Пајан од „Дојче Банк“ (Deutsche Bank) во јануари за да раководи со проширениот тим за тргување со опции за девизни курсеви, а „Ситигруп“ (Citigroup) ги засили своите тимови за деривати на девизниот пазар во Лондон со преземање на двајца трговци од „Берклис“ (Barclays).

Според податоците на берзанскиот оператор „ЦМЕ Груп Инк“ (CME Group Inc), во јануари е забележан најголем промет во тргувањето со опции на девизниот пазар од февруари 2020 година, при што дневниот обем на тргување е за 75 отсто поголем од почетокот на минатата година.

Аналитичарската фирма „Коалишн Гринвич“ (Coalition Greenwich) предвидува дека банките во развиените економии кои тргуваат со валути ќе забележат раст две последователни години, иако фирмата очекува пад на тимовите за тргување со суверени обврзници и стоки. „FX (од англиски: Foreign Exchange) е како заспан џин, но за нас е важен во портфолијата бидејќи мислиме дека може да придонесе за подобри резултати“, вели Фредрик Рептон, менаџер на средства во глобалната инвестициска фирма за управување со средства „Нојбергер Берман Груп“ (Neuberger Berman Group LLC).

Враќањето на нестабилноста на девизниот пазар со дневен обем на тргување од 7,5 трилиони долари го разбуди интересот на хеџ-фондовите, а тргувањето со некои азиски валути достигнува рекордно ниво по изборите во САД, според „Ситигруп“. Бројот на фондови фокусирани исклучиво на тргување со валути значително се намали за време на периодот на многу ниски каматни стапки, додека малкуте преостанати фондови сега добиваат готовина, соопшти компанијата за податоци и анализа на индустријата за хеџ фондови „БерклиХеџ“ (BarclayHedge).

Depositphotos

Оваа професија стана исклучително привлечна за време на глобалната финансиска криза, вели Кевин Роџерс, кој го предводеше одделот за глобално тргување со валути во „Дојче Банк“ и сега работи како независен консултант. „Тоа беше најдобро време да се добие кредибилитет во тргувањето“.

Бројот на вработени во одделите за тргување со валути е значително намален во последниве години, а многу трговци беа заменети со алгоритми кои лесно можат да ги надминат луѓето во извршувањето на задачите. На таа работа останаа главно помлади, бидејќи банките отпуштија ветерани кои чинат многу, но задржаа неколку помлади соработници само за да ги одржат основните активности.

Сепак, со растот на интересот на хеџ фондовите, банките почнаа да вработуваат трговци со валути. „Се чувствуваме како да се враќаме во 1990-тите“, вели Лорен ван Билјон, портфолио менаџер во глобалниот менаџер на средства „Олспринг Глобал Инвестментс“ (Allspring Global Investments). „Имате цела генерација трговци кои не доживеале нестабилност“.

Меѓу новодојденците е и Саша Гил, која веднаш по дипломирањето, се приклучи на тимот за тргување со валути на „Берклис“ во Лондон во септември. Таа ги помина првите неколку недели учејќи професионален сленг, како што е „yard of cable“, што е сленг за претворање на една милијарда фунти во долари.

Неодамна, таа почна да ја следи социјалната мрежа на Трамп, „Трут сошл“ (Truth Social). „Многу е возбудливо“, вели таа. „Од самиот почеток ни беше доверена задача да помогнеме во управувањето со зголемениот прилив“.

Со оглед на честите промени на Трамп, прерано е да се каже дали скокот на обемот на трговијата значи дека закрепнувањето е долгорочно. Но, вработувањето во секторот продолжува, особено за луѓето кои работеле во трговските одделенија за време на падот во 2008 година, кога нестабилноста нагло се зголеми, вели Адам Газоли, соосновач на „Адамис Принципл ЛТД“, агенција за регрутирање во Лондон. „Банките бараат нови вработени“, вели Газоли. „На многумина им недостасуваат возрасни кадри со повеќе од 20 години искуство“.

Во соработка со Грег Ричи и Василис Караманис.