Златото се движи кон неделен пад поради порастот на инфлацијата во САД

Златото се движи кон неделна загуба откако трговците ги намалија облозите за намалување на каматните стапки од страна на Федералните резерви (Фед) следниот месец по зголемувањето на инфлацијата.

Златото се тргува на ценовно ниво од близу 3.340 долари за унца, откако ја заврши претходната сесија со пад од 0,6 проценти по извештајот што покажа дека инфлацијата во јули во САД се забрза најмногу за три години. Приносите од обврзниците и доларот пораснаа по објавата на таквите податоци, оптоварувајќи го златото, кое е без камата, бидејќи цената му се вреднува во американската валута.

Трговците сега гледаат околу 90 проценти шанса централната банка на САД да ги намали каматните стапки во септември. Златото обично има корист во опкружување со пониски каматни стапки бидејќи за него не се плаќа камата.

Благородниот метал се искачи за повеќе од четвртина годинава, при што најголемиот број добивки се случија во првите четири месеци. Тој беше поддржан од зголемените геополитички и трговски тензии што ја поттикнаа побарувачката за засолништа, додека купувањата од централните банки исто така ја поткрепија неговата сила.

Трговците ќе го следат самитот меѓу претседателите на САД и Русија во Алјаска што ќе се случи денеска, а што би можело да има влијание врз побарувачката за ова средство, кое се смета за засолниште. По телефонскиот разговор со европските лидери пред средбата со рускиот лидер, Доналд Трамп предупреди дека ќе наметне „многу сериозни последици“ ако Владимир Путин не се согласи на договор за прекин на огнот во Украина.

Минатата недела конфузијата околу тоа дали златните прачки ќе бидат предмет на американски царини предизвика скок на премијата за фјучерсите во Њујорк во однос на спот цената во Лондон. Претседателот Доналд Трамп во понеделникот изјави дека сепак нема да има дополнителна царина - предизвикувајќи намалување на јазот на двата пазара - но сè уште се чека формалното појаснување.

Спот златото во рамките на денешното тргување во Сингапур порасна за 0,2 отсто, на 3.342,68 долари за унца, ставајќи го на пат за загуба од 1,6 отсто неделава. Индексот на „Блумберг“ за доларот се намали за 0,2 проценти. Цената на среброто и паладиумот остана непроменета, а вредноста на платината порасна.

Во моментов нема коментари за веста. Биди прв да коментира...

Остави коментар