Федерална порота на судот во Бруклин, САД минатата недела го осуди Алекс Левин, жител на Њујорк за перење пари и за кражби вредни милиони долари од изнајмени сефови во банки во Македонија, Украина, Русија, Молдавија, Латвија, Узбекистан и Азербејџан. Во информацијата објавена на терминалот на „Блумберг“ се цитира соопштението од американското Министерство за правда во кое се вели дека Левин бил член на група која таргетирала странски банки за да вршат кражби од клиенти кои имале изнајмени сефови.
„Како што беше докажано на судењето, помеѓу март 2015 и октомври 2019 година, Левин бил член на софистицирана група која таргетирала странски банки за кои сметале дека им недостасуваат силни безбедносни карактеристики. Членовите на заговорот се претставувале како клиенти кои сакаат да изнајмат сефови во целните банки“, се наведува во соопштението.
Членовите на групата откако ќе добиеле пристап до собите со сефовите користеле специјализирани медицински камери за да ја фотографираат внатрешноста на бравите на сефовите на другите клиенти.
„Користејќи ги овие фотографии, заговорниците изработувале дупликат клучеви од сефовите за да украдат пари и вредни предмети од клиентите во банките“, се посочува во соопштението.
Од Министерството за правда на САД информираат дека улогата на Левин во заговорот била базирана во Бруклин. Тој меѓудругото помогнал приходите стекнати од овие гражби да се исперат во САД.
„На пример, околу периодот на повеќе грабежи на банки во Украина, компанија што ја користеле за унапредување на незаконската шема ги пренесувала незаконските приходи на обвинетиот. Поточно, на 31 јули 2015 година, ‚Гленпорт Мрчентс‘ (Glenport Merchants LLP), компанија со сметка во латвиска банка, му испратила 150.000 долари на Левин. Набргу потоа, Левин испратил 144.727 долари на член на заговорот кој лично учествувал во грабежот на банката“, се наведува во соопштението.
Левин, исто така, користел банкарски сметки во САД, вклучително и сметки лоцирани во источниот округ на Њујорк, за да купи софистицирана опрема што се користела во кражбите, вклучително и мали, специјализирани, медицински камери.
Бреон Пис, обвинител на Соединетите Американски Држави за источниот округ на Њујорк при објавата на пресудата соопшти дека поротата констатирала дека Левин играл интегрална улога во високо софистицирана и добро организирана меѓународна група на крадци кои украле накит и пари во вредност од милиони долари од банките во Источна Европа.
„Улогата на Левин овде во Бруклин за перење готовина и купување опрема што се користела при упадите на сефовите во странство беше клучна за успехот на групата, но со денешната пресуда, таа улога се покажа како причина за пад обвинетиот“, изјави Пис.
Вршителот на должноста помошник директор на ФБИ, Кристи М. Кертис укажа дека користејќи ги софистицираните камери што ги купил во Бруклин, Левин и неговите меѓународните партнери краделе од сефовите што им припаѓале на невини банкарски клиенти.
„Денешната пресуда ја покажува посветеноста на ФБИ да ги повика на одговорност луѓето за нивните обиди незаконски да добијат пари и вредни предмети и ги поздравуваме истражните напори на нашата канцеларија, како и на нашите партнери во канцеларијата на американското обвинителство во обезбедувањето на овој исход“, соопшти Кертис.
Левин за ова криминално дело се соочува со затворска казна до десет години.
.webp){kind=icon}
