.webp){kind=icon}
Петте члена на екипажот на исчезнатата подморница, која се упати кон набљудување на остатоците од познатиот брод „Титаник“, загинале по „катастрофална имплозија“.
Американската крајбрежна стража дошла до тој заклучок откако претходно во четвртокот ги испитала остатоците пронајдени под вода, кои биле најдени со помош на возило на далечинско управување. Остатоците беа пронајдени на 1.600 стапки (488 метри) од лакот на „Титаник“.
„Веднаш ги известивме семејствата“, рече контраадмиралот Џон Маугер на конференција во Бостон. „Во име на американската крајбрежна стража и целата здружена команда, изразувам најдлабоко сочувство“.
Прочитајте повеќе: Што знаеме за потонатата подморница и уште колку има воздух?
Конусот од носот на пловилото бил откриен во четвртокот наутро од бродот „Хорајзон Арктик“ (Horizon Arctic). Други парчиња од подморницата, вклучувајќи и делови од трупот, беа пронајдени набрзо потоа, соопшти претходно крајбрежната стража.
„Заедничката команда нема процена кога ќе завршат операциите за пребарување на морското дно“, рече Маугер. Тој додаде дека тимот ќе продолжи да собира информации за да се обиде да ја утврди причината за експлозијата.
Глобален интерес
Сагата за исчезнатата подморница „Титан“ предизвика светски интерес, бидејќи меѓународна флота од бродови и авиони очајно пребаруваше област во Северен Атлантик, двојно поголема од Конектикат. Спасувачите пребаруваа деноноќно, загрижени дека проценетото снабдување со кислород на „Титан“ за 96 часа се намалува, откако пловилото изгуби контакт со канадскиот истражувачки брод „Полар принц“ (Polar Prince) на 18 јуни.
Американската крајбрежна стража претходно неделава соопшти дека за време на потрагата биле откриени неидентификувани звуци, но дека звуците не се поврзани со исчезнатата подморница. Елитниот систем за акустична детекција на американската морнарица го забележа звукот на експлозија во близината на местото на потонатиот брод само неколку часа по активирањето на подморницата, објави во четвртокот „Волстрит журнал“, цитирајќи официјален претставник на американската одбрана.
На подморницата „Титан“ беа Хамиш Хардинг (58) од Велика Британија, основач на инвестициската фирма „Екшн груп“ (Action Group) и страстен авантурист; францускиот поморски експерт Пол-Хенри Наргеолет (77); Стоктон Раш (61), извршен директор на „Оушнгејт“ (OceanGate Inc.) од Еверет, Вашингтон, кој ја водел експедицијата; и Шахзада Давуд (48) и Сулеман Давуд (19), татко и син од едно од најистакнатите пакистански семејства.
Oceangate Expeditions
„Овие луѓе беа вистински истражувачи, кои споделуваа посебен дух за авантура и длабока страст за истражување и заштита на светските океани“, се наведува во соопштението на „Оушнгејт“. „Во оваа трагедија, нашите срца се со овие пет лица и секој член на нивните семејства. Жалиме поради загубата на нивните животи и радоста што им ја носеа на сите што ги познаваа“.
