.webp){kind=icon}
Дводневните штрајкови ќе доведат до застој во голем дел од британската железничка мрежа, бидејќи ескалира незадоволството и работниците излегоа на протести поради платите. Патниците денеска се соочуваат со најновото отсуство на машиновозачите, кои ги претставува синдикатот „Аслеф“, а се очекува централните градски подрачја да бидат потивки од вообичаено, бидејќи поголем дел од канцеларискиот персонал одбра да работи од дома.
Утре посебниот синдикат РМТ ќе одржи штрајк за илјадници железнички работници, потег што може да го наруши финалето на изборот за песна на „Евровизија“ во Ливерпул. „Аслеф“ воведе и забрана за прекувремена работа в сабота.
Министерот за транспорт Марк Харпер рече дека со удирање на првиот евровизиски настан во Обединетото Кралство во последните 25 години, чиј домаќин инаку требаше да биде Украина, РМТ едноставно ги омаловажува самите патници на кои им служи.
Обединетото Кралство цела година се соочуваше со широкораспространета индустриска акција со протести и штрајкови во повеќе сектори, како што се Кралската пошта, државните служби, училиштата, универзитетите, болниците и јавниот транспорт. Тврдоглавата двоцифрена инфлација е причина за барањата на работниците за подарежливи покачувања на платите.
Харпер рече дека на членовите на РМТ им било понудено зголемување од пет проценти плус дополнителни четири отсто во текот на две години, со можност за поголемо покачување за послабо платени работници, со што машиновозачите би заработиле основна плата од речиси 65.000 фунти (81.400 американски долари) според последниот предлог.
РМТ во март склучи договор со компанијата „Нетворк реил“ (Network Rail), која управува со пругите, но останува во спор со компаниите за возови. Здружението „Реил деливери“ (Rail Delivery Group) рече дека железничките компании прават сè што можат за да се осигурат дека луѓето ќе можат да патуваат во Ливерпул за финалето на „Евровизија“, но предупредија патниците да очекуваат значителен прекин во двата дена, исто како и в недела наутро.
Локалните возови на Мерсисајд не се погодени од штрајковите, но услугите за Ливерпул од другите делови на земјата се соочуваат со можност за одложувања и откажувања. Акцијата на РМТ е насочена кон 14 компании за возови. „Аслеф“ исто така планира штрајкови и на 31 мај и 3 јуни, датум кога треба да се одржи финалето на ФА-купот меѓу Манчестер сити и Манчестер јунајтед на стадионот „Вембли“ во Лондон.
