Златната треска ќе потрае: И Македонците не можат да ѝ одолеат

Годинава е рекордна за златото, кое се смета за традиционално средство за инвестирање што ја има етикетата на најстабилно и важи за прибежиште во услови на несигурност во глобални рамки. Но се чини дека не е достигнат врвот. Имено, некои од најголемите инвестициски банки прогнозираат дека трендот на раст ќе продолжи и следната година, па дури и дека неговата цена ќе ја достигне границата од 3.000 долари за унца.

Според УБС (UBS Group AG), вредноста на златото ќе се зголеми до 2.900 долари за унца до крајот на следната година, што е уште една позитивна прогноза за инвеститорите чие омилено средство се златните прачки.

Движење на цената на златото Bloomberg Mercury

Веројатно ќе има период на консолидација поради посилниот долар и загриженоста за потенцијалот на зголемените американски фискални стимулации да доведат до повисоки стапки пред благородниот метал повторно да почне да расте, велат аналитичарите на УБС, вклучувајќи ги Леви Спрај и Лахлан Шо. До крајот на 2026 година златните прачки дополнително ќе пораснат на 2.950 долари за унца, велат тие.

Растот на златото, според аналитичарите, го водат силниот куповен интерес за диверзификација и зголемената глобална несигурност. Па така, се прогнозира дека добивките треба да бидат поттикнати од континуираните стратегиски алокации на златото и купувањата од официјалниот сектор во услови на висока макронестабилност и постојани геополитички ризици.

Златото е меѓу инвестициските победници годинава

Златото е една од стоките со најсилни перформанси годинава, поставувајќи неколку последователни рекорди пред повлекувањето по претседателските избори во САД, кога скокна доларот. Вредносниот раст годинава е резултат на акумулациите од централните банки, пресвртот во монетарната политика, особено од страна на американските Федерални резерви (Фед), кои се насочија кон монетарно олеснување, како и од геополитичките тензии во Европа и на Блискиот Исток.

Конкретно денеска златото се тргува по цена од околу 2.630 долари за унца, што претставува раст од 28 проценти во 2024 година.

Вчера и „Голдман Сакс“ прогнозираше дека до крајот на следната година благородниот метал ќе се искачи на 3.000 долари за унца. Таквото оптимистичко расположение се должи на поголемата побарувачка од централните банки, плус тековите во фондовите со кои се тргува на берзите според стапките на Фед.

„Официјалниот сектор, кој има тенденција да купува златни прачки, најверојатно ќе продолжи да ги зголемува резервите заради диверзификација во услови на геополитички тензии и ризици од санкции“, се наведува во нивниот извештај, каде што се нагласува дека златните резерви на многу централни банки остануваат мали како процент од вкупните средства што ги поседуваат.

„Голдман Сакс“ советува инвестирање во злато и посочува дека цените би можеле да продолжат да растат за време на претседателството на Доналд Трамп.

Македонците не се имуни на златната треска

„Блумберг Адрија“ веќе пишуваше за навалицата за злато на светските берзи, но и дали и колку тоа ги мотивира Македонците да инвестираат во ова средство. Прогнозите за натамошен раст на цената на златото ги поткрепи и Снежана Поповска, сертифицирана техничка аналитичарка, која советува дека секоја ценовна корекција надолу е можност за инвестиција.

„Еден од методите на предвидување до каде може да оди цената е со помош на линиите наречени ’Фибоначиеви екстензии’ (англ. Fibonacci extensions). Првата цел од 2.700 долари за унца веќе е постигната, а следното ниво е околу 3.700 долари. Затоа, секоја корекција надолу е одлична можност за купување злато“, објасни Поповска.

Таа додава дека, и покрај намалувањето на бројките, стравот од инфлација кај државите сѐ уште постои, а нивната преголема задолженост и несигурноста на светските пазари се само дел од причините за прибегнување кон златото како посигурен чувар на вредноста. „Централните банки продолжуваат да ги зголемуваат своите златни резерви, а инвеститорите купуваат злато за да го заштита својот капитал и да го диверзифицираат портфолиото“, рече Поповска за „Блумберг Адрија“.

 

 

Зголемен интерес за златото се забележува и во Македонија, каде што од пред неколку години може на пазарот да се купи инвестициско злато, освен традиционалното купување злато како накит, јубилејни монети издадени од Народната банка и сл.

Трговците со инвестициско злато во земјава велат дека во изминатиот период значително е зголемен интересот за златните продукти, а прометот во споредба со минатата година е двојно поголем.

Во последниве 20 години цената на златото во однос на американскиот долар е зголемена за 540 проценти или во просек годишно околу 28 проценти. Златото сѐ повеќе ја губи својата улога на заштитник против инфлацијата, а сѐ повеќе станува реална инвестиција и средство за штедење, бидејќи годинава цената континуирано му расте, дури и кога инфлацијата е намалена.