.webp){kind=icon}
Кипарска фирма има намера целосно, заедно со долговите да го преземе кавадаречкиот гигант „Еуроникел“ или поранешен „Фени“.
Работењето на оваа компанија е клучно за тиквешкиот регион. Проблемите во компанијата се појавија лани за време на енергетската криза. Поранешниот кавадаречки комбинат „Фени“ е еден од најголемите потрошувачи на струја во земјава, а во текот на минатата година, кога струјата драстично поскапе, фабриката работеше со минимален капацитет или воопшто не работеше.
Добро утро, ова се петте важни вести за овој празничен ден.
Фирма од Кипар со понуда за целосно преземање на „Еуроникел индустри“?
„К.А.Д менаџмент сервисес“ (K.A.D Management Services), моментално деловен партнер на „Еуроникел индустри“, сака да ја преземе домашната компанија, дознава „Блумберг Адрија“. Нашите наводи ги потврдуваат лица што се упатени во процесот, но засега сакаат да останат анонимни. Според информациите, „К.А.Д менаџмент“ треба да инјектира ликвидност во компанијата, но и техничка експертиза, сигурен и остварлив извор на руда и снабдување со електрична енергија, како и пристап до европските и глобалните пазари.
Нашите извори велат дека „К.А.Д менаџмент“ веќе дале понуда за преземање и спас на „Еуроникел“. Понудата е доверлива, а деталите не се познати. Сепак тврдат дека понудата е за преземање на компанијата во целост, заедно со долговите.
Копeр, Риека, Венеција или Трст - кое пристаниште бележи раст и зошто?
Минатата година донесе релативно остар пад на товарниот сообраќај во повеќето од 15-те најголеми пристаништа во Европа. Според анализата спроведена од „Порт економикс“ (PortEconomics), тие пристаништа управувале со вкупно 4,2 отсто помалку товар во 2022 година отколку во 2021 година. Падот на товарниот сообраќај продолжи во првата половина на 2023 година, но повеќето пристаништа очекуваат обемот на контејнерите малку да закрепне во втората половина од годината.
И додека пристаништата на северниот дел на Јадранот минатата година се мачеа со преоптоварување поради пренасочувањето на стоковните текови од северните пристаништа, годинава е нешто поинаку - опаѓа и нивниот сообраќај. Исклучок е пристаништето Копер, кое во првата половина од годинава успеа да го зголеми претоварот на контејнери, што го прави не само единственото јадранско пристаниште туку и едно од ретките европски пристаништа со вакво зголемување. Другото големо пристаниште во регионот Адрија, тоа во Риека, го следи трендот и се соочува со голем пад на товарниот сообраќај.
ММФ предупреди на упорноста на инфлацијата, послаб глобален раст во 2024-та
Меѓународниот монетарен фонд (ММФ) ја подигна својата прогноза за глобалната инфлација за следната година и ги повика централните банки да ја задржат политиката додека не дојде до трајно олеснување на ценовните притисоци.
ММФ ја зголеми својата проекција за темпото на зголемување на потрошувачките цени низ светот на 5,8 отсто за следната година во Светската економска перспектива објавена во вторникот, што е повеќе од 5,2 отсто забележани пред три месеци. Повикот за внимателност во однос на инфлацијата доаѓа откако фондот исто така ја намали прогнозата за економскиот раст во 2024 година.
Занаетчии и врвни експерти посветено работат за „Нотр Дам“ да блесне во полн сјај
Еднo од најстарите и најпрепознатливи обележја на хоризонтот на Париз повторно ќе се издигне.Кулата „Нотр Дам де Париз“, која изгоре и се урна драматично за време на големиот пожар во 2019 година, е среде реконструкција, што е симболична пресвртница во реновирањето на оваа готска катедрала вредно речиси 900 милиони долари, кое конечно е при крај.
Иако проектот имаше голем број предизвици, и во обемот и во дизајнот, повторното отворање на најпосетуваната зграда во Европа - која пред пожарот привлекуваше околу 12 милиони луѓе годишно - е закажано за 8 декември 2024 година.
Што е Хамас - историја на милитантната група што го нападна Израел
Со еден потег, нападот на Хамас врз Израел ги преуреди регионалните приоритети за скора иднина и ги одложи плановите на американскиот претседател Џо Бајден да формира трилатерален сојуз меѓу Израел, Саудиска Арабија и САД.
Исламистичкиот Хамас веќе 16 години владее со Појасот Газа, изолирана медитеранска енклава во која живеат 1,9 милион Палестинци. САД и Европа ја прогласија за терористичка група чија историја на самоубиствени напади е пречка за мирот меѓу Израелците и Палестинците. Други тврдат дека Хамас стекнал кредибилитет кај некои Палестинци поради неговата подготвеност да се бори за палестинска државност по децении неуспешни и замрзнати мировни напори за кои се залага неговиот ривал Фатах, кој владее во Западниот Брег.
