Берзански преглед: Криптоманија, можна корекција на S&P, антидоларски балон

Вкупната пазарна вредност на крипто-средствата во петокот за првпат ја надмина границата од четири илјади милијарди долари, како резултат на растот на вредноста на алтернативните криптовалути и поттикот што го даде обемната законодавна иницијатива на САД за регулирање на овој сектор.

Овој историски момент следуваше по усвојувањето на првиот федерален закон за стабилни криптовалути — клучно достигнување во рамките на т.н. „криптонедела“, како што ја нарекоа американските законодавци.

Законот, кој има поддршка од републиканците и го поддржува претседателот Доналд Трамп, воведува федерален или државен надзор врз стабилните дигитални валути поврзани со доларот, со цел да се легитимира пазар вреден 265 милијарди долари, кој според проценките на аналитичарите на „Сити груп“ би можел да порасне на 3.700 милијарди долари до 2030 година. Главен двигател на растот се алтернативните дигитални валути.

Цената на криптовалутата XRP во четвртокот достигна рекордно ниво по усвојувањето на законот во американскиот Конгрес, надминувајќи го седумгодишниот праг, во рамките на поширокиот тренд на поскапување на криптовалутите на пазарот.

Криптовалутата поврзана со „Рипл лабс“ (Ripple Labs) во изминатата недела забележа раст од над 36 отсто, според податоците на „Коингеко“ (CoinGecko), платформа за крипто-пазарна анализа. Во моментот на пишување, нејзината цена достигна 3,61 долар, додека прагот од 3,40 долари последен пат беше достигнат во јануари 2018 година.

Иако биткоинот и понатаму останува сидро на светот на криптовалутите, сè повеќе инвеститори го насочуваат вниманието кон алтернативните дигитални валути – особено кон етерот (ETH). ETH во последните седум дена има пораст сличен на оној што биткоинот го има во текот на целата година – речиси 22 отсто. Но, на годишно ниво, растот изнесува само 3 отсто. Зошто е тоа така?

 

 

Биткоинот не е соодветен за долгорочни инвеститори. Станува збор за незрела класа на средства

Биткоинот не е погоден за долгорочни инвеститори. Дигиталните средства повеќе се сметаат за шпекулација отколку за вистинска инвестиција. Станува збор за незрела класа на инвестиции, со кратка историја и без внатрешна економска вредност, што може сериозно да им наштети на инвестиционите портфолија.

Вака размислуваат раководителите на „Вангард груп“ (Vanguard Group), инвестициски гигант кој ја следи филозофијата на легендарниот Џек Богл. Според оваа филозофија, инвеститорите треба долгорочно да вложуваат во нискобуџетни, пасивно управувани индексни фондови, наместо да се обидуваат да го надмудрат пазарот со активно тргување.

Сепак, токму поради логиката на пасивното инвестирање, „Вангард груп“ – кој управува со импресивни 10 трилиони долари – стана најголемиот акционер во компанијата „Стратеџи“ (Strategy - поранешна „Микрострагетџи“ (MicroStrategy) – MSTR), фирма што важи за еден вид „претставник“ на биткоинот на Волстрит.

Боштанчич: Праведно е да се оданочат и крипто-средствата

Во време кога крипто-пазарот урива рекорди, словенечкиот министер за финансии Клемен Боштанчич објасни зошто предлага донесување закон за оданочување на добивката од продажба на крипто-средства. Според него, со овој закон Словенија се прилагодува на развојот на финансиските пазари, воведува правична рамнотежа во оданочувањето на различни типови финансиски вложувања, но и се обидува што е можно помалку да ги оптовари и даночните обврзници и институциите.

Bloomberg Mercury

 

Со тоа што добивките создадени од продажбата на криптосредства ќе бидат оданочени со 25 отсто данок, тие ќе се изедначат со добивките создадени од краткорочно држење акции и деривативни финансиски инструменти. Повеќе за законот.

Во првиот одговор по официјалното претставување на причините за донесување на законот за оданочување на добивките создадени од продажба на криптосредства, за „Блумберг Адрија“ се огласи претседателот на Биткоин здружението на Словенија, Тони Чепон.

„Длабоко сум разочаран од луѓето и нашата држава кои не ги гледаат позитивните работи во оваа индустрија и во сè гледаат краткорочна молзна крава, која ја колат пред да го даде првиот литар млеко,“ напиша Чепон.

Зелена недела за светските берзи

Минатата недела во САД беа објавени податоци за инфлацијата која во јуни порасна помалку од очекувањата. Индексот на цените на потрошувачките производи, без вклучени променливи цени на храна и енергија, месечно порасна за 0,2 отсто, додека аналитичарите очекуваа раст од 0,3 отсто. Годишната основна инфлација изнесуваше 2,9 отсто, што е помалку од очекуваните 3 отсто. Вкупната инфлација беше 2,7 отсто.

Поголемите бројки од очекуваните би можеле да предизвикаат поинтензивни повици од Трамп за намалување на каматните стапки на американската централна банка (Фед). Додека некои службеници изразија подготвеност да ги намалат каматите на следниот состанок на централната банка за две недели, креаторите на политики сè уште се поделени дали царините ќе предизвикаат еднократен ценовен шок или нешто долготрајно.

Да погледнеме како стојат светските берзи.

Индексот S&P 500 минатата недела се движеше околу почетната вредност, додека Nasdaq им донесе на инвеститорите раст од 1,2 отсто. Индустрискиот Dow Jones остана непроменет.

Во Азија, кинескиот CSI 300 порасна за 0,93 отсто, јапонскиот Nikkei за 1,02 отсто, а хонгконшкиот Hang Seng за 3,01 отсто. Во Европа, германскиот DAX се зголеми за 1,18 отсто, францускиот CAC 40 за 0,62 отсто, лондонскиот FTSE 100 за 0,44 отсто, а паневропскиот Stoxx Europe 600 за 0,25 отсто.

Дали доаѓа корекција?

Мајк Вилсон од „Морган Стенли“, кој беше еден од најупорните песимисти на Волстрит, вели дека гледа биковски тренд на берзата, но пред тоа индексот S&P 500 можеби ќе доживее корекција.

Главниот стратег на банката предвидува дека цените на американските акции во овој квартал ќе паднат од пет до 10 проценти, бидејќи влијанието на трговската политика на претседателот Трамп ќе се рефлектира во финансиските билансни извештаи на компаниите. Тој смета дека падот ќе биде краткотраен и ќе им понуди на инвеститорите привлечна можност да влезат на пазарот, кој на крајот ќе биде движен од подобрување на очекувањата за раст на добивките на компаниите.

Најновите добивки на индексот S&P 500 доаѓаат во време кога американските компании и економијата покажуваат издржливост, и покрај постојаните промени во трговската политика на Белата куќа. Поттик за оптимизам е и потенцијалот за раст на добивките поради неодамна усвоениот даночен закон.

 

Антидоларски балон: Сите балони порано или подоцна пукаат

Постојаната продажба на американскиот долар сè повеќе се однесува како балон. И како што е случај со сите балони, и овој порано или подоцна ќе пукне, проценуваат стратегиите од „Ејч-си-би-си холдингс“ (HSBC Holdings). Инвеститорите очигледно се фокусирани на големиот пад на доларот годинава и, според зборовите на стратегот Пол Мекел и неговиот тим, се сè повеќе склони да го проектират ова движење и во иднината. Според нив, тоа е типично за „надуено“ однесување.

„Веќе некое време беше очигледен балон за силниот долар, а сега се случува спротивното: некаква форма на антибалон,“ напишаа стратегиите. „Постојат карактеристики типични за балоните, што е предупредување дека се приближува дното на доларот.“

Среброто годинава поисплатливо од златото

Цената на среброто е близу до највисокото ниво во последните 14 години, бидејќи инвеститорите бараат алтернативи на златото, кое е речиси на рекордни вредности. Растот го поттикнуваат и ризиците од дополнителни американски царини на метали, што уште повеќе би го ограничило физичкото снабдување.

Цената на среброто на спот пазарот моментално се движи околу 39 долари за унца, откако минатата недела порасна за четири проценти, што го доведе до највисоката вредност од 2011 година.

 

Bloomberg

Анализа на пазарот на нафта: што следи во втората половина од годината?

Движењата на пазарот на нафта во 2025 година најдобро можат да се опишат со еден збор: нестабилност. Цените на суровата нафта во последните 12 месеци паднаа за 17 отсто, додека од почетокот на годината беа забележани два значајни скока.

„Двата скока во цената на нафтата годинава беа резултат на геополитички настани,“ стои во извештајот „Суровини на крстопат“ на аналитичарите на „Блумберг Адрија“, додавајќи: „Сепак, производството на нафта во САД достигнува рекордни нивоа, а зголемувањето на експлоатацијата во рамките на ОПЕК+ го зголемува глобалниот вишок, што заедно со економското забавување создава притисок за намалување на цените.“

Аналитичарите од „Блумберг Адрија“ сметаат дека цените на нафтата ќе останат под притисок од вишокот на светската понуда и бавниот економски раст. „Геополитичките ризици се најголемата непознаница во врска со цените. Доколку примирјето помеѓу Израел и Иран трае, очекуваме притисок за намалување на цените, што ќе ја задржи цената на нафтата на нивото од мај,“ велат тие, додавајќи дека истото важи и за евентуално примирје помеѓу Русија и Украина.

Целосната анализа можете да ја прочитате тука.

Што следиме оваа недела?

Понеделник, 21 јули

* Податоци за работењето ќе објават „Рајанер“.

* Германскиот канцелар и министерот за финансии ќе присуствуваат на германски инвестициски форум.

Вторник, 22 јули

Говор ќе одржи претседателот на Федералните резерви, Џером Пауел.

Податоци за работењето ќе објават „Кока кола“  и германскиот САП.

Среда, 23 јули

* Заседание на ЕЦБ кое ќе трае два дена.

* Наддавање за германски 10-годишни обврзници.

* Податоци за продажба на недвижности во САД.

* Податоци за работењето ќе објават „Алфабет“, „Тесла“ и ИБМ.

Претседателот Трамп ќе ги презентира своите приоритети во областа на вештачката интелигенција на настанот „Winning the AI race“.

Четврток, 24 јули

* Во Германија ќе бидат објавени податоци за регистрација на автомобили.

* Германскиот институт ГФК ќе објави податоци за потрошувачката клима.

* Во еврозоната, Јапонија и САД ќе бидат објавени PMI за производниот и услужниот сектор.

* ЕЦБ ќе одлучува за каматните стапки.

* Во САД ќе бидат објавени податоци за барања за невработеност.

* Податоци за работењето ќе објават „Нестле“, „Роше“, „Интел“, „Блекстоун“ и „Дојче банк“.

* Во Кина ќе започне самитот ЕУ-Кина.

Петок, 25 јули

* Во Јапонија ќе бидат објавени податоци за инфлацијата.

* Во Германија ќе бидат објавени деловни очекувања.

* Институтот ИФО ќе објави податоци за деловната клима во Германија.

* Руската централна банка ќе донесе одлука за каматните стапки.

* Податоци за работењето ќе објави „Фолксваген“ .