.webp){kind=icon}
Руската служба за безбедност соопшти дека спречила терористички напад врз инфраструктура што ги снабдува Турција и Европа со енергија, што ја зголеми загриженоста за снабдувањето.
Федералната служба за безбедност (ФСБ) „спречи обид на украинските специјални служби да извршат саботажа и терористички акт во објект на комплекс за нафта и гас што ги снабдува Турција и Европа со енергија“, се вели во соопштението објавено на веб-страницата. Приведен е руски државјанин за кој државната безбедност тврди дека бил регрутиран од украинската специјална служба.
Портпаролот на Украинската служба за државна безбедност, Артем Дехтјаренко, не одговори веднаш на барањето за коментар.
Засега нема детали за тоа која инфраструктура е таргетирана. Единствената рута што ги снабдува Турција и Европа со руски гас е „Турски тек“, гасовод преку Црното Море. Врската пренесува гас во неколку европски земји, меѓу кои Србија и Унгарија.
И рускиот снабдувач со гас „Гаспром“ не одговори веднаш на барањето за коментар.
Пазарот е особено чувствителен на вакви настани бидејќи Москва во изминатиот период користеше инфраструктурни проблеми како оправдување за ограничувањата во снабдувањето. Русија веќе го прекина снабдувањето до Европа преку големите гасоводи, оставајќи ги „Турски тек“ и ограничените транзитни текови низ Украина како последни рути.
