Јирген Клоп е новиот глобален шеф за фудбал на „Ред Бул“

Јирген Клоп му се придружува на „Ред Бул“ (Red Bull GmbH) како глобален директор за фудбал, по помалку од половина година откако се повлече од функцијата тренер на фудбалскиот клуб Ливерпул.

Клоп, кој по девет години во мај го напушти Ливерпул, од јануари ќе ја надгледува меѓународната мрежа на фудбалските клубови на „Ред Бул“, со задача да нуди стратегии и совети за таленти, се наведува во денешното соопштение на австриската компанија за енергетски пијалаци.

„Ред Бул“ поседува голем број тимови, меѓу кои Лајпциг, Салцбург и Њујорк Ред Булс. Исто така има удел во тимот од англискиот шампионат преку Лидс Јунајтед. Клоп нема да биде задолжен за тренирање на тимовите, туку ќе советува за развој на тимот.

Клоп (57) остави вознемирени илјадници навивачи на Ливерпул кога го напушти клубот по големиот број освоени трофеи, вклучувајќи ги пехарите од Лигата на шампионите и од Премиерлигата. Тој најпрво доживеа успех во германскиот клуб Борусија Дортмунд, така што го доведе тимот до две последователни титули во Бундеслигата во 2011 и 2012 година.

„Неговото назначување ќе значи промена на нашиот ангажман во меѓународниот фудбал и неговиот континуиран развој“, рече Оливер Минцлаф, раководител за корпоративни проекти и инвестиции на „Ред Бул“.

Жерар Улие, уште еден поранешен менаџер на Ливерпул, беше глобален фудбалски шеф на „Ред Бул“ од 2012 до 2020 година.

Австриската компанија е позната по рекламирањето на своите енергетски пијалаци со кофеин преку спонзорствата во спортот. Трошоците за маркетинг лани достигнаа речиси една четвртина од приходите, при што исплатите за спонзорство на спортистите достигнаа 1,09 милијарда евра.

Во моментов нема коментари за веста. Биди прв да коментира...

Остави коментар