Дали горивата ќе поевтинат - „Окта“ понуди попуст кој за „Макпетрол“ е недоволен

Од денеска до крајот на овој месец „Окта“, најголемиот снабдувач со деривати во земјава, ќе обезбеди попуст од 2 денари по литар дизел и бензини, за трговците кои набавуваат горива од компанијата.

Иницијатива на „Окта“ е насочена кон поддршка на домашниот пазар на нафтени деривати и олеснување на тековните притисоци, во услови на зголемена нестабилност на регионалните и меѓународните енергетски пазари, соопшти компанијата по средбата на извршниот директор Димитрис Пасхос со министерката за енергетика Сања Божиновска.

„Препознавајќи ги предизвиците во енергетскиот сектор што ги донесе актуелната состојба, ‘Окта’ презема конкретни чекори за поддршка на пазарот и потрошувачите. Во овој контекст, зајакнувањето на снабдувањето преку продуктоводот ВАРДАКС игра значајна улога во обезбедувањето стабилност и континуитет во снабдувањето со горива низ целата земја“, изјави Пасхос.

Министерката за енергетика, рударство и минерални суровини, Сања Божиновска, изјави дека во период кога меѓународните енергетски пазари остануваат непредвидливи, а цените се под влијание на глобалните случувања, обезбедувањето сигурно снабдување и стабилност за граѓаните и бизнисите претставува клучен приоритет на Владата.

„Иницијативите, како што е оваа на ОКТА, кои овозможуваат зајакнато снабдување и истовремено го претвораат во директна поддршка за потрошувачите, се особено важни, бидејќи помагаат да се намали притисокот врз домаќинствата и бизнисите, истовремено одржувајќи ја стабилноста на домашниот пазар на нафтени деривати“, истакна Божиновска.

И премиерот Христијан Мицкоски изјави дека ова е добра вест затоа што попустот што „Окта“ ќе го даде на своите партнери ќе се преслика на цените во малопродажбата.

„Добра вест за македонските граѓани е што ‘Окта’ на компаниите коишто соработуваат со нив од денеска ќе им даде попуст од отприлика 45 до 50 долари по тон. Тоа би значело намалување некаде околу 2,5 денари по литар. Бидејќи регулаторна ја одредува највисоката цена, очекувам откако ова ќе биде објавено, во текот на денот за отприлика 2,5 денари по литар да бидат намалени нафтата и нафтените деривати“, изјави Мицкоски. 

„Макпетрол“ бара замрзнување на набавните цени

За најголемиот дистрибутер на нафтени деривати во земјава, „Макпетрол“, иницијативата на „Окта“ не е доволна и не го решава проблемот кој го налага моменталната ситуација. 

„Имајќи предвид дека добавувачот изминатиот период продаваше по многу повисоки цени од малопродажните регулирани цени од страна на РКЕ и остваруваа профити, додека трговците на мало работеа во загуба, но не ги затворија своите продажни објекти, за очекување беше дека ќе се добијат повисоки дисконти во набавната цена“, соопшти „Макпетрол“. 

Со оглед на состојбата, се очекува цените на суровата нафта и понатаму да растат, а тоа значи дека трговците и натаму ќе бидат принудени да работат со загуби, велат од компанијата.

Според „Макпетрол“ како најдобро решение за надминување на проблемот за сите засегнати страни, вклучувајќи ги граѓаните, смета дека е замрзнување на набавните цени на нафтените деривати, а со тоа и малопродажните цени, како што е пракса во регионот.

„Макпетрол“ сè уште од добавувачот нема добиено официјално известување за намалувањето на цената, соопшти компанијата.

 

Текстот е ажуриран со соопштението од „Макпетрол“.