.webp){kind=icon}
Украина конфискува клучна фабрика за алуминиум поврзана со „Јунајтед ко русал“ (United Co. Rusal International PJSC) и други имоти за кои тврди дека се во сопственост на рускиот милијардер Олег Дерипаска, под санкциите што владата ги воведе по руската инвазија минатата година.
Повеќе од 300 средства поврзани со Дерипаска и „Русал“ ѝ се префрлени на државата, соопшти украинското министерство за правда преку својата интернет-страница, цитирајќи ја одлуката на највисокиот антикорупциски суд од 16 февруари.
Рафинеријата за алуминиум во Миколаев не е во функција од почетокот на март 2022 година, откако Русија го бомбардира јужниот град. Министерството го обвини Дерипаска дека е близок со рускиот претседател Владимир Путин и дека има значаен удел во „Русал“ и матичната компанија „Ен+ груп“ (En+ Group). Исто така, во соопштението се вели дека „Русал“ контролира некои компании во Русија што произведуваат оклопни возила што ги користи армијата на таа земја за да се бори во Украина.
Дерипаска нема контролни удели во „Русал“ или „Ен+“ откако беше санкциониран од САД. Производителот на алуминиум не одговори веднаш на барањето за коментар испратено по електронска пошта.
„Министерството за правда на Украина нема да застане тука, туку ќе продолжи да ја спроведува санкцијата со конфискација на имотот на санкционираните лица. Правиме сè за средствата на луѓето што ја поддржуваат руската агресија да бидат од корист за економијата и вооружените сили на Украина, и тоа што е можно поскоро“, рече заменик-министерката за правда Ирина Мудра.
„Русал“, чиј коосновач е Дерипаска, ја купи рафинеријата во почетокот на 2000-тите. Се потпираше на постројката, која може да произведува околу 1,76 милион тони алуминиум годишно, што е повеќе од 20 проценти од суровината потребна за нејзините алуминиумски фабрики во Русија. По затворањето на фабриката, „Русал“ мораше да бара нови извори на снабдување, вклучувајќи ги Кина и Казахстан. Трајното губење на рафинеријата „Миколаев“ ќе биде удар за Русија, која има блиски врски со фабриката уште откако беше изградена пред повеќе од 40 години, за да се справи со недостигот од алуминиум во Советскиот Сојуз.
Украинскиот парламент оваа година го одобри законодавството за национализација на имотот на руските граѓани, како и на компаниите во кои Русите имаат сопственички удел. „Русал“ е под контрола на руската групација „Ен+“ , во која Дерипаска сè уште има удел од околу 45 проценти.
