.webp){kind=icon}
При престојување во затворена просторија подолго време да се носат маски, а лицата од ризичните категории маска минимум ФПП2 или Н95 или ФФП3. Просториите во кои се престојува подолго (канцеларии, занимални во градинки, сали за состаноци и слично), како и спортски објекти, редовно да се провертуваат и да се дезинфицираат. Да се избегнува непотребно собирање во големи групи и секогаш кога може да се одржува растојание од два метра.
Ова се дел од препораките кои денеска Министерството за здравство и Комисијата за заштита на населението од заразни болести ги упатија поради тоа што во нашата држава се забележува зголемување на трансмисијата на коронавирусот, но, како што велат, тоа е и општ тренд што не може да се очекува да нè одбегне.
Од Министерството за здравство и Комисијата за заштита од заразни болести посочуваат дека активно ја следат состојбата со Ковид-19 во земјата, но и активно ги следат состојбите на европско и светско ниво.
„Иако во моментот состојбата е релативно мирна, со цел да остане таква, Министерството за здравство препорачува внимание и преземање мерки за лична заштита. Ова особено се однесува, но не исклучиво, на постарите лица, лицата кои имаат една или повеќе хронични болести и сите кои имаат намален имунитет поради која било причина“, истакнуваат од ресорното министерство.
Препорачуваат доколку граѓаните почувствуваат некои од стандардните симптоми (сува кашлица, температура, болки во грло, болки во мускулите и слично) веднаш да побараат помош од матичен лекар и задолжително да носат маска.
„Во Здравствените домови ширум државата веќе е зголемен бројот на термини за тестирање на пациенти, а само во ЗД Скопје тестирање се врши во пет пункта. Исто така, најефикасна заштита од развој на потешки форми на Ковид и хоспитализација и натаму останува вакцинацијата против Ковид. Така што, за целосно заштитени се сметаат тиeкои имаат примени две дози вакцини и дополнителна, т.е. бустер доза. Сите оние кои не се вакцинирале или не го завршиле целиот вакцинален циклус, се препорачува истото веднаш да го направат, а кај оние кои поминале четири месеци од бустер дозата им се препорачува и второ бустирање“, порачуваат од МЗ.
Потсетуваат дека на сила и натаму е обврската за носење маски во јавен превоз, здравствени установи, аптеки и домови за стари лица.
