Златото достигна нов рекорд додека трговците чекаат знаци за инфлацијата во САД

Златото достигна нов рекорд во услови на растечки оптимизам за изгледите за монетарната политика на САД додека инвеститорите го очекуваат клучниот инфлациски извештај што може да им даде простор на креаторите на политиките за пониски стапки. Среброто го продолжи растот и достигна највисоко ниво во повеќе од девет години.

Златото денеска порасна за дури 0,9 проценти, на 3.719,95 долари за унца, надминувајќи го рекордот поставен минатата недела откако Федералните резерви (Фед) во средата ги намалија стапките за првпат од декември. Пониските стапки им користат на благородните метали што не носат камата.

Вредноста на среброто се зголеми уште повеќе со поддршка од оптимистичките трговци со опции, достигнувајќи денеска дури 43,7727 долари за унца. Жарот се прелеа и кај платината и паладиумот, сигнализирајќи го растечкиот апетит на инвеститорите за благородни метали што се користат во клучните индустрии.

„Техничките показатели изгледаат доста силно, а очекувањата за подлабоко намалување на каматните стапки се зголемуваат“, рече Сони Кумари, стратег за стоки во АНЗ (ANZ Group Holdings Ltd). „Кај среброто, неодамнешниот отпор од 43 долари за унца беше пробиен, додека златото достигна 3.708 долари за унца - што сугерира дека цените ќе продолжат да растат“, вели Кумари.

Трговците ќе ги анализираат дојдовните податоци неделава, вклучувајќи ги и мерењата на активноста во Европа и индексот на цените на личните потрошувачки трошоци во САД. Претпочитаната мерка на Фед за основната инфлација минатиот месец веројатно порасна со побавно темпо, што би го зајакнало аргументот за дополнително намалување на каматните стапки. Освен тоа, Пауел утре треба да зборува и за економските перспективи.

Пазарите предвидуваат уште две намалувања на каматните стапки годинава, а перспективите за понатамошно монетарно олеснување од страна на Фед ќе бидат главен катализатор за порастот на златото, кое годинава ја зголеми вредноста за повеќе од 40 проценти. Цените се поддржани и од побарувачката за засолништа поради загриженоста за геополитичките конфликти и влијанието на царините на американскиот претседател Доналд Трамп врз глобалната економија, заедно со зголемените купувања и удели на централните банки во фондови што се тргуваат на берза.

Индексот на доларот „Блумберг“ е непроменет. Среброто порасна за 1,6 отсто, платината за еден отсто, а паладиумот ја зголеми вредноста за 0,9 отсто.

Во моментов нема коментари за веста. Биди прв да коментира...

Остави коментар