Разговорите меѓу САД и Кина се планираат за следната недела, додека Трамп ги намалува царините

Следната рунда трговски преговори меѓу САД и Кина е закажана за идната недела, а американскиот министер за финансии Скот Бесент и кинескиот вицепремиер Хе Лифенг ќе се соочат со задачата да преговараат за новите ескалациски мерки меѓу двете најголеми економии во светот.

Бесент рече дека синоќа виртуелно разговарал со Хе. Шефот на финансии претходно ги опиша разговорите со Хе како „искрени и детални“ и ги потврди плановите за лична средба следната недела. Американскиот трговски претставник Џејмисон Грир, исто така, учествуваше во онлајн разговорите.

„Тој и јас, како и делегација, ќе се сретнеме во Малезија - веројатно за една недела, за да се подготвиме за средбата на двајцата претседатели“, рече Бесент на настан во Белата куќа.

Кинеската државна новинска агенција објави дека двете страни имале искрена, длабинска и конструктивна размена на мислења за важни прашања во билатералните економски и трговски односи.

Коментарите на Бесент следуваа откако американскиот претседател Доналд Трамп изрази оптимизам дека разговорите со кинеските претставници би можеле да доведат до договор за смирување на кризата во која американскиот лидер се закани со драстично зголемување на царините. Земени заедно, забелешките сигнализираа обид на Вашингтон да ги смири стравувањата од целосна трговска војна со Пекинг што би можела да има сеизмички ефект врз глобалната економија.

„Мислам дека се справуваме многу добро. Мислам дека се сложуваме со Кина“, рече Трамп. Американскиот претседател, исто така, посочи дека верува оти неговата планирана средба со кинескиот претседател Шји Џјинпинг, што треба да се одржи овој месец во Јужна Кореја на маргините на самитот на лидерите на Азиско-пацифичката економска соработка, ќе се одржи.

Пред само една недела, Трамп ја спомна можноста за откажување на својата прва лична средба со Шји откако се врати во Белата куќа, разбеснет од ветувањето на кинеската влада да спроведе широка контрола врз критичните ретки метали. Тој, исто така, прогласи дополнителен данок од 100 проценти за увоз на кинески стоки што ќе стапи во сила на 1 ноември.

Но, вчера во изјавата за „Фокс бизнис“ (Fox Business) Трамп го окарактеризира враќањето на небесно високите тарифи како „неодржливо“.

Претходно, САД и Кина се согласија на примирје во кое Вашингтон ги паузираше царините од 145 отсто за кинеските стоки, додека Пекинг вети дека ќе го продолжи протокот на ретките земни метали. Овој договор треба да истече во ноември.

Претстојните разговори претставуваат најнови напори за постигнување разбирање за трговијата по веќе одржаните четири рунди билатерални трговски преговори. Бесент и Хе претходно преговараа во Мадрид, Стокхолм, Лондон и Женева. Куала Лумпур, главниот град на Малезија, следната недела треба да биде домаќин на самитот на Асоцијацијата на земјите од Југоисточна Азија, каде што се очекува да се соберат и многу други лидери од целиот свет.

„Мислам дека работите се смирија“, рече Бесент во петокот. „Се надеваме дека Кина ќе ја покаже почитта што ние им ја покажавме. И уверен сум дека претседателот Трамп, поради неговиот однос со претседателот Шји, ќе може да ги врати работите на добар пат.“