Трамп го ослободи увозот на злато од тарифи, пазарите се стабилизираа

Претседателот Доналд Трамп во понеделникот изјави дека увозот на злато нема да биде опфатен со американските царини, коментирајќи по одлуката на федерално ниво, која предизвика хаос и забуна на глобалните пазари со благородни метали.

„Златото нема да биде тарифирано!“, објави Трамп на социјалните мрежи.

Фјучерсите на злато што се тргуваат на њујоршката берза Комекс (Comex) и глобалниот референтен индекс за спот-цени во Лондон останаа речиси непроменети по објавата на Трамп. Спот-златото намали дел од загубите, но и понатаму беше во пад за повеќе од 1,2 отсто во текот на денот.

До понеделникот попладне ниту една американска агенција сѐ уште немаше објавено формална, ажурирана политика.

Минатата недела претставник на Белата куќа најави дека администрацијата ќе издаде нова политика со која ќе се појасни дали златните прачки ќе подлежат на увозни давачки, откако Американската царинска и гранична служба  ги изненади трговците со одлуката дека увозот ќе биде предмет на тарифи.

Одлуката утврди дека златните прачки од еден килограм и 100 унци ќе бидат предмет на царините на Трамп засновани на земјата на потекло, кои стапија во сила на 7 август. Потегот беше спроведен во форма на писмо испратено до швајцарска рафинерија што побарала информации за третманот на златото, а потоа јавно објавено на веб-страницата на агенцијата.

Доколку одлуката останеше во сила, таа ќе имаше далекосежни последици за трговијата со злато на глобално ниво и потенцијално за непреченото функционирање на американскиот фјучерс-договор за злато. Улогата на златото како финансиски инструмент и глобална валута го издвојува од другите суровини, како бакарот, кои беа погодени од тарифите.

Трговците, аналитичарите и извршните директори во индустријата претходно сметаа дека златните прачки ќе бидат изземени од таканаречените реципрочни тарифи на Трамп, вклучувајќи ја и 39-отстотната давачка на стоки од Швајцарија, која е голем извозник.

Забуната околу писмото на Американската царинска и гранична служба (CBP) во петокот предизвика американските фјучерси на злато да скокнат на рекордно ниво, а трговците изјавија дека пратките биле блокирани како непосредна реакција на изненадувачката вест.

Пазарите со благородни метали се стабилизираа во петокот, кога претставник на Белата куќа изјави за „Блумберг“ дека администрацијата на Трамп наскоро ќе објави извршна наредба за да ја појасни, како што ја нарече, дезинформацијата околу тарифирањето на златото и други специјални производи.

Најновото соопштение се надоврзува на турбулентната година за златото, чии цени се искачија на невидени нивоа поради силната куповна активност на централните банки и растечката побарувачка за сигурни средства поттикната од трговската војна на Трамп.

Во поголем дел од годинава физичкиот проток беше нарушен, откако трговците пренесоа злато и сребро вредни милијарди долари во САД, бидејќи цените во Њујорк се тргуваа со големи премии во очекување на потенцијалните царини. Меѓутоа, таа трговија нагло запре откако САД ги вклучија златото и среброто на списокот на изземања од тарифите објавени на почетокот на април.