Дилемата на инвеститорите: Да се ​​купи биткоин или не?

Целиот свет ја следи претседателската трка под лупа, вклучувајќи ги и малите инвеститори, кои сега се прашуваат дали вреди да се инвестира на пазарот на крипто во последен момент, особено во биткоин. Баравме одговори.

Вредноста на најголемата криптовалута, биткоинот, минатата недела се доближи на само 234 долари до рекордот поставен во март, кога изнесуваше 73.798 долари. Според некои аналитичари, поголемите шанси за победа на Трамп придонеле за раст на токенот во тоа време. Во моментот на пишувањето на текстот вредноста на биткоинот е речиси 69.000 долари (нешто над 63.000 евра).

 

„Изборите може да имаат краткорочно влијание врз нестабилноста на биткоинот и другите криптовалути, но нема значително да ја сменат насоката на движење без оглед на исходот од изборите“, смета аналитичарот Тилен Шарлах.
„Биткоинот технички е во растечки тренд и моментално е поверојатно движењето нагоре кон нови рекордни височини отколку пресврт во друга насока“, смета тој, додавајќи дека кога работите околу изборите ќе се смират, сите финансиски пазари, вклучувајќи ги и криптовалутите, ќе се вратат на своите долгорочни линии.

„Постои една третина можност за повеќе од 10 проценти флуктуација на цената на биткоинот на денот на изборите“, предупреди минатата недела Ник Фостер, основачот на платформата за тргување со криптовалути Derive.xyz.

За време на кампањата републиканскиот кандидат Доналд Трамп зазеде очигледен прокрипто став, додека  и неговата ривалка од редот на демократите Камала Харис во одмерен пристап вети дека ќе ја поддржи регулаторната рамка за дигиталните средства.

„Трамп е силен поддржувач на секторот, па дури и ја промовираше идејата за создавање национална резерва за биткоин“, изјави за „Волстрит журнал“ Илан Солот од „Марекс солушнс“ (Marex Solutions).

Што мислат професионалците?

Иако генерално е распространето мислењето дека републиканскиот кандидат Доналд Трамп е прокрипто настроен сепак, според познавачите на состојбите на пазарот со дигитални валути, тоа воопшто не значи дека неговата ривалка од редот на демократите Камала Харис е против, односно не е поддржувач на криптовалутите.

„Едноставно тоа се предизборни методи за привлекување гласови. На пример, Трамп пред само десетина или петнаесет дена го имаше своето прво плаќање во крипто, а сето тоа е за привлекување гласачи“, вели Александар Тасевски, еден од основачите на асоцијацијата „Ту д мун“ (2 the Moon), кој има и долгогодишно искуство со криптотргување.

  Александар Тасевски, еден од основачите на асоцијацијата „2 the Moon“, кој има и долгогодишно искуство со криптотргување - Приватна архива

 

Според него, со изборот на едниот или на другиот кандидат може да има турбуленции, но тоа не е нешто што ќе се случува единствено на криптопазарот, туку еднакво реагираат сите пазари.

„Па, оттука, би било чудно ако криптопазарот не ги следи другите финансиски токови бидејќи генерално не се разликува од другите финансиски пазари. Не може да се случи, на пример, ако паднат индексите на берзите, криптото да оди нагоре“, вели Тасевски.

Утрово пишувавме и за тоа дека во текот на вчерашниот ден фондовите со кои се тргува на берзите во САД, а кои вложуваат во биткоин (ЕТФ), го забележаа својот најголем дневен нето-одлив досега во услови кога пазарите се подготвуваат за денот на изборите. Имено, според податоците на „Блумберг“, групата од 12 фонда управувани од „Блекрок“ (BlackRock Inc.) и „Фиделити инвестментс“ (Fidelity Investments) вчера загуби 579,5 милиони долари.

„Во однос на големите нето-одливи од ЕТФ, мислам дека сето тоа е поврзано со изборите. ЕТФ-овите се внимателни. Криптото, сепак, е најмлад, па ако сакате и најдинамичен и најволатилен финансиски инструмент. Има денови кога расте по пет, шест, седум отсто, нешто што е незамисливо за другите пазари и затоа ЕТФ-овите се многу внимателни“, вели Тасевски, кој смета дека е неблагодарно и крајно ризично да се предвидува движењето на цената на биткоинот по изборите бидејќи неговата цена се формира според шпекулациите, односно понудата и побарувачката.

На слична линија е и размислувањето на Ратко Николовски, ИТ-инженер, кој е познавач на состојбите со криптопазарот и има значајно искуство со тргување.

Ратко Николовски, ИТ-инженер, кој е познавач на состојбите со криптопазарот и има значајно искуство со тргување Приватна архива

„Нема правила, но криптото се движи исто како и другите берзи. ЕТФ-овите конкретно имаат милијарди и во тој хаос со мала ценовна разлика тие продаваат бидејќи на големи суми тоа значи и големи добивки. Едноставно се зголемува процентот и тие продаваат, така се менаџира со големи фондови. Ако, на пример, во нивното портфолио е определено два отсто да се инвестиции во крипто, а тие стигнале до 2,3 отсто, тие 0,3 отсто што се разлика ги повлекуваат, односно слободно ги менаџираат за да го диверзифицираат ризикот. Тука не се само изборите, многу алгоритми се важни и се следат“, вели Николовски, кој го дели мислењето со Тасевски дека ставовите на кандидатите за претседател на САД во врска со криптото се чист популизам.

Геополитиката има најголемо влијание врз биткоинот

„Секако, изборите исто така ќе имаат влијание, особено во регулаторна и геополитичка смисла, бидејќи сѐ поголем капитал се влева во оваа индустрија“, рече Марко Павловиќ, виш портфолио-менаџер на платформата „Икономи“.

Но најголемо влијание врз цената на биткоинот и целата индустрија на дигитални средства имаат геополитичките настани, поточно односите меѓу САД, Русија и Кина и на крајот војната во Украина, додава Павловиќ.
„Секој мировен договор ќе вклучува и општествено договорени промени на основите на глобалниот финансиски систем, кој се базира, меѓу другото, на фиатската инфлаторна валута, доларот“, вели тој.

Depositphotos

Победата на Трамп ќе ја зголеми цената на биткоинот на краток рок

„Во случај на победа на Трамп, би можеле да очекуваме пораст на цената на биткоинот на краток рок, но на долг рок неговата администрација може да донесе помала регулатива за криптокомпаниите и поголема слобода во користењето на криптовалутите“, рече Александар Матановиќ, коосновач на првата ЕЦД (ECD) берза за криптовалути во Србија.

Bloomberg Mercury

Исто како и професионалците од Македонија, Матановиќ не очекува негативни движења во цената на биткоинот ниту со победа на Камала Харис.
„Треба да се забележи дека во текот на четирите години од владеењето на Демократската партија, цената на биткоинот значително се зголеми. Може да има краткорочно ценовно разочарување доколку победи Харис, но на долг рок ќе продолжи сегашниот тренд на цената на токенот“, вели Матановиќ.

Иако републиканецот е познат како неформален кандидат на криптоиндустријата, демократите добија и политички донации од индустријата. Во текот на летото комитетот за политичка акција за заштита на напредокот донираше повеќе од 13 милиони американски долари за демократските конгресни кампањи.

Дилема - да се купи или не? Што мислат експертите?

„Инвеститорите треба да бидат свесни дека можат да ги загубат сите средства поради ризик. Дигиталните средства треба да се поделат на биткоин и други криптовалути. Врз основа на тоа, без оглед на нестабилноста на пазарот, инвеститорите треба да се стремат да го зголемат износот на биткоини на долг рок“, смета Марко Павловиќ.

Финансискиот аналитичар Тилен Шарлах од „Ацекс“ (Acex) верува дека може да се повлечат паралели од минатите изборни години за да се добие некоја претстава за движењето на вредноста на биткоинот.

„Биткоинот, создаден во 2009 година, ќе ги доживее своите четврти избори во САД, а податоците од трите претходни избори покажуваат дека биткоинот отсекогаш се собирал по изборите и цената никогаш не паднала на денот на изборите. Ако овој тренд се повтори, тогаш цената на биткоинот треба да го достигне својот врв за околу една година“, предвидува аналитичарот, кој додава и важна забелешка дека минатите приноси не се гаранција дека тие ќе продолжат и во иднина.