.webp){kind=icon}
Врнежите продолжуваат и денеска, а наместа ќе бидат поројни, проследени со грмежи и засилен ветар, најави Управата за хидрометеоролошки работи (УХМР).
„Поради интензивните врнежи на мали територии и за кратко времетраење, можни се локални проблеми и локални излевања на помалите водотеци и суводолици во крајните западни и северо-западни делови од државата, пред сè на оние кои доаѓаат од планинските масиви Шар Планина, Кораб и Дешат, Стогово и Караорман, Бистра и Јабланица“, од предупредуваат од УХМР.
Исто така, се нагласува и дека од поројни врнежи во градските населени места, Скопје, Куманово, Тетово, Гостивар, Дебар, Струга и Охрид, можни се локални урбани проблеми поради недоволен капацитет на атмосферската одведителна мрежа.
Според УХМР, под влијание на циклонска активност, викендов се очекува да наврнат над 40 литри на метар квадратен дожд.
Силниот дожд што почна вчера поплави улици и дворови во Тетово и околината. Пожарникарите синоќа извлекле комбе со 11 патници кои било заглавено во поплавениот подвозник во село Желино.
Во изминатото деноноќие најмногу дожд наврна во Пожаране и Лазарополе. Според мерењата на Управата за хидрометеоролошки работи наврнат е воден талот од 65 литри на метар квадратен.
До осум часот утрово наврнати се 58 литри на метар квадратен во Маврови Анови, 57 во Дебар, 56 на Попова Шапка, 53 во Тетово, 48 во Крушево, 45 во Охрид, 31 во Скопје-Петровец и Крива Паланка, 28 во Скопје-Зајчев Рид и Куманово, 20 во Велес, 19 во Претор, 14 во Прилеп, 13 во Берово и Тополчани, 11 во Битола, 8 во Кавадарци, Виница и Струмица, 7 во Штип, 4 во Демир Капија и 1 литар во Гевгелија.
Целиот Балкански полуостров е под влијание на циклонската активност, а состојбата ви Босна и Хергеговина е најкритична. Досега таму се евидентирани најмалку 20 жртви. Поплавите и свлечиштата ја уништија станбената и транспортната инфраструктура, оставајќи многу заедници отсечени.
Прочитајте повеќе:
Поплави во БиХ: Најмалку 14 загинати, некои места се целосно отсечени
Обилните врнежи во изминатите 24 часа предизвикаа хаос на подрачјето на општините Јабланица, Коњиќ, Кисељак и Крешево, каде беа поплавени станбени згради, а во прекин беа сообраќајните и комуникациските врски. Граѓаните се во паника поради влегувањето на водата во приземните простории, а се зголемува бројот на повредени, исчезнати и загрозени лица.
Претседателството на Босна и Херцеговина на вонредна седница едногласно одлучи за распоредување на вооружените сили на Босна и Херцеговина на подрачјето на општина Јабланица. Инженерски единици, спасувачки тимови и хеликоптери беа итно активирани за да им помогнат на цивилните власти да одговорат на големите поплави и лизгање на земјиштето.
Претседателката Гордана Сиљановска Давкова испрати порака со поддршка до Босна и Херцеговина, по катастрофалните поплави што ја зафатија земјата.
Таа на социјалната мрежа X, поранешен „Твитер“, им порача на луѓето да останат силни.
„Моето срце е со луѓето во Босна и Херцеговина погодени од разорните поплави. Мислам на погодените семејствата и се надевам на сила и брзо закрепнување за целата заедница. Останете силни“, напиша Сиљановска Давкова.
Невремето, проследено до обилни и интензивни врнежи, силен ветер, електрични празнења, речиси целосно ја „парализира“ Албанија, пренесе МИА.
Улиците во градови, пред сè Тирана, Валона, Лежа, Љушња, Булќиза, се под вода чија висина е до 50 сантиметри.
Поради невремето приморскиот град Валона е без електрична енергија, како и други делови во земјата.
Поради големите бранови забрането е испловување на сите видови пловни објекти долж целото крајбрежје.
Државната полиција и Агенцијата за државни патишта апелираат на посебна внимателност, по патиштата, пред сè во планинските подрачја поради одрони и ерозии.
Посебна внимателност, со строго почитување на патната сигнализација, се препорачува и на автопатот Патот на Арбр (Руга е Арбрит), кој Тирана ја поврзува со преминот Блато на албанско-македонската граница кај Дебар, кого на големо го користат и македонски граѓани.
