.webp){kind=icon}
39-годишен маж е затворен и обвинет за насилство врз службено лице по нападот врз данската премиерка Мете Фредериксен, поради што откажала неколку изборни настани.
Мажот, наводно, ја удрил данската премиерка со стисната тупаница по нејзината десна надлактица на централниот плоштад во Копенхаген во петокот, објави „Рицау“, цитирајќи судско сослушување. Тој ќе биде во затвор до 20 јуни, се вели во веста.
Мажот се појавил во судот околу 13 часот по локално време во саботата, откако беше уапсен во петокот вечерта веднаш по нападот. Обвинетиот - полски државјанин кој покрај себе имал преведувач - се изјаснил за невин по обвинението.
Нападот во Копенхаген доаѓа помалку од четири недели откако словачкиот премиер Роберт Фицо беше застрелан во обид за атентат. Фицо го преживеа нападот и моментално се опоравува пред да се врати на работа подоцна во јуни или во јули.
Се чини дека нема политички мотив за нападот на данската премиерка.
Данските политичари, заедно со Фредериксен, во моментов водат кампања пред изборите за Европскиот парламент овој викенд, а премиерката се појавува со кандидатите од нејзината Социјалдемократска партија. Таа требаше да присуствува на настани во пет градови во саботата, но сите тие се откажани поради инцидентот, соопшти нејзината канцеларија.
Според извештаите на локалните медиуми, нападот се случил додека премиерката се среќавала со лице во кафуле во трговскиот кварт во Копенхаген. Премиерката се соочила со мажот додека таа се движела со своите обезбедувачи неколку метри зад неа, цитираат локалните медиуми изјавите на очевидци.
Данска е најбезбедната земја во светот по Исланд, според Глобалниот индекс на мирот, а нордиската нација речиси немала понова историја на политичко насилство.
Претседателот на Европскиот совет, Шарл Мишел, беше меѓу глобалните лидери кои го критикуваа нападот врз Фредериксен, велејќи во пост на X дека „остро го осудувам овој кукавички чин на агресија“.
