.webp){kind=icon}
Поради зголемувањето на цените на јајцата во САД, некои Американци се обидуваат да ги намалат трошоците за намирници пазарејќи јужно од границата. Единствениот проблем е што е нелегално да ги внесат назад во земјата, па сега запленувањето јајца на некои гранични премини меѓу САД и Мексико се зголеми за повеќе од 300 отсто.
Од 1 ноември, заплените на јајца се зголемени за 91 отсто во агенцијата во Ел Пасо, 301 отсто во Ларедо, 333 отсто во Тусон и 368 отсто во Сан Диего во споредба со истиот период претходната година, според податоците на царината до 17 јануари. „Во повеќето случаи, заплените вклучуваат не повеќе од неколку табли со по 30 јајца за кои патниците велат дека ги купиле само за да ги искористат пониските цени во мексиканските продавници“, вели Роџер Маер, портпарол на американската царина и гранична заштита.
„Навистина забележавме драматично зголемување во текот на изминатите неколку месеци“, рече тој.
„Жителите на пограничните градови често купуваат намирници во мексиканските продавници, но за некои производи е забранет увозот во САД, вклучувајќи ги и свежите јајца, кои можат да рашират болести како птичји грип“, објаснува Маер.
„Веруваме дека многу луѓе едноставно не биле свесни“ за ограничувањата за внесување јајца, додава тој.
Во повеќето случаи, јајцата биле запленети кај патници што своето пазарење го пријавиле кај граничните службеници и, следствено, не биле казнети. Неодамна, службите наишле на „многу мал број“ непријавени јајца и патниците биле подложени на парични казни.
Цените на јајцата во САД се добар показател за некои од најинтересните зголемувања меѓу основните прехранбени производи во текот на изминатата година. Цената на јајцата во декември беше за 60 отсто повисока во споредба со лани, покажуваат најновите податоци од индексот на потрошувачките цени на Министерството за труд. Епидемијата на птичји грип и уништувањето кокошки во голема мера го поттикнаа зголемувањето на цените, иако големопродажната цена на јајцата малку се намали во текот на изминатиот месец, што сигнализира одредено олеснување за потрошувачите.
