.webp){kind=icon}
Каков потег ќе повлече македонската централна банка идната недела? Европската централна банка, Фед, Банката на Англија неделава ги одржаа последните состаноци и одлучија да ја завршат годината без промени на каматните стапки. Во вторник последниот состанок за годинава ќе го има и Комитетот за оперативна монетарна политика при НБРМ и ќе биде одлучено дали годинава ќе заврши со камата од 6,30 отсто на благајничките записи или не. Според проекциите на аналитичкиот тим на „Блумберг Адрија“, референтната камата во земјава ќе почне да се намалува од средината на следната година.
Топ тема во Македонија деновиве беше цената на струјата. Оваа тема ќе остане „дежурна“ до Нова година, кога ќе се знае колку ќе поскапи енергентот. Во меѓувреме „Блумберг Адрија“ ќе ги спореди сметките за струја во регионот, не само цената на киловат-час туку и сите давачки што ја формираат крајната сума што ја плаќаме.
Како што расте интересот за вложувања во фотоволтаични централи, така се зголемува проблемот со вишокот струја. Пазарот се соочува со нов предизвик, како да се зачува произведената струја. Како оди производството на батерии за таа намена?
Ќе се занимаваме и со железничкиот транспорт во земјава. Во моментов, таков каков што е, го кочи бизнисот затоа што компаниите мака мачат да пренесат стоки преку граница. Ѝ треба ли на земјава либерализација во железничкиот сектор?
Следната недела ќе се занимаваме и со земјоделскиот сектор во регионот Адрија, а ќе анализираме и колку чини додавањето пестициди во храната. Колку е исплатливо тоа во услови кога барем еднаш месечно камиони товарени со храна за извоз ни се враќаат дома затоа што не е здрава за употреба.
