.webp){kind=icon}
Фудбалскиот клуб Барселона се обидува да собере 1,5 милијарда евра од приватни инвеститори преку издавање обврзници, со цел на тој начин да го финансира реновирањето на стадионот „Камп ноу“.
Голдман Сакс (Goldman Sachs) и ЏП Морган (JPMorgan) се одговорни за издавањето обврзници, наведуваат извори запознаени со плановите на каталонскиот клуб. И двете банки одбија да коментираат за ова прашање. Портпаролот на Барселона потврди дека се во тек разговори со американски инвеститори.
Барселона сака да го обнови стадионот со проширување на содржината во рамките на проектот наречен „Еспаи Барса“ (Espai Barca).
Финансирањето се состои од три транши на обврзници од по 500 милиони евра, кои достасуваат во 2032, 2045 и 2052 година. Отплатата, според предлогот, би се обезбедила од новите приходи на клубот, но стадионот нема да биде ставен под хипотека.
Претседателот на Барселона, Хуан Лапорта, рече дека клубот го проширува кругот на можни инвеститори поради настојувањата да постигне што подобра цена на задолжувањата.
Слични финансиски потези на американскиот пазар повлекоа и други фудбалски клубови, како англискиот Тотенхем, кои најмногу се потпираат на големите пензиски фондови и менаџерите за управување со средства.
Многу често таквите кредити се обезбедуваат со самиот стадион што се финансира, со цел инвеститорите да може да станат сопственици во случај клубот да не ги исполни финансиските обврски.
Барселона на сличен начин во САД веќе позајми 525 милиони евра, а како гаранција беа ставени телевизиските права. Дел од тоа задолжување веќе е отплатен.
