.webp){kind=icon}
Сценаристите на некои од најпопуларните емисии на телевизија не се на своите работни позиции бидејќи штрајкуваат за повисоки плати поради брзите промени во начинот на кој луѓето ги гледаат нивните програми и филмови.
Здружението на писатели на Америка, кое застапува повеќе од 11.500 холивудски сценаристи, соопшти дека штрајкот стапува во сила во вторник наутро по локално време во Лос Анџелес. Членовите минатиот месец со големо мнозинство гласале да се суспендира работењето.
Како резултат на тоа, емитувањето на ноќните ток-шоуа и сапунските опери може веднаш да запре. Во зависност од тоа колку долго ќе трае прекинот на работата, гледачите може да останат без епизодите од своите омилени серии оваа есен. Исто така штрајкот може да влијае врз распоредот на филмските премиери. Тоа би можело силно да ја потисне економијата на Лос Анџелес, вториот по големина град во земјата, кој веќе се бори со побавна продажба на домови и прекини во работната сила на своите пристаништа.
Во соопштението во понеделникот вечер, синдикатот посочи дека одлуката за штрајк е донесена по шестнеделни преговори и дека одговорите на продуцентските студија се „апсолутно недоволни со оглед на егзистенцијалната криза со која се соочуваат писателите“. Еснафот додаде дека студијата не одговараат на прашања како што се оние за употребата на вештачка интелигенција во пишувањето сценарија.
Што ги мачи холивудските сценаристи?
Нивната плата се намалува две години по ред, откако достигна највисоко ниво во 2019 година
Bloomberg
Алијансата на филмски и телевизиски продуценти, која ги застапува холивудските студија, во посебна изјава во понеделникот вечер посочи дека им биле предложени „дарежливи зголемувања“ на приходите на писателите, како и подобрување на плаќањата за емисиите што се емитуваат на сервисите за стриминг. Студијата нагласија дека се подготвени да ја подобрат таа понуда, но и дека барањата на писателите по однос на некои други прашања се премногу големи.
Клучни спорни точки се задолжителното вработување и времетраењето на вработувањето, при што студијата тврдат дека еснафот на писателите бара договори за одреден минимален број сценаристи за емисиите, без оглед на тоа дали се потребни.
Синдикатот, пак, вели дека студијата што произведуваат телевизиски емисии и филмови ја искористиле транзицијата од традиционално гледање ТВ кон стриминг за да ги намалат платите на сценаристите. Повеќе писатели работат за минимални хонорари и на пократки периоди, велат од синдикатот.
Во најславниот период на телевизијата, писателите често работеа на сезони од 22 епизоди, кои вклучуваа пилот-епизоди напишани пред официјалното прикажување на серијата. Во ерата на стримингот, сезоните може да се состојат од само шест или осум епизоди и сериите се нарачуваат директно, без пилоти.
Со оглед на тоа што сервисите за стриминг често добиваат глобални права за емисии повеќе години, има помала можност сценаристите да заработат високи плати од повторени и меѓународни продажби.
Штрајкот доаѓа во услови на севкупно намалување на трошоците за забава по неколку години бум, откако „Нетфликс“, „Волт Дизни“ и други потрошија многу за да создадат нови програми за своите стриминг-серии. „Дизни“ е во процес на отпуштање на 7.000 вработени, од кои многу работеле во креирање или маркетинг на емисии.
Сличен штрајк на сценаристите во 2007 година, кој траеше три месеци, резултираше со губење на 37.700 работни места и 2,1 милијарди американски долари прилив, процени институтот „Милкен“. Тоа исто така поттикна пораст на реалити ТВ-програми за кои се потребни помалку сценаристи.
