Премиерлигата ги отфрла спонзорствата од коцкарници, криптото влегува на голема врата

Навлегувањето пари од криптосекторот во англискиот фудбал продолжува, обезбедувајќи нови средства за клубовите додека регулативите против спонзорствата од коцкање се заоструваат, што е клучен извор на приходи, кој наскоро ќе исчезне.

Криптофирмите потрошиле рекордни речиси 130 милиони фунти (170 милиони долари) на договори за сезоната 2024/2025 во Премиерлигата, според агенцијата за спортски спонзорства „Спортквејк“ (SportQuake). Оваа сума веројатно ќе се зголеми, бидејќи често се објавуваат нови партнерства за време на сезоната.

Овој пораст одразува пазар во закрепнување по низата колапси на компании за дигитални средства во 2022 година и падот на вредноста на криптовалутите. По лошата репутација, партнерствата со фудбалот се обид да се обноват брендовите и легитимитетот, особено меѓу малопродажните клиенти, кои се одвратени од секторот поради скандалите и приказните за брз раст, но и пад.

За клубовите од Премиерлигата што се борат со ограничувањата против коцкањето, криптото е можност да отворат нов извор на приходи. Таканаречената забрана „од свирка до свирка“, која спречува реклами за коцкање на телевизија за време на натпревари, беше воведена во 2019 година. Од средината на 2026 година клубовите ќе мора да ги отстранат коцкарските спонзори од предната страна на дресовите.

Криптоспонзорствата во Премиерлигата се на рекордно високо ниво

Криптофирмите може да навлезат додека се заоструваат ограничувањата против коцкарниците

„Има вистинска промена кон ограничување на видливите спонзорства од коцкарниците“, вели Даниел Мекдонаг, соработник во британската адвокатска фирма „Чарлс Расел“ (Charles Russell Speechlys Llp). „Постои поттик за фудбалските тимови да почнат да бараат нови видови на спонзорства, бидејќи тоа беше доста профитабилен извор - најголемата индустрија што вложува пари во спортот“.

Големи договори се случуваат и низ континентот, па фирми првпат се поврзуваат со фудбалски лиги. Новите партнерства за 2024 година ја вклучуваат криптоберзата „Каркен“ (Kraken), која ги спонзорира Тотенхем Хотспур, Атлетико Мадрид и РБ Лајпциг.

„Крипто.ком“ (Crypto.com), која исто така ги поседува правата за именување на гранприто на Формула 1 во Мајами и арената во Лос Анџелес, која порано беше позната како „Стејплс центар“ (Staples Center), во август објави дека ќе го спонзорира турнирот на УЕФА Лигата на шампионите до 2027 година. OKX, уште една берза, минатата година го продолжи договорот со Манчестер Сити, актуелните шампиони на Премиерлигата.

Регулативите во Обединетото Кралство за крипто се трансформираа во последните години и правилата за маркетинг беа заострени во 2023 година.

Depositphotos

Но, во спортските договори, фокусот е на широка промоција на брендот, како логоа на компании и натписи на оградата покрај теренот, постери на стадионите и натписи на дресовите на играчите. Незаменливите токени (НФТ/NFT) - дигиталните колекционерски предмети складирани на блокчејн-мрежа - се изземени од правилата за промоции во Обединетото Кралство. Спонзорите можат да станат „крипто и веб3 партнери“ на клубовите, нудејќи натпревари, пристап зад сцената на натпреварите и ексклузивна содржина.

Според Мет Хаус, извршен директор на „Спортквејк“, во минатото имало одредена претпазливост околу договорите поради регулаторните мерки, но тоа се променило и фирмите сега се „удобни во тоа што можат да го направат“.

Брендовите им кажуваат на агенциите: „Само ќе ја користиме Премиерлигата за да пренесеме порака за брендот, а не да поттикнуваме директни продажни пораки“, додаде тој.

Depositphotos

Сепак, соработката со криптофирмите не е без ризик. Француската НФТ-компанија „Сораре“ (Sorare), која се согласи на четиригодишен договор со Премиерлигата за играта фантази фудбал во 2023 година, е под обвинение од регулаторите за наводно обезбедување нелиценцирани услуги за коцкање. Компанијата ги негира таквите тврдења.

Нестабилноста и скандалите што го следат криптосекторот исто така влијаат на условите на фудбалските партнерства. Додека спонзорите од подолготрајни или реномирани сектори можат да плаќаат за договори со текот на времето, од новите учесници - особено оние во криптосекторот - често се бара да платат однапред, според адвокатите од „Чарлс Расел“.

Договорите исто така можат да вклучуваат стандардни клаузули за значителна штета на репутацијата, што им овозможува на клубовите да се откажат од договорот ако угледот на компанијата значително се влоши.

За дополнителна заштита, носителите на права можат да побараат писмо за кредит или гаранција од банка или матична компанија за да обезбедат договор.

Клубовите од врвната лига сè уште не се откажале целосно од индустријата за коцкање. Борнмут, Кристал Палас и Астон Вила се меѓу тимовите што годинава потпишаа нови договори за предната страна на дресовите со компании за коцкање, и покрај претстојната забрана.

Но, како што се ослободува тоа примарно место, криптокомпаниите можеби ќе бидат подготвени да ги надградат своите постојни договори.

Нивното спонзорство постепено се воведува во фудбалските лиги. Историски гледано, блокчејн-компаниите претпочитаа да трошат на поголеми договори во спортови како Формула 1, каде што потенцијалот за привлекување богати индивидуи е многу поголем.

Но по две години турбуленции во индустријата и како што фирмите бараат начини да ги промовираат своите брендови, пониските цени во фудбалот стануваат поатрактивни.

„Аркам интелиџенс“ (Arkham Intelligence), фирма за анализа на податоци на блокчејн, потпиша двосезонски договор со турскиот тим Галатасарај во јули. Таа ќе троши 1,8 милион евра (2 милиони долари) по сезона на договорот, добивајќи право да го постави своето лого на ракавите на дресовите.

Тоа е „евтин и ефикасен начин“ за тестирање на пазарот, рече извршниот директор на „Аркам“, Мигел Морел. Ако се исплати, тогаш „Аркам“ би размислил да потроши повеќе за некое повидно место.

„Кога се обидувате да влезете на пазарот, фудбалот нуди навистина голема вредност во однос на бројот на луѓе што се исклучително заинтересирани за спортот во споредба со износот на пари“, рече Морел.