Цената на златото се стабилизира, додека трговците се фокусираат на разговорите меѓу САД и Кина

Златото се движеше меѓу добивки и загуби – по остриот пад што го зафати поширокиот пазар на благородни метали кон крајот на минатата недела, додека знаците за намалување на тензиите меѓу САД и Кина го подобрија расположението на пазарите.

Благородниот метал осцилираше пред почетокот на тргувањето во Азија утринава да забележи мала промена, продолжувајќи ја нестабилноста што следуваше по петочниот пад од 1,7 отсто, најголемиот дневен пад од мај. Среброто се повлече до 1,2 отсто пред делумно да ги намали загубите, откако во претходната сесија се затвори со пад од 4,3 отсто поради знаци што укажуваа дека недостигот во лондонските резерви можеби се ублажува.

Техничките индикатори, вклучувајќи го индексот на релативна сила, RSI, укажуваат дека силното зголемување на цените на благородните метали што започна во август – и што минатата недела ги турна златото и среброто на нови рекордни нивоа – можеби е прегреано, отворајќи можност за корекција.

Bloomberg

Трговците сега се насочени кон претстојните разговори меѓу САД и Кина, откако претседателот Доналд Трамп кон крајот на минатата недела изрази оптимизам дека разговорите со официјални претставници од Пекинг може да донесат договор за ублажување на трговската криза, нарекувајќи ги најавените високи давачки неодржливи. Опипливите знаци на напредок може да ја намалат побарувачката за сигурни средства како што се златото и среброто.

Сепак, инвеститорите остануваат вознемирени поради кредитните ризици во американските финансиски институции, откако две регионални банки минатата недела открија проблеми со заемите поврзани со наводна измама. Проблемите во „Ционс“ (Zions Bancorp) и „Вестерн алијанс“ (Western Alliance Bancorp) – кои треба да ги објават резултатите оваа недела – може да бидат прв показател за тоа дали повторно се појавуваат ризични кредитни практики.

Благородните метали бележат силен раст годинава, при што златото забележа деветта последователна недела на пораст. Цените досега се зголемени за повеќе од 60 отсто во 2025 година, поттикнати од купувањата на централните банки и приливите во берзански фондови – ЕТФ (ETF). Побарувачката за злато дополнително ја засилија геополитичките и трговските тензии, растечките фискални и долговни нивоа, како и заканите за независноста на Федералните резерви.

Цената на златото би можела да достигне и до 5.000 долари за унца во 2026 година, со оглед на тоа што нова група институционални инвеститори и поединци со висока нето-вредност ќе се приклучат на растот, напиша аналитичарот Џејмс Стил од „Ејч-ес-би-си“ (HSBC Holdings Plc). Тоа, како што додаде тој, најверојатно ќе ја зголеми пазарната волатилност следната година.

Среброто, пак, забележа уште посилен раст – речиси 80 отсто од почетокот на годината – со добивки поттикнати од истите макроекономски фактори што го поддржуваат и златото. Во Лондон недостигот од ликвидност предизвика глобална потрага по металот, откако референтните цени се издигнаа над оние на фјучерсите во Њујорк.

Во изминатите две недели повеќе од 20 милиони унци сребро биле повлечени од магацините поврзани со фјучерс-размената Комекс (Comex) во Њујорк. Најголемиот дел најверојатно е пренесен во Лондон, каде што би требало да помогне во олеснување на недостигот. Ценовната разлика меѓу двата трговски центра сè уште е значителна – околу 1,20 долари по унца – но тоа е многу помалку во споредба со разликата од три долари минатата недела. Во четвртокот исто така беше забележано значително повлекување од 10 милиони унци од фондовите со поддршка од сребро (silver-backed ETFs).

Bloomberg

Спот-цената на златото речиси не се промени и изнесуваше 4.257,37 долари за унца во 9:16 часот во Сингапур. Индексот Bloomberg Dollar Spot остана непроменет. Среброто се зголеми за 0,2 отсто, односно на 52,0104 долари за унца – откако во петокот достигна рекордно ниво од 54,4796 долари за унца. Платината забележа пад, додека цената на паладиумот се зголеми.