Доларот на пат да стане „посилен за подолго“, а еврото?

Кривата на Bloomberg Dollar Spot Index, кој што ги следи перформансите на кошницата од десет водечки светски валути наспроти американскиот долар почна вртоглаво да оди нагоре по 5 ноември годинава откако се дознаа резултатите од претседателските избори во САД, на кои победи Доналд Трамп. Иако изминатава недела има мали дневни повлекувања надолу, што некои светски аналитичари го толкуваат како затишје од еуфоријата предизвикана од изборните резултати, сепак преовладува мислењето дека перспективите за вредноста на доларот се многу порозови отколку за еврото.

„Голдман Сакс“ го смени мислењето    

Доларот влегува во нов период на јачина поттикната од плановите на Доналд Трамп да воведе високи царини, според валутните стратези во „Голдман Сакс“ (Goldman Sachs Group Inc.).

Тоа го наруши долгогодишниот став на банката дека валутата постепено ќе опаѓа. 

„Веќе не очекуваме голема депрецијација на доларот“, напиша тимот на „Голдман Сакс“ предводен од Камакшја Триведи во белешка во петокот. „Доларот ќе биде посилен подолго време“.

Во „Голдман Сакс“ во последните две години предвидуваа дека вредноста на американската ќе се намали, што се покажа како точно минатата година. Но неодамна се случи пресврт откако доларот се зголеми за 2,4 проценти по изборите во САД на 5 ноември.

„Нашиот централен став во последните неколку години беше дека ќе видиме само ‚плитка‘ депрецијација на доларот од врвот во 2022 година, што во голема мера се покажа точно“, напишаа тие. „Сега очекуваме тарифите да бидат истакнати во миксот на американската политика следната година, заедно со некои дополнителни фискални промени“.

Тарифите, заедно со растечката економија и зголемените цени на средствата во САД се „моќна комбинација за доларот“, додаваат тие. Компанијата сега очекува економските политики на Трамп да ги зголемат трошоците за увозот во САД, а истовремено да ги намалат трошоците за водење бизнис во земјата.

Овие придобивки треба да го поттикнат трговскиот пондериран индекс на зелената банкнота да се зголеми за околу три проценти во текот на следната година, прогнозираат од „Голдман Сакс“. Што се однесува до еврото, тие предвидуваат дека ќе се намали на 1,03 долари во следните 12 месеци, додека јенот ќе ослабне на 159 за долар.

Европа - грдото во глобалната економија 

Растечкиот економски јаз меѓу САД и Европа се заканува дополнително да тежи врз заедничката валута и европскиот долг, според Мохамед Ел-Еријан.

„Ако ги гледате доброто, лошото и грдото на глобалната економија, за жал Европа е грдото“, изјави Ел-Еријан, претседател на колеџот Квинс при Кембриџ неодамна за телевизијата „Блумберг“.

Како што го зајакна доларот, победата на Доналд Трамп на претседателските избори во САД поттикна пад на еврото додека пазарите се обложуваат на постепено намалување на каматните стапки од Федералните резерви. Заедничката валута накратко падна под границата од 1,05 долари минатиот четврток, допирајќи го најслабото ниво во повеќе од една година.

„Не би ме изненадило да видам дека еврото станува послабо“, рече Ел-Еријан.                      

Повеќе фактори за растот на доларот Бојан Цветановски член на Извршен одбор на АЦИ Македонија констатира дека американскиот долар веќе влезе во тренд на пораст. „Едно евро сега вреди 1,05 долари. Ако ова ниво во следните денови или недели се пробие тогаш може да очекуваме паритет евро-долар, а можно е и понатаму да има и посилен долар во однос на еврото. Но се зависи како ќе издржи сегашното ниво од 1,05“, вели Цветановски.  Тој додава дека за порастот на американскиот долар има повеќе фактори, а еден од нив е силниот раст на американската економија, ниската стапка на невработеност и инфлација која сега е ставена под конттрола. Дополнително, сега инвеститорите претпоставуваат дека Трамп ќе ја спроведува најавената економска политика, а таа подразбира силен долар.

Со помош на Картер Џонсон

Во моментов нема коментари за веста. Биди прв да коментира...

Остави коментар