Хеџ фондовите инвестираат во турски лири во постизборниот валутен хаос

Турската лира е единствената валута на пазарите во развој што забележа добивка во однос на доларот во текот на денешното тргување бидејќи вредноста на другите валути низ светот се спушти по изгледите за враќање на Доналд Трамп во Белата куќа.

Валутата утрово поскапе за 0,3 отсто во однос на доларот на берзата во Лондон, користејќи ја силната поддршка од државните банки, кои исто така ги охрабрија странските фондови да влезат на пазарот, сметаат трговците запознаени со трансакциите, кои побараа да не бидат идентификувани бидејќи не се овластени да зборуваат јавно.

Државните банки продадоа повеќе од 500 милиони долари за да ја одбранат лирата и да ја зачуваат нејзината вредност на ниво од околу 34,3550 за долар, а тоа се случуваше главно за време на азиското тргување кога другите валути на пазарите во развој се намалуваа дијаметрално спротивно од растот на изгледите за победа на Трамп, велат трговците. На таквата поддршка се вклучија и хеџ фондовите, велат изворите.

„Има смисла странците да влегуваат во инвестиции во лири затоа што 'carry trade' е сè уште привлечно, а нестабилноста во другите валути од пазарите во развој е превисока“, рече Онур Илген, раководител на трезор во „МУФГ банка“ на Турција (MUFG Bank). „Дури и пред изборите инвеститорите се обложуваа дека лирата може да има корист од личните односи на турскиот претседател Реџеп Таип Ердоган со Трамп“, рече Илген.

Bloomberg Mercury

„Carry trade“ се однесува на практиката да се позајмуваат пари каде што каматните стапки се ниски и да се инвестираат во земји и валути што нудат повисоки приноси, како Турција, каде што референтната каматна стапка на централната банка е 50 проценти. Тоа е второ највисоко ниво во светот, поврат што стана уште попривлечен за инвеститорите од напорите на властите да ја одржат лирата релативно стабилна во однос на доларот.

Турските обврзници и акции се приклучија на растот и исто така беа меѓу позабележителните на пазарите во развој. Приносот на 10-годишните обврзници со лири падна за 13 базични поени, на 31 отсто.

Добивките на лирата во текот на денешниот ден се случуваат во услови кога доларот го достигна највисокото ниво во едногодишен период, при што индексот на доларот на „Блумберг“ скокна за цели 1,7 отсто, што е најголем раст во последните четири години.