Време на рекорди: Среќни се оние што инвестираа во злато

Не згрешија инвесторите што во изминативе неколку години решија своите пари да ги вложат во злато, но и граѓаните што решија физички да го купат овој скапоцен метал. Всушност, тие имаат голема причина да бидат задоволни бидејќи цената на унца злато се зголеми од 1.946 долари (10.9.2020 година) на 3.654 долари (10.9.2025 година), што е раст од речиси двапати за пет години. Геополитичките превирања и продолжувањето на воените дејства во Украина, но и на Блискиот Исток, високата инфлација и неизвесноста што ја донесе новата трговска политика на американската администрација предводена од Доналд Трамп се чини дека беа главни катализатори за инвеститорите да ги пласираат своите пари во скапоцениот метал, кој со векови важи за сигурно засолниште. Златото сјае можеби како никогаш досега, а главното прашање што се поставува сега е каде е границата на растот.

Можно пробивање на границата од 5.000 долари за унца

Златото може да достигне речиси 5.000 долари за унца доколку се наруши кредибилитетот на Федералните резерви, а инвеститорите пренасочат само мал дел од вложувањата од државни обврзници во злато, соопшти неодамна „Голдман Сакс“ (Goldman Sachs Group Inc.).

„Сценарио во кое независноста на Фед би била нарушена веројатно би довело до повисока инфлација, пониски цени на акциите и долгорочните обврзници, како и ерозија на статусот на доларот како резервна валута“, наведуваат аналитичарите на „Голдман Сакс“. „За разлика од тоа, златото претставува средство за зачувување вредност што не зависи од институционална доверба.“

„Голдман Сакс“ претстави повеќе можни сценарија за движењето на цената на златото: основната проекција е скок до 4.000 долари за унца до средината на 2026 година; таканаречено ризично сценарио предвидува 4.500 долари; а процените одат и до речиси 5.000 долари доколку само еден отсто од приватно поседуваниот пазар на американски државни обврзници се пренасочи во злато.

Оттаму укажаа дека златото годинава е меѓу најсилно растечките суровини и дека растот е поттикнат од акумулацијата од страна на централните банки и од очекувањата дека Фед наскоро ќе почне да ги намалува каматните стапки во САД. Нов импулс за растот дојде неодамна, откако претседателот Доналд Трамп се обиде да воспостави поголема контрола врз Фед, вклучувајќи иницијатива за смена на гувернерката Лиза Кук.

„Проценуваме дека доколку 1 отсто од приватно поседуваниот пазар на американски државни обврзници се пренасочи во злато, неговата цена би се искачила на речиси 5.000 долари за унца, под услов сите други фактори да останат непроменети“, наведуваат аналитичарите. „Поради тоа, златото останува нашата најсилна препорака за долгорочна инвестиција во секторот на суровини.“

Што очекуваат нашите аналитичари?

Аналитичарите на „Блумберг Адрија“ неодамна изразија очекување златото да продолжи со својот раст во втората половина од 2025 година, бидејќи постојаната неизвесност ја зголемува побарувачката за средства што се безбедни засолништа и го зајакнува интересот на инвеститорите.

„Федералните резерви ги намалија каматните стапки за вкупно 75 базични поени во текот на 2024 година, вклучувајќи го и намалувањето од 25 поени во ноември, што испрати силен сигнал до пазарот. Оваа одлука ги намали реалните приноси од обврзници, правејќи го златото релативно попривлечно за инвеститорите. Иако немаше понатамошни намалувања во првата половина на 2025 година, очекувањата за некои намалувања продолжија да ги зголемуваат цените“, наведуваат нашите аналитичари.

Bloomberg

Тие информираа дека во првиот квартал од 2025 година централните банки купиле 244 тони злато, што е помалку од претходниот квартал, но купувањето останува стабилно.

„Глобалните ЕТФ-ови за злато ги доживеаја своите најсилни приливи за повеќе од пет години. Само во првата половина на 2025 година беа додадени речиси 400 тони. Зголемувањето на инвестициите во ЕТФ-ови исто така ја зголеми физичката побарувачка, додавајќи притисок врз цените нагоре“, укажуваат нашите аналитичари.

Што би можело да го запре растот на златото?

По речиси непрекинатиот пораст на цената на златото од почетокот на минатата година, на крајот би можело да има одредена консолидација, бидејќи инвеститорите би ги впаричиле своите добивки, според „Блумберг“.

„Голема деескалација на тарифите на Трамп и мировен договор меѓу Русија и Украина исто така би можеле да предизвикаат пад на цената. Но централните банки се најважниот столб на поддршка за биковскиот замав на златото, што значи дека тие имаат моќ да направат најголема штета ако ги намалат своите резерви“, пишува „Блумберг“.

Сепак, нема индикации дека некоја од централните банки што поседуваат најголеми количества злато размислува за продажба.

„Централните банки на развиените економии продадоа многу малку злато во последните децении во споредба со 1990-тите, кога постојаните продажби ги намалија цените на златото за повеќе од една четвртина во текот на деценијата“, наведуваат од „Блумберг“.

Поради загриженоста дека тие некоординирани продажби го дестабилизираат пазарот, во 1999 година беше склучен првиот договор за злато на централните банки, според кој потписниците се согласија да ја ограничат својата продажба на злато.