.webp){kind=icon}
ЕКОНОМИЈА
Пауел: Нема потреба да се брза со намалување на каматните стапки
Претседателот на Федералните резерви Џером Пауел порача дека не треба да се брза со намалување на каматните стапки бидејќи неодамнешните податоци за американската економија се исклучително добри, давајќи им на централните банки простор внимателно да ја олабавуваат монетарната политика.
„Економијата не испраќа никакви сигнали дека треба да брзаме со намалување на стапките“, рече Пауел. Овие коментари ги наведоа трговците да ги намалат очекувањата за снижување на каматните стапки во декември. Трговците со свопови исто така ја намалија шансата на помалку од 60 проценти дека Фед ќе ги намали стапките на следниот состанок на 18 декември. Да потсетиме, Федералните резерви почнаа да ги снижуваат трошоците за позајмување во септември со агресивно кратење од половина процентен поен, а потоа минатата недела повторно ја намалија референтната стапка за четвртина поен.
Кинеската економија се стабилизира
Кинеската економија покажува охрабрувачки знаци бидејќи малопродажбата порасна најбрзо во последните осум месеци, што укажува на тоа дека неодамнешните стимулативни напори на Пекинг поттикнале некои клучни сектори. Малопродажбата во октомври пораснала за 4,8 проценти во однос од пред една година, што е најголем раст од февруари и ги надминува сите проценки на истражувањето на „Блумберг“.
Индустриското производство пораснало за 5,3 проценти, помалку од прогнозата. Кога станува збор за недвижностите, падот на цените на недвижностите во Кина се намалил втор месец по ред во октомври, со помош на неодамнешните државни поттици. Цените на новите куќи во 70 градови, исклучувајќи го државното субвенционирано домување, паднале за 0,51 процент во однос на септември, што е најбавно темпо од март.
Вредноста на половните куќи паднала за 0,48 проценти, најмалку за повеќе од една година. Да потсетиме, Кина во последните два месеца започна силен пакет стимуланси за зајакнување на пазарот на недвижности, вклучувајќи намалување на трошоците за задолжување на постојните хипотеки, ублажување на ограничувањата за купување во големите градови и намалување на данокот на купување станови.
ПОЛИТИКА
Израел ја проширува операцијата во јужен Либан
Израелските копнени сили ги прошируваат своите операции во јужен Либан, предизвикувајќи нови судири со милитантите на Хезболах, додека плановите за прекин на огнот предводени од САД остануваат неизвесни. Израелски официјален претставник, кој побарал да остане анонимен, пренел дека војската почнала да влегува во втората линија на либанските заедници кои се надвор од почетната оперативна зона.
Портпаролот на израелските одбранбени сили рече дека силите „дејствуваат на нови места“, но на „истиот вид на домет или растојание“. Понатамошното влегување во Либан следи паралелно со воздушните напади на повеќе од 30 локации на Хезболах во либанската престолнина Бејрут во последните два дена, што предизвика извесни критики од САД.
КРИПТОВАЛУТИ
Еуфоријата околу биткоинот од победата на Доналд Трамп на американските избори се ублажува и на спот-пазарот и на пазарот на деривати. Најголемото дигитално средство падна под 87.000 долари откако претседателот на Федералните резерви Џером Пауел рече дека нема потреба да се брза со намалување на каматните стапки. Тоа го остави токенот на околу 6.500 долари под рекордниот максимум постигнат во средата.
Bloomberg
БЕРЗИ
Европа
Фјучерсите на европските берзи се тргуваат мешано. Еврото зајакна на 1,0542 долар. Да потсетиме, европските индекси во четвртокот го завршија тргувањето со добивки бидејќи трговците разгледуваа низа податоци за заработките на компаниите и ги оценуваа податоците за растот на БДП во еврозоната.
САД
Од другата страна на океанот, фјучерсите на американските акции се тргуваат претежно во црвено по коментарите на претседателот на Фед. Bloomberg Dollar Spot Index го запре петдневниот раст, на што придонесоа коментарите на претседателот на Федералните резерви дека централната банка нема да брза со намалување на каматните стапки. Приносите на американските двегодишни трезорски обврзници се малку променети.
Азија
Кога станува збор за акциите во азиско-пацифичкиот регион, тие се тргуваат претежно во зелено, потпомогнати од охрабрувачките знаци во кинеската економија и повлекувањето на доларот. Регионалниот MSCI единствено бележи загуби, паѓајќи за 0,8 проценти. Акциите во континентална Кина бележат благ раст додека индексите во Хонгконг и Јапонија растат над половина процент.
НАФТА
Нафтата падна, а на тоа влијаат економските податоци за потрошувачката од Кина, долготрајниот ефект на посилниот американски долар и загриженоста дека на светскиот пазар следната година ќе дојде до презаситеност. Брентот се тргува нешто под 72 долара за барел и оваа недела падна за скоро три проценти, додека ВТИ (West Texas Intermediate) е близу 68 долари. Меѓународната агенција за енергија во четвртокот соопшти дека очекува суфицит следната година, бидејќи растот на побарувачката во Кина забавува додека производството расте. Како што се наведува во соопштението, презаситеноста би била уште поголема ако ОПЕК+ продолжи со плановите за заживување на запреното производство.
Bloomberg
